Markus 1 - Bible en Guidar

Ətəŋ na Alabara Neneke ( 1:1-13 ) Ərba wən na Yohanna məgəɗ baptem

¹ Ətəŋ na alabara nenek na Yesu Kristu Wətən Maŋgəlva.

² Vaŋki məverin addəv ɗerewel na məskəleŋ Isaya: In tat əslən maslən naw aboko, dəzaɓangən tive noko.

³ Ɗəf tay ənzla vaŋvəl a kapta-muyã: Məzaɓan tive na Daya, məzeɓet tiveɗ nan dəsoŋgən sarara.

⁴ Yohanna arbanək zəni, ndən məgəɗ baptem a kapta-muyã, tay ətəlma aka wən na baptem nawɗi marava vi navvuyon mambraya.

⁵ Ɗiy naka dələv na Yuda dit ɗiy na walaŋgəla na Yerusalem pak azzoŋguk azani, arahaŋgək baptem səvan a məlpa na Yurdeŋ, arbanənək mambray neti.

⁶ Yohanna aguluk lukut məɗɗan də deɗeke na zlogomo, aynanək dədakən də kətu, zəga nawzəm nan na heyɗeŋɗe gəm amama nawra.

⁷ Tay ətəlma ənah na: Ɗəf məs gbogboŋ day kiyu tay əzzan dərɓagawa: Nəgap nawɓe əpəl helege net hensek nan ɓa.

⁸ Naw dit iŋkile nəgəɗ sukum baptem, ya nani, wagəɗ sukum baptem də Zeŋgile Salala.

Baptem gəm əsla na Yesu məs məslani

⁹ Pay dəpaski Yesu ade sə Nazaret na Galile, arahək baptem səva Yohanna a Yurdeŋ.

¹⁰ Adan Yesu agil səret iŋkile leŋgə, awlak disiŋ akolko, Əmpəs aprikik akan va mukuɗuŋgulo.

¹¹ Wəla adek sə disiŋ na: Istə Wətu an na makrawa, in tat ənneken zu də is sawɓa.

¹² Əmpəs akak Yesu a kapta-muyã go'ləŋgə.

¹³ Asanək əvoŋ kaklaw poɗo a kapta-muyã, Satan tay əslani. Yesu tay dit sluɗe nawra, maslayɗe tay əɗɗaŋ sənən wəza.

Wəza na Yesu karet ɗiy a Galile ( 1:14—9:50 ) Yesu tay əye mərmaŋ kilif poɗo

¹⁴ Dərɓaga məzgan Yohanna məgəɗ baptem a fərsəna, Yesu alək a Galile, arbanək Wən Nenek na Maŋgəlva.

¹⁵ Amna: Pay agapka, məlĩ na Maŋgəlva go'oyi, məɗimarava, mətaf Wən Neneke.

¹⁶ Aka adaddan dəma pehe na Galile, awlak Simoŋ də məlmən an Andre, tay əzgaŋ zəva a pehe vi mərmaŋ kilfiŋgə.

¹⁷ Yesu aɓsit na: Məzbawa wanəkkpaŋgokum mərmaŋ ɗiyi.

¹⁸ Yaŋ appetin zəveɗe net ləŋ, azbanəni.

¹⁹ Adan ambat abe siɗikke, awlak Yakob wətən Zebede, də Yohanna məlməni, tahəŋ addəv bəlay əzeɓetin zəveɗe neti.

²⁰ Ayek go'ləŋgə, appanənək afit Zebede addəv bəlay dit məɗɗaŋ wəza, azbanənka.

Ɗəf məs ətem adawzəmgən sahã

²¹ Yaŋ Yesu dit gewleɗ nan aguloŋ a Kafarnahum. Adan pay naffet agapə, aguluk addəv gəla nakkal net mə Yudeɗi, agəɗək əyaka.

²² Ɗiy aggətaŋgək aka əyak nani, vi dəpel sit va net mərbaŋ-mahenziŋ net ɓa, tay əɗɗa əyak nan də gagdaka.

²³ Ɗəf məs ətem akan tay addəv gəla nakkal net Yudeɗ van daska, tay ənzla vaŋvəla.

²⁴ Tay ənah na: Mi aka walaŋgəm də is di Yesu mə Nazaret? Kəde na vi kawzam sa? Nəsənək nawa kənandi: Salala na Maŋgəlva.

²⁵ Yesu abay sənək gagay. Aɓsən na: Aɓətə, agil səkani.

²⁶ Ya ətem aɓlanək ɗəf nak diyɗa, aŋgəslək vaŋvəl dayadaya, yaŋ agil səkani.

²⁷ Ɗiy pak aggətaŋka, assohõnənək ma ziti aɓɗaŋ na: Mi aŋ di? Əyak meleketen də gagdaka, tay əɗi wən nan sit ətemɗe, yaŋ adaprəmən mani.

²⁸ Alabara nan atrayək aka dələv na Galile pak ləŋgə.

Yesu ambəlgitik məs gbəgbaɗe diyɗa

²⁹ Səza agulyoŋ səddəv gəla nakkal net Yudeɗ ləŋgə, ambataŋgək ana Simoŋ da də Andre dit may Yakob gəm Yohanna.

³⁰ Atən Simoŋ tat ɗuffo də gbəgba' na gamba, yaŋ apel sənən wən nat ləŋgə.

³¹ Adan azar azata, ndən vat kaw le'gəta. Gamba appatəka, Ndət ləŋ le' təŋ əpsit əzəma.

³² Adan moskoy agəɗə, pay atəpka, ɗiy akininik ɗiy məs gbəgbaɗe dit ɗiy mətemit pak aza Yesu.

³³ Ɗiy na walaŋgəla-metiŋ pak akkalaŋgək a maddamba.

³⁴ Yesu ambəlgitik məs gbəgbaɗe temtem diyɗa, arɓehetik ətemɗe səket ɗiy mitemit pakə, dəppet ətemɗe dəpeleŋgən ɓa, vi asənnənka.

Yesu tay əbbalan Galile

³⁵ Pumpum nani Yesu alvəɗək də mompumo pumu, ambatək amapoho takərgəni, akkamək adaka.

³⁶ Simoŋ dit məzəzbanən akayanənka.

³⁷ Adan arəhəni, aɓsənən na: Ɗiy pak tahəŋ əkayokuni.

³⁸ Yaŋ aɓsit na: Mədamsa a təki maɓɓan a walaŋgəleɗe en go'o go'o. Nətəlgən ma na Wən Nenek adak tamə, vini nəde.

³⁹ Yaŋ abbalan dələv na Galile baymani, apel addəv gəla nakkal net mə Yudeɗi, arɓehet ətemɗe.

Yesu tay əmbəlgən məskokolo

⁴⁰ Yaŋ məskokolo ade aza Yesu, akduk takpran afuŋ abani, akkamani, Aɓsən na: An kətafəka a kəɓap əmbəlguwa.

⁴¹ Yesu awələk sahã akani, atələk vani, arəŋgəni, aɓsən na: Nətafəka ambələ.

⁴² Kokolo azarək səza ɗəf van ləŋgə, ambəlka.

⁴³ Yaŋ Yesu abay mani, arɓahanək go'ləŋgə.

⁴⁴ Aɓsən na: Awle kədawnah sən ɗəf ɓa. Ya dok ərban zuk aza məsdəlva, gəm aɗɗa əvəl aka wən na əbbur nok va Moyis aɗi wən nani, vi dəsənnəngəni.

⁴⁵ Ya adan ambatə, atəŋgək ətəlma nan sawɓa gəm əppasan wən nani, hã Yesu dərah ətoŋ a walaŋgəla-metiŋ kerekere ɓa, yaŋ asan amapoho a kapta-muyã. Ɗiy əzzoŋ azani səŋga səŋga pakə.