Markus 12 - Bible en GuidarWənməkkpaŋga net məzənseŋ məsdarawɗe ( MAT 21:33-46 ; LUK 20:9-19 ) 1 Yaŋ Yesu atəŋ əpel sit ɗiy də wənməkkpaŋga na: Ɗəf ampək guli net megezlembirke, abas man də mambara, akkpihik katafay nawɗot uwa neti, arkak gəla məɓayən nawga gulyo. Appan guli van avet məɗɗaŋ wəza ka nawfaɗ sən akani, ndən mbat malaka. 2 Adan pay net agap na, ndən slən balam azet məɗɗaŋ wəza addivit megezlembirkeɗi, vi dəpsənəngən uwa net megezlembirkeɗ haran nani. 3 Yaŋ armanəni, arganəni, arɓahanən van halayhalay. 4 Yaŋ aslən balam nan maɓɓan azet əmpa, nani arganənək aka kini, arbəsənən wili. 5 Yaŋ aslən maɓɓan əmpa, ya nani abaynənka. Vas argenin meɓɓet diyɗa, abeynin meɓɓeti. 6 Mbək wətən məs aŋgəl kaka'ə. Aslən azet dirɓedirɓe dawnəh na waɗinən ki wətuwa. 7 Yaŋ məɗɗaŋ wəza net megezlembirkeɗ nek apeleŋ a walaŋ ziti. Ndəni məzəmgəla, məde məbay səmə, asna zəga nawzəmgəla dəsan səmgəni. 8 Armanənka abaynənka, azganənək sə guli net megezlembirkeɗi. 9 Vasna mi afən guli net megezlembirkeɗ adaɗɗa di? Wade wabey məɗɗaŋ wəza net megezlembirkeɗ neki, guli net megezlembirkeɗ vani, wapsit sit ɗiy meɓɓeti. 10 Kəŋɗanən məs Ɗerewel anah ɓa sa? Gərəm məs mərkaŋ gəla azgaŋgə, akkpaŋgək gərəm kiwən naka bezler. 11 Səza Daya ade, zəga na sekene yi ama haramə. 12 Ɗiy gugriɗ net mə Yudeɗ akayaŋgək kuket narmani, asənənka aketi apel wənməkkpaŋgaska. Ya ageslne'eŋgək vi vanday net ɗiyi, ndəɗaŋ mbagənən mbataŋgə. Nzalaka məfaɗ sən məlĩ metiŋ ( MAT 22:15-22 ; LUK 20:20-26 ) 13 Yaŋ aslənin Farisaɗe dit ɗiy na Herodə meɓɓet aza Yesu vi karman də əpel na mani. 14 Azzoŋguk azani aɓsənən na: Mərbəzəga, məsənək na təstəs kənani, kawgeslne sən əpel net ɗiy ɓa, kawelet ɗiy ɓa, is tat ərban tive na Maŋgəlva də gegesiŋ. Tive tay nawfaɗ nzalaka sən Kaysara sa, tay ɓa? Adahək məfaɗgən sa mədawfaɗən ɓa? 15 Ya nan asənək muluvuluvu neti, aɓsit na: Vimi kədawlanən an nazaw di? Məki su suley van taka nula ɗa. 16 Ndəɗaŋ mah əkisənəni: Aɓsit na: Aŋ foto na naway də əverəŋ di? Azlan sənənək na, na Kaysara. 17 Yesu aɓsit na: Məpsən Kaysara an dəslə aza Kaysara, məpsən Maŋgəlva an dəslə aza Maŋgəlva. Aggətaŋgək diyɗa aka wən nan sawɓa. Əssõh aka wən na əsilye net ɗiy mimtiti ( MAT 22:23-33 ; LUK 20:27-40 ) 18 Sadukiɗe azzoŋguk azani. (Ndəɗaŋ məzunahaŋ na əsilye səka əmta tay ɓa.) Assohõnən na: 19 Mərbəzəga, Moyis aver səmək na: An ɗəf amtəka, appatək guluk nan məza dərah uwa ɓa, məlmən dəgəmət guluk vatə, dəɗisəngən zev məlməni. 20 Ɗiy tahəŋ də məlma zit buhul, an daya akayək gulku, yaŋ amtə məza əppa zeŋve ɓa. 21 Masula'ən gəm əgəmta, ndən zam məza əppa zeŋve ɓa. Vaska'e agəɗ də mahokoni. 22 Buhulgit pak dəppaŋ zeŋve ɓa. Dərɓeget pakə, guluk tam zamə. 23 Pay əsilye səka əmta adawsilyoŋ na, ga awan tədawsat di? Vi buhulgit pak aɗitənək ka gulku. 24 Yesu anah sit na: Munokum tat əzlzlaɓa, kaprəmnən gabba an məverin addəv Ɗerewel na Maŋgəlva ɓa, gagdak na Maŋgəlva ɓa. 25 Vi an misilye yi səka əmta, zel agəmaŋ na gil ɓa, gil agəmaŋ na zel ɓa, kassay va maslayɗe a disiŋ. 26 Ya aka wən na əsilye səka əmta na, kəŋɗanən addəv ɗerewel na Moyis, an Maŋgəlva anah sən go'o dit geslembeɗ kpəŋ məzuzlaŋ na: Intə Maŋgəlva na Abraham, Maŋgəlva na Isak, Maŋgəlva na Yakob. 27 Maŋgəlva net ɗiy mimtiti ɓa, Maŋgəlva net ɗiy medereti. Mənokum tat əzlzlaɓ diyɗa. Mahenziŋ an dəday pakə ( MAT 22:34-40 ; LUK 10:25-28 ) 28 Taka səret mərbaŋ-mahenziŋ məs dəprim əpeleŋ a walaŋ zit, awlak na Yesu azlan sitik moggoni, ade əssohon na: Mahenziŋ awani an day pak di? 29 Yesu azlani, an dəday na ndəni: Aprəma Israyel, Daya Maŋgəlva nam Daya tətaka yi. 30 Aŋglu Daya Maŋgəlva nok də mokrok pakə, də megenegenok pakə, də maɗɗulok pakə, də gbogboŋ nok pakə. 31 Masulan na, ndəni: Aŋglu meggok va kəŋglu ki zuko. Mahenziŋ tay dəday kiyit es ɓa. 32 Mərbə-mahenziŋ aɓsən na: Lewi, Mərbəzəga, gesiŋ kənah na tətaka yi tay maɓɓan abbərən ɓaŋka, 33 əŋgluwən də mokrok pakə, də maɗɗulok pakə, də gbogboŋ nok pakə, gəm əŋglu megge va əŋglu ki zuko. Ndəni dəday ki əzla əvəl nawzla kurmbuɗuku gəm əzaɓ-Maŋgəlva temtem pakə. 34 Yesu awlak na, azlanək də maɗɗula, aɓsən na: Faraɗɗa kənan səza məlĩ na Maŋgəlva ɓa. Dərɓagan na ɗəf tay dədawda kiyən əssohon əmpa ɓa. Kristu gəm Davit ( MAT 22:41-46 ; LUK 20:41-44 ) 35 Aka Yesu adaɗɗa əyak addəv Gəla na Maŋgəlva, amna: Mbarmbari mərbaŋ-mahenziŋ adawnahaŋ na Kristu Wətən Davit di? 36 Ya Davit sən kiyən anahək də Zeŋgile Salala na: Daya aɓsən Daya naw na: Asok aka dəzəŋ nawa, hã an nəvoŋgitik məzuzelɗe nok ammba təlko. 37 Ya Davit sən kiyən ayak na Daya: Səŋga adawsan wətən əmpa di? Vanday diyɗa aprəmək əpel na Yesu də ənneke. Yesu tay əzgasən vanday dəslagən zən səzet mərbaŋ-mahenziŋ ( MAT 23:1-36 ; LUK 20:45-47 ) 38 Addəv əyak nani, tay ənah na: Məsla zukum səzet mərbaŋ-mahenziŋ. Aŋglaŋgək əbbalaŋ dit lukutɗe zezekɗe, ɗiy dəsɗetingin a gəlet lumiɗi, 39 əssa aket mezeŋgeɗ nabe addəv gəla nakkal net mə Yudeɗi, gəm aket mezeŋgeɗ nabe a təki nawzəma. 40 Tay əzəmən arya net gil net gəbayɗe, kawbay heret ɗiy na, tay ənziyaŋ diyɗa aka əkkama. Kawtawi wən an tatwãh diyɗa aketi. Əvəl nat gagəbay məs sahãŋke ( LUK 21:1-4 ) 41 Yesu tay ɗewwe aba akoti nawvəl sən Maŋgəlva. Tay ula va vanday adawɗi suleyɗe na təbəz pepreŋ addəvən. Məsaryeɗ diyɗa dəɗiyaŋ diyɗa. 42 Yaŋ gagəbay məssahaŋgək tədeke təɗiyək koɓeɗ sula, vasna deleɗ tektekəŋ ɓa. 43 Yesu ayek gewleɗ nani, aɓsit na: Gesiŋ, in tat ənah sukum, gagəbay məssahaŋgək kəŋ, təɗiyək zəga addəv akoti daykiyit ɗiy pakə. 44 Vi net səddəv an diyɗa net aɗiyaŋgə, ya nata an na sahã nat təgəm təɗi pakə, an na vat nawzəmgən kiyət pakə. |
All right reserved
Bible Society of Cameroon