Luka 7 - Bible en Guidar

Yesu tay əmbəlgən gawla na daya net məzəlpaŋ mə Rom

¹ Adan Yesu agrak əpel wən sit ɗiyi, ndən toŋ a Kafarnahum.

² Daya net məzəlpaŋ na Rom tay də gawla nan məs aŋgəl diyɗa gbəgba'a, go'i namta.

³ Adan aprəm wən na Yesu, aslinik ɗiy məsɓet net mə Yudeɗ azani vi kakkaman dədegən əkõhgən gawla nan naka.

⁴ Adan azzoŋ aza Yesu, akkamanənək sawɓa, aɓɗaŋ na: Aslək kəbbah səngəni,

⁵ vi aŋgliwik ɗiy namə, ndən dərka səm gəla nakkala.

⁶ Yaŋ Yesu ambat dənɗaŋ. Adan agap go'o də gəla, daya net məzəlpaŋ nak aslin bayneŋgiɗin aɓsənən na Mərbəzəga kəyan zuk ɓa, vi nəgap kətoŋgən a nawda ɓa.

⁷ Vi vaski, nula zu na nəgap nawmbat azok dəvaw ɓa. Apel wən təttaka gawla naw wambələ.

⁸ Vi naw ammba təl ɗəf gagdak nani, məzəlpaŋ tam tahəŋ ammba təlwa. An nənah sənək aŋka: Doko, ndən əmbata; sən maɓɓan na: Ade, ndən əzzani; sən balam nawa: Aɗɗa vana, ndən əɗɗani.

⁹ Adan Yesu aprəm wənəska, aggətək aka wən nani. Yaŋ akkpaŋgə, aɓsit ɗiy məzəzbanən na: A weleŋgit mə Israyelɗe zlaŋ nərah ətaf zev aŋ ɓa.

¹⁰ Yaŋ maslənɗe amilyoŋ eŋgili, arəhənək balam nak ambəlka.

Yesu tay əmbəlgən wətət gagəbaya

¹¹ Səɓɓan na Yesu ambat a walaŋgəla məs adawyaŋ na Nayin. Gewleɗ nan dit ɗiy diyɗa ambataŋgək dəndəni.

¹² Adan agap gba a maddamba na walaŋgəla-metiŋ, daka ɗiy tay əkaŋ ɗəf məmtəni, taka yi avat mani, ndət vatə ga gəbaytə. Ɗiy diyɗa sə walaŋgəla-metiŋ tahəŋ dəndəta.

¹³ Adan Daya awləta awələk sahã akata amna kədawhəm ɓa.

¹⁴ Yaŋ ambat arəŋgən kes na gəbay vani. Ɗiy məzuslanən aziweŋgi. Yesu amna: Gawla, in tat ənah suko: Asili

¹⁵ Yaŋ ɗəf məmtən nak asil ɗewi, atəŋ əpele. Yaŋ Yesu apsət mani.

¹⁶ Ɗiy pak ageslne'eŋke, agagdakanənək Maŋgəlva, aɓɗaŋ na: Məskəleŋ metiŋgin arbanək zən awalaŋmə, Maŋgəlva adek əbbah sit ɗiy nani.

¹⁷ Alabara na Yesu atrayək aka dələv na Yude də aka kivadələv van tərwəslə.

Maslənɗe na Yohanna Məgəɗ baptem

¹⁸ Yaŋ gewleɗ na Yohanna anah sənən wən nan pakə. Yaŋ Yohanna ayə ɗiy sula sə weleŋgit gewleɗ nan neki.

¹⁹ Aslin aza Daya dawnəh na: Istə məs nazzokuŋ sa, awaniɓa məga ɗəf maɓɓani?

²⁰ Adan agapaŋ aza Yesu, aɓsənən na: Yohanna məgəɗ baptem dəslənəm azok əssohok na: Istə məs nazzokuŋ sa awaniɓa məga ɗəf maɓɓani?

²¹ Daka aka dəpas na Yesu tay əmbəlgit məs gbəgbaɗe diyɗa də gbəgba' temtemi, mãy ɗiy mətemti, akoluk heret deŋgerɗe diyɗa.

²² Yaŋ azlan sit maslənɗe na Yohanna nek na: Məddoŋ mənah an kəprəmaŋ də an kulaŋ sən Yohanna: Deŋgerɗe tay ulaŋgə, vədalɗe tay ədawaŋgə, məskokoleɗ abburoŋko, goryomɗe mərma hərzlumit tay əprəmaŋgə, ɗiy mimtit asilyoŋko, məs sahẽŋɗe tamə tay əprəmnən Wən Neneke.

²³ Əzaɓ aka ɗəf an məs nəsaw sən ka zəga nazbərgən ɓa.

²⁴ Səza maslənɗe na Yohanna addoŋgu, Yesu təŋ əpel wən na Yohanna sit ɗiyi, amna: Mi kəddoŋ ula a kapta-muyã di? Eflere məs səmyã adaɓlan sa?

²⁵ Ya mi kəddoŋ ula kandi? Ɗəf dəgul lukutɗe na sləma sa? Ya ɗiy en dit lukutɗe mogget na sləma anet milyẽŋge da adassoŋgu.

²⁶ Ya mi kəddoŋ ula kandi? Məskəleŋ sa? In tat ənah sukum: Gesiŋ məday ki məskəleŋgi.

²⁷ Ndəni an məs məverin apel akani: In tat əslən maslən naw aboko, an dədawzaɓan tive nok səboko.

²⁸ Gesiŋ nədawnah sukum: Səwalaŋ uwa net gil pak tay an məs dəday ki Yohanna ɓa, ya an muzliya naddəv məlĩ na Maŋgəlva adayək kini.

²⁹ Ɗiy dit məkkalaŋ nzalaka dəprəmən pak, asənnənək təstəs Maŋgəlva, atafənək baptem na Yohanna.

³⁰ Ya Farisaɗe dit mərbaŋ-mahenziŋ, azganənək əŋgla na Maŋgəlva, dətafnən baptem səvan ɓa.

³¹ Yesu anah na: Də mi nədawsla ɗiy na sayəŋ di? Va naway agilyoŋ di?

³² Agilyoŋguk va kirin dəssoŋ a təki nakkala, tahəŋ əyanən zit ənahaŋ na: Məffon sukumək pozloro, kəskəlaŋ ɓa, məyə sukumək gəlya na gəlabaya, kəskaŋ morkoyo ɓa.

³³ Vi Yohanna məgəɗ baptem adeke awzəm way ɓa, awsa mbazla ɓa, yaŋ kəɓɗaŋ na mətemni.

³⁴ Wətən Ɗəf adeke, tay əzəma, tay əsa, kəɓɗaŋ na: Ɗəf məs golvoŋ yaŋka, məsə mbazla, baynet məkkalaŋ nzalaka gəm məɗɗaŋ mambraya.

³⁵ Ya maɗula arbək təstəs dit wəzeɗe nani.

Yesu tay ana Simoŋ mə Farisa da

³⁶ Yaŋ mə Farisa maɓɓan aya vi kawzəm dəndəni. Yesu ambatək kan eŋgil ana mə Farisa da naka, asanək əzəma.

³⁷ Guluk məs mambray tat a walaŋgəla-metiŋ nani. Adan təprəm na Yesu tay əzəm eŋgil ana mə Farisa da, təkiyək bəbər na tursan na nard məknəhən addəvən.

³⁸ Təziwik dərɓaga Yesu ammba təlni. Tat əhəma, hã təlɓanək təl Yesu dit sin nata, yaŋ təkəlɓit də muhur kiyta, tətuwəɗək tələn, təggbo' sənək tursan azani.

³⁹ Adan mə Farisa məs dəya nak awla vaska, aɗɗumuk a makrani: Va ɗəfəŋ məskəleŋgi na, kəta wasən na nawattə guluk məzurəŋgən kəŋ di, gəm an təsata: məs mambray tə.

⁴⁰ Yaŋ Yesu azlani, aɓsən na: Simoŋ, wən tay a maw nawnah suko. Simoŋ azlan sənək na: Apeli, Mərbəzəga.

⁴¹ Yesu amna: Ɗəf maɓɓan tay də dəmən nan aket ɗiy sula. Ɗəf an taka suleyɗe səkat sle. Ɗəf maɓɓan tam suleyɗe kaklaw sle.

⁴² Adan tahəŋ də zəga nawfaɗən ɓa, apan sitike, ndəɗaŋ sulegit pakə. Naway dədaŋgluwən day kan səmmbet di?

⁴³ Simoŋ azlanka, amna ɗəf an də dəmən akan dayəŋki. Yesu aɓsən na: Kətawək wən nan təstəsə.

⁴⁴ Yaŋ Yesu akkpaŋgan haran akat guluk nakə, aɓsən Simoŋ na: Kulətək guluk kəŋ sa? Nətoŋguk eŋgil anok da, kəvay iŋkile nawɗa təlu ɓa, ya nata təlɓanək də sin nata, təɗanək də muhur kiyta.

⁴⁵ Kəvoŋgən kiyuk azaw ɓa, ya nata səza nətoŋ anokda, təppan əppayan təlu ɓa.

⁴⁶ Kəppay sən mẽl na tursan sən kiyu ɓa, ya nata, təggbo'uk tursan aka təlwa.

⁴⁷ Vini nədawnah suko: Mambray nat ɗiyɗaŋka avviko vi əŋgla nat diyɗa yi. Ya an məvvuyon sən siɗikke, əŋgla nan siɗikke yi.

⁴⁸ Yaŋ anah sət guluk nak na: Mambray nok avvuyko.

⁴⁹ Məzuzəmaŋ dəndən atəŋgaŋgək ənahaŋ də makreti, aɓɗaŋ na: Naway aŋ van hara navvuyon mambrayəŋ di?

⁵⁰ Yesu anah sət guluk nak na: Ətaf nok akõhgukko, dok zayə.