Luka 9 - Bible en Guidar

Əslən net gewleɗ kəlaw kiyit sula

¹ Yaŋ Yesu akkelet gewleɗ kəlaw kiyit sula, apsitik gagdak gəm gbogboŋ narɓih tuyeŋɗe gəm nanzaɗ gbəgbaɗe.

² Aslinik ərban wən na məlĩ na Maŋgəlva gəm əmbəlgit məs gbəgbaɗe.

³ Aɓsit na: Kədawgəmaŋ zəga ka na tive ɓa, zleŋge ɓa, gabal ɓa, zəga nawzəma ɓa, deleɗ ɓa, mãy naway pak əgəm lukut sula ɓa,

⁴ addəv gəla an məs kətoŋgoŋ pak məssoŋ adak hã gap pay nawmbat nokum.

⁵ An mətafkumi a walaŋgəla-metiŋ van ɓa, məgil sə walaŋgəla-metiŋ nani, məttu hologudum səza təlkum dəsangən va zəga narba aketi.

⁶ Agilyoŋko, azbetinik walaŋgəleɗe, arbanənək alabara neneke, ambəlgitinik məs gbəgbaɗe.

Əttap na Herodə

⁷ Adan Herodə daya na dələv aprəm alabara net zəgeɗ en dədaɗɗaŋ pakə, attapəka. Vi ɗiy meɓɓet tay ənahaŋ na: Yohanna dəsil səka əmta.

⁸ Ɗiy meɓɓet tamə aɓɗaŋ na: Eliya dərban zəni. Yaŋ əmpa ɗiy meɓɓet aɓɗaŋ na: Taka səret məskəleŋɗe en far dəsil səka əmta.

⁹ Yaŋ Herodə amna: Intə nərsla ki Yohanna. As ɗəf naŋgay məs nədaprəm əpel wən vas akanəŋ di? Yaŋ akay tive kawlani.

Yesu tay əzəmgit ɗiy gabal sle'i

¹⁰ Maslənɗe amilyoŋko, anah sənənək an məs aɗɗaŋ pakə. Andek takərgiti, ambataŋ a walaŋgəla-metiŋ məs adawyaŋ na Betsayda.

¹¹ Ɗiy pak aprəmnənka, azbanənka. Yesu atefike, apel sitik alabara na məlĩ na Maŋgəlva, ambəlgitik ɗiy en də wəray nawrəh əmbla.

¹² Adan pay go'oy aza ətəpa, gewleɗ kəlaw kiyit sula nek azaraŋgək azani, aɓsənən na: Anah sit ɗiy dəmbataŋ kəla weleŋgit gəleɗe, dərəhaŋgən təki nawdik gəm zəga nawzəma, vi aŋ a kapta-muyã mənani.

¹³ Yesu aɓsit na: Munokum van məpsit əzəma. Yaŋ azlanən na: Məday ki meptekeɗ sle' gəm kilif sula tay avam ɓa kuzuŋ an kəŋgələk məlgən məlbahgən zəga nawzəm sit ɗiyiŋ pak kan soko?

¹⁴ Vi zel vet wassoŋ zəga na gabal sle'i. Yaŋ Yesu anah sit gewleɗ nan na: Mənah sit dəssoŋgən ŋgbimŋgbim kaklaw sle sle'i.

¹⁵ Aɗɗanənək vaska, asugitinik pakə.

¹⁶ Yesu agimik meptekeɗ sle' dit kilif sula neki. Aslanək haran a disiŋ agəɗək soko sən Maŋgəlva aketi, yaŋ arɗeti, apsit gewleɗ nan vi duɗekningin sit ɗiyi.

¹⁷ Ndəɗaŋ pak azəmaŋka, abaŋgək beymeti. Akkalanənək an dəmbərə, agəɗək gadagarɗe kəlaw kiyit sula.

Piyer tay ərban na Yesu iyi Kristu

¹⁸ Yaŋ pay maɓɓani Yesu asan bitte əkkama, gəm gewleɗ nan azani. Assohẽtike: Ka nawa ɗiy adawɗiwən di?

¹⁹ Azlanənka, aɓɗaŋ na: Azet ɗiy meɓɓet Yohanna məgəɗ baptem kənani, azet en meɓɓeti Eliya, en meɓɓet tamə taka neret məskəleŋɗe en far dəsil səka əmta.

²⁰ Yaŋ aɓsit na: Ya nokum nawa nan kədawnahaŋ di? Piyer agəm əpel amna: Istə Kristu na Maŋgəlva.

Yesu tay ərban əmta gəm əsilye nan səka əmta

²¹ Yaŋ Yesu abay meti, aɗi sit wən nan ka adawnah sənən ɗəf ɓa.

²² Yaŋ amsak ənah na, aslək Wətən Ɗəf dəzəmgən sahã diyɗa, ɗiy məsɓeti, deyeɗe net məsdəlveŋge gəm mərbaŋ-mahenziŋ wazganəni, kawbayni, ya wasil səka əmta də əvoŋ mahokoni.

²³ Yaŋ anah sit ɗiy pakə. An ɗəf aŋgələk wəzbawa, dəppan əɗɗum aka zəni, dəgəmgən wəlaŋga məzliwrihe nan pay pakə, dəzbawgəni.

²⁴ Vi ɗəf an dəŋgəl əkõhgən zeŋgileni wazani. Ya məs dəzan zeŋgilen aka wən nawa, nan wakõhgəni.

²⁵ Mi adawtər sən ɗəf an arəhək mammba dələv gboŋ ka nan an azəka awaniɓa azanək kiyən zən di?

²⁶ Vi an wil adanənək ɗəf viwa awaniɓa vi əpel nawa, Wətən Ɗəf wagəɗ wil aka wən nan pay adazzan addəv gagdak nani, an na Afəni gəm net maslayɗe en salala.

²⁷ Gesiŋ gesiŋ nədawnah sukum ɗiy meɓɓet tahəŋ awalaŋgit ɗiy en dəssoŋ aŋkiŋki, sessel amtaŋ na tak dulanən məlĩ na Maŋgəlva ɓa ɓa.

Yesu akkpaŋganək zəni

²⁸ Əvoŋ dədopoɗo dərɓeget alabaraɗeski, Yesu agəmək Piyer, Yohanna gəm Yakob apeŋ aka mossorgo metiŋ vi kakkama.

²⁹ Aka adakkama, məɗa haran akkpaŋka, lukut nan akkpaŋgək babar ndaslə.

³⁰ Ɗiy yeŋ sula əpeleŋ dəndəni, mãy Moyis də Eliya əŋgə.

³¹ Arbaŋgək addəv gagdaka, apeleŋgək aka ədda nan məs dədaɗɗa a Yerusalem.

³² Sin armeninik mãy Piyer dit ɗiy en dəndən pakə, adan afɗahaŋgə, awlanənək gagdak na Yesu dit zel sula məs dəziweŋ dəndəni.

³³ Aka ɗiy vet adawɗakaŋ dəndəni, Piyer aɓsən Yesu na: Mərbəzəga moggoni məsamgən aŋka. Məzaɓsəm gizlirkeɗe hoku, taka viko, taka vi Moyis, taka əmpa vi Eliya, dəsən məs adawpel ɓa.

³⁴ Aka adawpel vaska, slaybuwən adeke, agulke. Ageslne'eŋke aka slaybuwna adawgulti.

³⁵ Wəla adek səddəv slaybuwna naka, amna: Aŋki Wətu məs nəweli, məprəm mani.

³⁶ Səza wəla aprəmə, ɗəf tay abbər Yesu takərgəni. Aka dəpas na gewleɗ assoŋgu ɓataɓata'ə, ɗəf tay məs apeləŋ sənən wən net zəgeɗ məs awlaŋ ɓa.

Yesu tay əmbəlgən wiyən məs əmpəs mbərayən akani

³⁷ Vit pumpum nani, səza aprikeŋ səka mossorgo metiŋ, ɗiy diyɗa azzoŋguk ələm sən Yesu.

³⁸ Yaŋ ɗəf aŋgəzl vaŋvəl sə weleŋgit ɗiy dawnəh na: Mərbəzəga nəkkamokuko, azi horok aka wətuwa, vi ndəni uwa naw gəɗeŋgəɗeŋ.

³⁹ Tuya ərmani, ndən əŋzla vaŋvəl girziki, ndən əɓirzliwgin də masla amani, ndən əgilyen səka sahãsahã, əppan londor.

⁴⁰ Nəkkametik gewleɗ nok dərɓahanəngəni, ya dəɓapən ɓa.

⁴¹ Yesu agəmək əpel amna: Sayit ɗiy məs tahəŋ də ətaf ɓa gəm məreygiti, hã gap dewe nədawsan amoŋgovokum di? Pay gbəgbari nədazban əɓəskum di? Aki wətuk van aŋka.

⁴² Aka dəɓəl əgap azan ɓa, tuya aslbaka, aɓlanək diyɗa. Yaŋ Yesu ahayãn əmpəs mbərayən naka, ambəlgən wiyən vani, amndagan sən afəni.

⁴³ Ɗiy pak aggətaŋgək aka memetiŋ na Maŋgəlva. Adan ɗiy pak aggətaŋ aka an məs agəɗə, aɓsit gewleɗ nan na:

Yesu tay əmsak ərban wən na əmta nani

⁴⁴ Məprəm an məs nədawnah sukuməŋ lewlewi. Kapsəni Wətən Ɗəf avet ɗiyi.

⁴⁵ Ya gewleɗ nan Net aprəmnən gabba əpeləs ɓa, asan sitik məɗamən vi adaprəmnən gabba əpel van ɓa. Adawgeslne'eŋ dassohoni.

Naway dəday di?

⁴⁶ Yaŋ əɗɗum adazzan aket na, naway nawsan daya səret di?

⁴⁷ Adan Yesu asənək əɗɗum na mekreti, ndən muzliya gəm, aziwgin a maŋgavani,

⁴⁸ aɓsit na: Ɗəf dətaf muzliyaŋ aka iya nawa, anaw atafə; an dətafwa, ɗəf an dəslənu atafə; vi an muzliya faɗ nammbokum pakə, ndəni daya.

Ɗəf an dəzelkum ɓa nokumi

⁴⁹ Yaŋ Yohanna azlani, amna: Mərbəzəga, mulak ɗəf tay ərɓəh tuyeŋɗe də iya noko. Ya mətakəka, vi tay əzbok də mənam ɓa.

⁵⁰ Yesu azlan sənəka: Kədawtakənən ɓa, vi ɗəf an dəzelkum ɓa, nokumi.

Sə Galile a Yerusalem ( 9:51—19:27 ) Walaŋgəla na Samari dəŋgəm ətaf Yesu ɓa

⁵¹ Adan pay nawmbat na a disiŋ go'oy, aynanək wən nan a makran ɓəlɓəl naddan a Yerusalem.

⁵² Aslinik maslənɗe abani. Səza addoŋgu, atoŋgoŋguk a walaŋgəla net mə Samari vi kawzaɓan təki nawteh nani.

⁵³ Ya mətafni ɓa vi aziyək haran əmbat a Yerusalem.

⁵⁴ Adan Yakob də Yohanna awlanən vaska, aɓɗaŋ na: Daya wakəŋger məssohgən offo dəprigən sə disiŋ dəhhitgin sa?

⁵⁵ Yaŋ Yesu akkpaŋganək harani, ahayẽti.

⁵⁶ Yaŋ ambataŋ a walaŋgəla maɓɓani.

Ɗiy məs dəŋglaŋ əzban Yesu

⁵⁷ Aka adaddoŋ tive tive, ɗəf maɓɓan aɓsən na: Wanəzbok a təki kədaddok pakə.

⁵⁸ Yesu aɓsən na: Balwayɗe tahəŋ dit vovɗe, biŋgeɗ tahəŋ dit gəleɗe. Ya Wətən Ɗəf na, tay də təki nawvoŋ naffeten zən ɓa.

⁵⁹ Aɓsən ɗəf maɓɓan na: Azbawa. Ɗəf nak aɓsən na: Daya apəl su tive ndaw əndək əbba tagay.

⁶⁰ Yesu aɓsən na: Appet ɗiy mimtit dəndikin mimtit neti, nok dok ərban məlĩ na Maŋgəlva.

⁶¹ Ɗəf maɓɓan əmpa aɓsən na: Daya wanəzboko ya apəl su tive nəmbat tagay ənah sit ɗiy na nawda na, naw nəmbatək kana.

⁶² Yesu aɓsən na: ɗəf awan di pak dəɗi van aka bardaw, yaŋ adawla dirɓe, dəslə aza məlĩ na Maŋgəlva ɓa.