Markus 11 - Bible en Guidar

Lumu taka an bayma faɗ gəm go'o də Yerusalem ( 11:1—15:47 ) Yesu tay ətoŋ a Yerusalem

¹ Adan agapaŋ gu'o də Yerusalem, go'o də Betfage də Betani, go'o də gərəm net heremeɗi. Yesu aslənək gewleɗ nan sula.

² Aɓsit na: Məddoŋ a walaŋgəla an nabokum ndaka. Ətoŋ nokum addəvən ləŋgə, wakərahaŋ wət koro miynata, ɗəf dəpeŋ ɗah akat ɓa. Məpəlta, məkiyta.

³ An ɗəf anah sukumuk na, vimi kədaɗɗaŋ vas di? Mənah sən na: Wəray Daya tay azani, wamilgit go'u.

⁴ Ndəɗaŋ mbatə, arəhaŋ wət koro miynat appaka, a meŋgle aba tive, apəlnəni.

⁵ Ɗiy meɓɓet en məs nadak aɓsitin na: Mi kədaɗɗaŋ di? Vimi kədawpəlnən wət koro vanəŋ di?

⁶ Yaŋ azlan sitin va Yesu anahə, yaŋ ɗiy nek appetini.

⁷ Akinək wət koro nak sən Yesu, abesin lukutɗe net akani, Yesu asan aketi.

⁸ Ɗiy diyɗa abesin lukutɗe net aka tive, ɗiy meɓɓet tam gaslambeɗ məs abohoŋ sə poho abesin aka tive.

⁹ En məzudawaŋ abe dit en məzəzbanən pak aŋzlaŋgək vaŋvəl na: Hozana! Əzaɓ aka məzəzzan də iya na Daya

¹⁰ Kəta Maŋgəlva dəɗɗa əzaɓ nan aka məlĩ an dədazzani, məlĩ na afəm Davit. Hozana a disiŋ mə səɗəɗə.

¹¹ Yesu aguluk a Yerusalem. Addəv Gəla na Maŋgəlva: Səza abbalan haran aket zəgeɗ pak kiyən tərwəslə, moskoy agəɗək səkay, ndən vit mbat a Betani dit gewleɗ nan kəlaw kiyit sula neki.

Yesu tay əraygən sokoyo

¹² Vit pumpum nani adan agilyoŋ sə Betani, mãy armak Yesu.

¹³ Yesu awələk sokoyo məndəfən moggoni sə faraɗa, ndən mbat ulani kuzuŋ warah zəga akani. Ya adan agap azani, abbər gaslamba kaka' arahə, vi pay na sokoyoy ɓa.

¹⁴ Yesu anah sən sokoyo amna: Ɗəf azəm na ɗah uwa nok ɓa, hã dudan. Gewleɗ nan aprəmnənka.

Yesu addəv Gəla na Maŋgəlva

¹⁵ Ndəɗaŋ gap a Yerusalem. Adan atoŋ addəv gəla na Maŋgəlva, arɓih məvəlaŋ zəga dit məlbahaŋ zəga naddəv gəla na Maŋgəlva pakə, aslaŋgan tabəl net məddəɗaŋ deleɗi mãy mazaŋgeɗ net məvəlaŋ biŋgeɗ na maha.

¹⁶ Dəpəl ɗəf təttaka dətoŋgən də zəga addəv Gəla na Maŋgəlva ɓa.

¹⁷ Agəɗək əyak sit ɗiyi aɓsit na: Nam na məverni na: Kawyani gəla naw na gəla nakkam viyit ɗiy pakə ɓa sa? Yaŋ nokum kəkkpaŋganən ka bətəŋ net məvoŋgoŋ tive.

¹⁸ Deyeɗe net məsdəlveŋge dit mərbaŋ-mahenziŋ aprəmənək wən nani, vi vaski adawkayanən va mbar adawzanən di. Vi tay əgeslne'eŋ sənən diyɗa, sən ɗiy diyɗa aggətaŋgək aka əyak nani.

¹⁹ Adan moskoy agəɗə, Yesu dit gewleɗ nan agulyoŋguk sə walaŋgəla-metiŋ.

Yesu gəm sokoyo məs dəkələ

²⁰ Dawtoŋ də pummo na, awlannək sokoyo nak akələk hã aza slalwanyin.

²¹ Piyer aɗɗumonəko, anah sənək Yesu: Mərbəzəga, awla sokoyo məs kəraygən naka, aŋkəlka.

²² Yesu azlani, aɓsit na: Mətaf Maŋgəlva.

²³ Gesiŋ intat ənah sukum, an ɗəf anah sənək mossorgo metiŋgiŋ na, apət səŋka dok abət a pehe an tay də kuzuŋ a makran ɓa atafək na an adawpeliŋ na wagəɗə, zəga van wagəɗ səni.

²⁴ Vini nədawnah sukum na, zəga an kədassohoŋ də əkkam pak, mətaf na kərəhnənka, asna wakərəhnəni.

²⁵ An kəsilyoŋguk əkkama, an munokum tat də wən də ɗəfa məvvuyon səni, vi Afukum na disiŋ dəvvuyon sukumgən heslepe nokum tamə. [

²⁶ An kəvvuyon sitin ɗiy ɓa, asna Afukum na disiŋ avvuyon sukum na heslepe nokum məs kəɗɗaŋ tam ɓa.]

Səŋga gagdak na Yesu ade di?

²⁷ Amilyoŋguk a Yerusalem. Əmpa, aka Yesu adabbal addəv Gəla na Maŋgəlva deyeɗe net məsdəlveŋge dit mərbaŋ-mahenziŋ gəm ɗiy məsɓet payaŋ azani.

²⁸ Aɓsənən na: Də gagdak na mi kədaɗɗe zəgeɗiŋ di? Nawa dupsuk gagdak naɗɗan vas di?

²⁹ Yesu aɓsit na: Wanəssohokum wən taka, məzlan suwa, asna wanənah sukum gagdak məs nədaɗɗe zəgeɗ vetis dəndənəŋka.

³⁰ Baptem na Yohanna sə disiŋ ade sa səzet ɗiyi? Məzlan suwa.

³¹ Atəŋgaŋgək əbayma a walaŋ zit dawnəh na: An mənahək na: Sə disiŋgi, wanah na: Ya vimi kətafnən ɓa di?

³² Mənah kan na: «Səzet ɗiy sa?» Ya tay əgeslne'eŋ sitin ɗiyi, vi ɗiy pak aɗiynək Yohanna ka məskəleŋ an gesiŋ.

³³ Ndəni azlan sənən Yesu aɓɗaŋ na: Məsən ɓa. Yesu aɓsit na: Naw pak nənah sukum na gagdak məs nədaɗɗe zəgeɗis dəndən ɓa.