Markus 10 - Bible en Guidar

Sə Galile a Yerusalem ( 10:1-52 ) Əyak na Yesu aka wən na uɗak dət gulku

¹ Adan Yesu asil sə təki nani, ambatək aka va na Yude, dəgar ki məlpa na Yurdeŋ. Ɗiy akkalaŋgək azan əmpa, ayagan sitik zəga va adaɗɗa ɗayɗayə.

² Farisaɗe azzoŋguk azani, assohõnənək vi kawla an nazani: Mbari di? Mahenziŋ appanək tive sən ɗəf dərɓəhətgən guluk nan sa?

³ Yaŋ Yesu azlani, aɓsit na: Mi Moyis aɗi sukum wən nan di?

⁴ Net aɓɗaŋ na: Moyis appanək tive nawver sət ɗerewel nappata, asna karɓəhta.

⁵ Yesu aɓsit na: Sən ɓəɓəl na mokrokumi aver sukum mahenziŋgiska.

⁶ Ya də wətəŋ na əzəməɗ na, ɗəf mizilin dət guluk Maŋgəlva aɗɗe.

⁷ Vi vaski ɗəf mizilin wappan afən dət mani, kawsap dət goni.

⁸ Ndəɗaŋ sulegit pak wakkpaŋgaŋ gəɓa zit taka, vaski assoŋ na sula əmpa ɓa ya gəɓa zit taka yi.

⁹ As kan na, ɗəf adawɗakan an Maŋgəlva asapan ɓa.

¹⁰ Ya eŋgil na, gewleɗ nan assohõnənək aka wən nan əmpa.

¹¹ Yaŋ anah sit na: An ɗəf appatək guluk nani, yaŋ akay maɓɓata, məkuh a gizbey azat akən maddaabəŋ.

¹² Vaski yi'e an guluk təppanək zəlta təgəmək ɗəf maɓɓani məkuh a gizbetə.

Yesu tay əɗɗa əzaɓ aket kirin memeɗeŋɗe

¹³ Ɗiy akiyaŋgək kirin sən Yesu vi dərəŋgitigəni, yaŋ gewleɗ nan ahãyẽtini.

¹⁴ Adan Yesu awle, gədəvən adəka, aɓsit na: Məppet kirin dəzzoŋ azawa, kədawteknin ɓa, vi məlĩ na Maŋgəlva tay viyit ɗiy en dəgilyoŋ va ndəɗaŋ.

¹⁵ Gesiŋ gesiŋ nədawnah sukum: An ɗəf dətaf məlĩ na Maŋgəlva va wiyən muzliya ɓa, sessel atoŋ na addəvən ɓa.

¹⁶ Adan allem kirin nek a makrani aɗiyək van aketi, aɗɗa sitik zəzaya.

Ɗəf məsarya

¹⁷ Adan Yesu adawmbat aka tive na, ɗəf adek dənze, akdukuk abani assohõnək na: Mərbəzəga moggoni, mi nədaɗɗa nərahgən zeŋgile an nassa hã faɗ di?

¹⁸ Yaŋ Yesu azlan sən na: Vimi kənah su na moggoko di? Ɗəf təttaka yi moggoni, Maŋgəlva yi.

¹⁹ Kəsinik mahenziŋɗe ɓa sa: Kədawbay gəbay ɓa, kədakuh a gizbe ɓa, kədawhal ɓa, kədawa wən aka ɗəf ɓa, kədaɗɗa vurum ɓa, agagdakan afuk dət moko.

²⁰ Yaŋ anah sən na: Mərbəzəga zəgeɗis pak nərmek far səka sawãwã.

²¹ Yesu awlak də wəŋgla, aɓsən na: Asna ambər sukuk zəga taka: Dok avəl zəga nok pakə, apsit məssehẽŋɗe, vasna wakərah arya məzaɓan a disiŋ. Asna kədegən əzbaw kana.

²² Adan aprəm əpeləska, ambatək gədəvən mədan vi məsarya yi diyɗa.

²³ Yesu abbalanək harani, aɓsit gewleɗ nan na: Tuwãhi məsaryeɗ dətoŋgoŋgən məlĩ na Maŋgəlva.

²⁴ Geslne armek gewleɗ aka wəpel nanəska, yaŋ Yesu azlani, aɓsit əmpa na: Kirtuwa tuwãhi ətoŋ məlĩ na Maŋgəlva sawɓa.

²⁵ Dəɗah zlogomo watoŋ dəmba lapina ki məsarya wətoŋ məlĩ na Maŋgəlva.

²⁶ Agəɗ sitik gərəŋ əmpa, yaŋ adawnahaŋ a walaŋ zit na: Ya naway nawɓap əkõh di?

²⁷ Yesu asəŋletike, aɓsit na: Azet ɗiyi wərəh nan tuwãhi, ya məza aza Maŋgəlva ɓa vi tay dəsan tuwãh aza Maŋgəlva ɓa.

²⁸ Yaŋ Piyer anah sən na: Awle namə, məppanək zəga pakə, məzbokuko.

²⁹ Yesu aɗiyman na: Gesiŋ nədawnah sukum: Ɗəf tay dəppan gəla nani, milmiŋgiɗin mezeŋgleket dit məguluŋgiti, mani, afəni, kirni awaniɓa guli nan aka wən nawa gəm aka Wən Neneke,

³⁰ məza ərah gəleɗe, milmiŋgiɗin mezeŋgleket dit məguluŋgiti, mãy mani, kirni, gulyo gəm əsərma təɓələn səkat addəv pay nanziya an kakaŋkəŋ ɓa ɓa. Ya addəv pay an dədazzani warəh zeŋgilen an faɗə.

³¹ Ɗiy diyɗa maddaabəŋ wakkpaŋgaŋ meddirɓe, en meddirɓe wakkpaŋgaŋ maddaabəŋ.

Yesu tay əpel mohokon aka əmta gəm əsilye nan səka əmta

³² Aka tive dawmbat a Yerusalem na, Yesu tay abeti, geslne' agulik gewleɗ nani, ɗiy en dədazbetin tam ageslne'eŋke. Yaŋ Yesu ande gewleɗ nan kəlaw kiyit sula nek əmpa, anah sit an dədawrəhən.

³³ Mənam tat əpeŋ a Yerusalem yaŋka, kapani Wətən Ɗəf avet deyeɗe net məsdəlveŋge, dit mərbaŋ-mahenziŋ. Watawwən wən namta akani. Wapsətin avet ɗiy-ɗarə.

³⁴ Wamasaŋ akani, watufoŋ mifɗe akani, waslərotəni, wabayəni. Ya dərɓaga əvoŋ hoku wasil səka əmta.

Əssõh net mãy Yakob də Yohanna

³⁵ Yaŋ Yakob də Yohanna kirtin Zebede azaraŋ aza Yesu, anah sənən na: Mərbəzəga, mam aka kəɗɗa səmgən zəga an mədassohõko.

³⁶ Yaŋ aɓsit na: Mi kəŋglaŋ nəgəɗ sukumgən di?

³⁷ Azlan sənənək na: Asugəm taka aka vok dəzəŋ, taka aka vok zlaɓay addəv gagdak noko.

³⁸ Yaŋ Yesu aɓsit na: Kəsənən an kədassohoŋ ɓa. Wakəɓapən wəsət huloŋguk na tatwãh məs nədawsa van sa? Awaniɓa ətaf baptem an nədawtafəŋ sa?

³⁹ Yaŋ azlan sənən na: Waməɓapa. Yesu aɓsit na: Wakəɓapən wəsət huloŋguk na tatwãh nawa, wakətafən baptem an nədawtafa.

⁴⁰ Ya wən nasa aka dəzəŋ naw awaniɓa aka zlaɓay naw na, intə naɗɗan ɓa. Tay viyit ɗiy en məzaɓan viti.

⁴¹ Səza gewleɗ meɓɓet kəlaw aprəmən vaska, gədivit adək aka Yakob də Yohanna.

⁴² Yesu aye pakə, amna: Kəsənənka, məs kədawlaŋ va məlyeŋge net ɗiy-ɗar watakən kiyit də gagay neti, ɗiy gugriɗ tamə tahəŋ ərbanən gagdak net aketi.

⁴³ Ya tay vas a walaŋkum ɓa. Ɗəf dəŋgəl nawsan metiŋ a walaŋkum dərəŋ na, dəsaŋgən məgəɗ wəza nokum.

⁴⁴ Ɗəf dəŋgəl nawsan ɗəf nabe sə walaŋkum dəsan balam nokum pakə.

⁴⁵ Vi Wətən ɗəf dəde ɗiy dəɗɗaŋ sənəngən wəza ɓa, ya vi dəgəɗgən wəza gəm kappan zeŋgilen vi kawbit ɗiy diyɗa.

Yesu tay əmbəlgən daŋgar Bartime

⁴⁶ Agapaŋgək a Yeriko. Adan adawgilyen sə Yeriko dit gewleɗ nani gəm ɗiy diyɗa, Bartime məŋgla, daŋgar, wətən Time tay ɗewwe aba tive.

⁴⁷ Aprəm na Yesu mə Nazaret dədawtoŋgo, ndən təŋ əŋzla vaŋvəl ənah na: Yesu Wətən Davit awəl sahã akawa!

⁴⁸ Ɗiy diyɗa ahãyãnənək dəɓətgəni, yaŋ adaŋzla vaŋvəl dayki lahəŋka: Wətən Davit awəl sahã kawa.

⁴⁹ Yesu ziw amna: Məya. Ndəɗaŋ dah əya daŋgar nak dawnah sən na: Asok zuko, asili, tay əyuko.

⁵⁰ Yas azgan lukut metiŋ nani, asil fol pay aza Yesu.

⁵¹ Yesu assohonəka: Mi kəŋgəl nəgəɗ sukugən di? Daŋgar azlan sənək na: Mərbəzəga nəŋgəl nərahgən ula.

⁵² Yesu aɓsən na: Doko, ətaf nok akõhgukko, Haran akoluk gətgətəs ləŋ, azbanək Yesu aka tive.