Malakiya 2 - Bible en Guidar

Wəsəɓ sit məsdəlveŋge

¹ Məsdəlveŋge, kakaŋ wən məɗiynəŋ sukumi:

² An kaprəmaŋ ɓa, an karmanən wən nagagdakan iya naw təstəs a mokrokum ɓa, wanəki əray akokum gəm əraygən əzaɓ nokum Yawe Məzuɓappak anahə. Gesiŋ, nəraygit na vi ɗəf tay məzərma zəga a makran səmbokum ɓa.

³ In yakəŋkə wanəka ədagədəv naw aka uwa nokum. Wanədol sense arokum, sense net zəgeɗ net wəzləreɗ nokum; kawndəkumi sap dənɗaŋ pakə.

⁴ Wakəsənən na wən nəɗiyəŋ na sukumi vi wənmiyna naw də Levi dəsangən gəsiŋ, Yawe Məzuɓappak anahə.

⁵ Wənmiyna naw dəndən na ndəni zeŋgile gəm zazaya, vini nəpsinke gəm əɓe'e dəɓe'sugəni, akkerik aba iya nawa.

⁶ Əpel təstəs tay amani, uwawən tay ammba harzlumun ɓa. Tay ədaw də in addəv zazay gəm addəv təstəsə, amilgitik ɗiy diyɗa səddəv mbərayən.

⁷ Gesiŋ nan na, əsən tay a ma məsdəlva, wəzga' an təstəs tay a barani vi ndəni maslən na Yawe Məzuɓappakə.

⁸ Nokumu, kəmzlahaŋgək dərəŋ səka tive. Kəzlzleɓetinik ɗiy diyɗa də əyak nokum. Kəraygənək wənmiyna na Levi, Yawe Məzuɓappak anahə.

⁹ Naw tamə wanəkkpaŋgokum ka nawzel ɗar a maheret ɗiyi, vi kazbanən tive naw ɓa gəm mənokum tat ərban uɗak awalaŋkum.

Tive temtem sula nawraygən wənmiyna

¹⁰ Afəm takay ɓa sa? Maŋgəlva taka dəzəməɗəm ɓa sa? Vimi mədazəm ki zəm əraygən wənmiyna net efiŋgiɗəm di?

¹¹ Yuda azəmək kiya. Məɗɗay zəga daryaw a Israyel gəm a Yerusalem. Gesiŋ Yuda araygənək təki salala na Yawe, də əŋgləwət gəm əɗiyət wətən məzbə maŋgəlva maɓɓani.

¹² Ɗəf dədaw vaska, kəta Yawe dəzani, ndəni, kirtini gəm gəla nan səweleŋgit kirtin Yakob də ɗəf an dədawki əvəl sən Yawe Məzuɓappak də iya nan zlaŋgə.

¹³ Aŋki, məs kədaɗɗaŋ masula'ən: Mənokum tat əlɓan matuya na Yawe dit sin nokum, əhəma gəm əŋɗəsa, vi Maŋgəlva tay əzga sləma aka əvəl ɓa gəm aŋgla ətaf əvəl səvokum ɓa.

¹⁴ Mənokum ənahaŋ na: vi miyi vas di? Vi Yawe asanək miziwe awalaŋguk dət guluk na gawloko, yaŋ kərbə sət wili. Məzəbbah noktə kəta, guluk na wənmiyna noktə!

¹⁵ Ya Yawe ɗəf təttaka agəɗə, gəba zən məzəɓla vi əmpəs na zəŋgile assan addəvən ɓa sa? Ɗəf taka van madawkayan di? Uwa məs Maŋgəlva aynan wən nan napsən sa? Məga kiykum. Kədarbə sət wil sət guluk na gawlok ɓa.

¹⁶ Vi Yawe, Maŋgəlva na Israyel azelik əppa guluku va azel ɗəf dərnokon lukut nan də əgaya, Yawe Məzuɓappak amna, məga kiykum. Kədarban wil sən ɗəf ɓa.

Ətawwən na Maŋgəlva gəm mbəlembəle nani ( 2:17—3:24 ) Yawe tay əslən maslən nani

¹⁷ Mənokum tat əyan Yawe də əpel nokum. Mənokum wənahaŋ na: «Də mi mədawyan di?» An mənokum tat ənah na: «Ɗəf dəgəɗ mbərayən pak na moggoni a mahara Yawe vi tay əzga sləma aket ɗiyiski» awaniɓa «Ŋgay Maŋgəlva mətaw wən di?»