Malakiya 3 - Bible en Guidar

¹ Yaŋ in tat əslən maslən nawa. Wazaɓan tive abawa. Gurzik na watoŋ addəv gəla na Maŋgəlva, mərbəzəga an kədawkayanəni, maslay na wənmiyna an kəŋglaŋgi, yaŋ əzzani, Yawe Məzuɓappak anahə.

² Naway nawɓap pay nazza nan di? Naway nawsan ziwwe pay adarban zən di? Vi tay va offo məzuhə̃s zəga, va sapuna na məzəskoɓo.

³ Wasan ɗew əhə̃s təbəz babara gəm əɗawani. Wabbur kirtin Levi. Wakkpeŋget salala va adakkpaŋganən meleŋge gem təbəz babara. Wassoŋ sən Yawe ka məkiyaŋ sənən əvəl də tiveni.

⁴ Əvəl na Yuda gəm na Yerusalem wasan moggon aza Yawe va aka pay na maguwa, va aket wəsvaɗe en lahəŋka

⁵ Wanədder azzokum vi kawtaw wəna. Wanəsaw məziwe nawgəm zən əpel aket məɗɗaŋ tetele, aket məkuwa a gizbe, aket əswayɗe na tepelke, aket ɗiy məzutakən hanza na məgəɗ wəza, nat gagəbaya gəm na mitiwe, məzəzəmgənən sahã na molhõyõ gəm en awgeslne'eŋ suwən ɓa, Yawe Məzuɓappak anahə.

Əmilye aza Yawe

⁶ Vi in Yawe, nəddəɗ ɓa. Ya nokum, mənokum kirtin Yakob məgrakumi ɓa.

⁷ Təŋ səza pay net efiŋgiɗkum, kəmzlahaŋgək səzet meheŋziŋɗe nawa, kəzbetin ɓa. Mimil azawa, wanəmil azokum Yawe Məzuɓappak anahə. Mənokum ənahaŋ na: «Mbarmbari mədawmilye di?»

⁸ Ɗəf waɓap əmakan Maŋgəlva sa? Ya mənokum tat əmbəɗawəni! Mənokum ənahaŋ na: «Dəɗɗa miy məbəɗɗok di?» Də taka səddəv kəlaw gəm an mətawən nawfaɗ pakə.

⁹ Əray tay akokumu, yaŋ kədawmbəɗawəni, mənokum ɗiy pakə!

¹⁰ Məki makəlaw zəga nokum pak addəv gəla nawzaɓa. Zəga nawzəm dəsangən addəv gəla nawa. Əŋga məslu kan aka wənəska, Yawe Məzuɓappak anahə, kulanəŋgən an kpak nəkol ma disiŋ vikum də wəɗɗa zazay akokum diyɗa ɓa.

¹¹ Wanətak zəga məzəm guli nokum, araygən na zəga na guli nokum ɓa gəm guli na megezlembirke nokum asan na ndarzlay ɓa, Yawe Məzuɓappak anahə.

¹² Ɗiy na guw pak wanah sukumən na, məs zazay aketi, vi dələv nokum nanneki yi, Yawe Məzuɓappak anahə.

Pay Maŋgəlva adarban təstəs nani

¹³ Əpel nokum akaw ɓəli, Yawe anahə, yaŋ kəɓɗaŋ na: «Əpel mi məpel awalaŋ zəm akok di?»

¹⁴ Mənokum tat əɗɗumoŋ na: «Əɗɗa wəza sən Maŋgəlva na ɗari; ərəh mi aza ərma mahenziŋ nani adan mənam tat ədaw na sahã aba Yawe Məzuɓappak di?

¹⁵ Kakaŋ na, wamənah na zazay aket ɗiy məɓaygənən kiziti. Məsdarawɗe pak tay əɓayaŋgə; an aslannək naza Maŋgəlva na, tay əkõhoŋgu.»

¹⁶ Vaski məzəgeslne' sənən Yawe adazgan meŋ a walaŋ ziti. Yas Yawe apak sləman aprəməka. An məɗɗumon tay məverin addəv ɗerewel aban aka wən net ɗiy məgeslne'eŋ sənən Yawe gəm məzəɗɗumon aka iya nani.

¹⁷ Aka pay an nəɗi na, wassoŋ kanawa, va zəga an naw nawray vawa, Yawe Məzuɓappak anahə. Wanətir va ɗəf adawtər wətən məgəɗ sən wəza.

¹⁸ As na wakulanən uɗak awalaŋ ɗəf an təstəsə də məsdaraw, awalaŋ ɗəf məgeɗ sən wəza sən Maŋgəlva gəm ɗəf an awgəɗ sən ɓa.

¹⁹ Vi pay an tatwãh məzuzla va offo a gulo tay əzzan yaŋka. Ɗiy məɓaygənən kiziti dit məsdarawɗe pak wassoŋ va tərɗa. Pay an dədazzanəs wazle, Yawe Məzuɓappak anahə. Apəl sit na slalwayit ɓa kiyvet ɓa.

²⁰ Nokum mənokum məzugeslne'eŋ sənən iya nawa, təstəs naw wagil va pay adawgilye, kawkisukum əmbla addəv təlni. Wakəgilyoŋgu gəm wakəpepɗekeŋ va kirtit wasliɗe məs məzgəleɗi.

²¹ Wakəndepetin məsdarawɗe, vi wassoŋ va moŋglo ammba təlkum addəv pay an nəɗiyəŋka, Yawe Məzuɓappak anahə.

Əmilye na Eliya

²² Məɗɗumon mahenziŋ na Moyis məgəɗ wəza nawa, məs nəpsən mahenziŋɗe gəm wəsərək ammba Israyel pak a Horeb.

²³ In tat əslən sukum Eliya məskələŋ yaŋka, tak əzza na pay na Yawe, pay metiŋgin nawgeslne' səni.

²⁴ Wakkpaŋgan makret efiŋgiɗit kirin aket kirtiti, en net kirin aket efiŋgiɗti vi nədazzaw əzan dəlvafuŋ kakãh ɓa.