Luka 6 - Bible en Guidar

Yesu gəm pay naffete

¹ Adan Yesu adawtoŋ dəddəv guli na haykəmari pay naffet dit gewleɗ nani, gewleɗ nan aŋzlaŋgək kiyən, asurotənək aza veti, ampərəni.

² Farisaɗe meɓɓet aɓsitin na: Vimi kədaɗɗaŋ zəga an məppani tive naɗɗan pay naffet ɓa di?

³ Yesu azlan sitike: Kəŋɗanən ɗah an Davit agəɗ aka mãy ada ndən dit ɗiy en dəssoŋ dəndən ɓa sa?

⁴ Atoŋguk addəv Gəla na Maŋgəlva, agim memteke mipsin sən Maŋgəlva azəmə, apsitik ɗiy dəssoŋ dəndəni. Ɗəf tay də tive nawzimit abbər məsdəlveŋge kaka ɓa ɓa.

⁵ Yaŋ aɓsit na: Wətən Ɗəf van afən pay naffeti.

Ɗəf va məmtəni

⁶ Yaŋ pay naffet maɓɓan əmpa, Yesu atoŋ addəv gəla nakkal net Yudeɗi, atəŋ arbə wəna. Ɗəf məs van dəzəŋ məmtən tay adaka.

⁷ Mərbaŋ-mahenziŋ dit Farisaɗe tay ətaɗən Yesu kuzuŋ wambəlgən ɗəf pay naffete, vi kawkay tive nawrah sən heslepe.

⁸ Ya nan asənək əɗɗum neti. Aɓsən ɗəf va məmtən nak na: Asili, aziw addak təkiya, ndən le' ziw.

⁹ Yaŋ Yesu aɓsit na: Nəssohõkum ɗa: Awani məppan tive naɗɗan pay naffet di? Əɗɗa wəza moggon sa awaniɓa wəza mbərayəni? Əkõhogən zeŋgile ɗəf sa, əzani?

¹⁰ Abbalanək haran aket kiyən suləkə, yaŋ aɓsən ɗəf nak na: Appar voko. Apparəka, van nak ambəlka.

¹¹ Yaŋ gidivit adə, atawanən an adawgəɗ sənən Yesu.

Yesu tay əwel maslənɗe kəlaw kiyit sula

¹² Ya pay nani Yesu ambat aka mossorgo metiŋ vi kakkama, avoŋ kim aka əkkaman Maŋgəlva.

¹³ Ya səza təki adaŋgə, ayek gewleɗ nani, awel kəlaw kiyit sula sə weleŋti, aye na maslənɗe.

¹⁴ Simoŋ məs alvan na Piyer gəm Andre məlməni, Yakob, Yohanna, Filipi, Bartelemi,

¹⁵ Matiye, Tomas, Yakob wətən Alfe, Simoŋ məs adawyaŋ na məŋglu dələv nani.

¹⁶ Yuda wətən Yakob gəm Yudas Iskariyot məs dəkkpaŋ əzəm ki Yesu.

Yesu tay ərba wəna gəm ənzeɗ ɗiyi

¹⁷ Səza aprik dənɗaŋ na, ndən ziw a təki məpəlayya də ŋgaɓa net gewleɗ nan gəm ŋgaɓa net ɗiy diyɗa səka dələv na Yude pakə, sə Yerusalem gəm səma pehe na Tir gəm na Sidon.

¹⁸ Azzoŋ na, vi kaprəm əpel nani, gəm vi kanzaɗ səka gbəgba' neti. Ɗiy en məs tuyeŋge adawzəmgitin sahã ambəlaŋka.

¹⁹ Ɗiy pak tay əkayaŋ ərəŋgəni, vi gbogboŋ tay əgilye səzani, əmbəlgit pakə.

Əzaɓa gəm əraya

²⁰ Yesu aslan haran aket gewleɗ nani, amna: Əzaɓ akokum mənokum məssehẽŋɗe, vi məlĩ na Maŋgəlva nokumi.

²¹ Əzaɓ akokum munokum məs mãy adawda kakaŋka, vi kawbokumi. Əzaɓ akokum, munokum məzuhəmaŋ kakaŋka, vi wakəmasaŋgə.

²² Əzaɓ akokum an ɗiy azelkumənko, agohkumənko, arokumənko azganənək iya nokum va mbərayən aka wəna Wətən Ɗəfa.

²³ Mənneken zukum pay nani, məɗɗələ, vi ərəh nokum metiŋgini a disiŋ. Vi efiŋgiɗit vas adaɗɗaŋ sitin məskəleŋɗe lahəŋka.

²⁴ Ya əray akokum, munokum, məsaryeɗi, vi mokrokum avoŋguk səkayə.

²⁵ Əray akokum, munokum məs kəbaŋ kakaŋka, vi mãy wadukum. Əray akokum, munokum məzumasaŋ kakaŋka, wakəzəmaŋ sahã gəm wakəhəmaŋgə.

²⁶ Əray akokum, an ɗiy pak tay əpeleŋ moggon akokum, vi efiŋgiɗit vas anah sitin məskəleŋɗe məwaŋ wəna.

Əŋglu məzuzelɗe

²⁷ In tat ənah sukum, munokum məzəprəmwəni: Məŋglu məzuzelɗe nokum, məgəɗ moggon sit məzuzelokuməni.

²⁸ Məŋgəl əzaɓ sit məraygukuməni. Məkkam viyit məraygənən iya nokum.

²⁹ An ɗəf avərkuk aka tapaslayko, akkpaŋgan sən an maɓɓani. An ɗəf agəmək lukut metiŋgin noko, kəltakən dawgəmət akən muzliyak ɓa.

³⁰ Ɗəf an dəssoh zəga avoko, apsəni. Kədassohõn arya nok səva ɗəf an dəgəm ɓa.

³¹ An məs kəŋglaŋ ɗiy dəɗɗan sukuməngəni, məgəɗ sit vaska'e tamə.

³² An munokum tat əŋgluwin ɗiy en dəŋglukuməni, zəga na soko awan kədawgaŋ əmpa di? Məs mambrayɗe dayday tay əŋgluwin ɗiy en dəŋgluwini.

³³ An munokum tat əɗɗaŋ moggon sit ɗiy məɗɗaŋ sukumən moggon na, zəga na soko awan kədawgaŋ əmpa di? Məs mambrayɗe dayday vas adaɗɗaŋgə.

³⁴ An munokum tat əpsitin dəmən sit ɗiy en məs kədaɗɗumoŋ na wamndagan sukumuni na, zəga na soko awan kədawgaŋ əmpa di? Məs mambrayɗe dayday tay əpsitin sit məs mambrayɗe, vi dəmndan sitingin va dəslə.

³⁵ Ya məŋglu məzuzelɗe nokum, məgəɗ moggoni, məpsit dəmən məza əɗɗum na ərəh akan səbbərən ɓa. Ərəh nokum wasan diyɗa, wakəssoŋ kirtin Məsəɗəɗə, vi ɗəf moggoni azet məs awfeteŋ ɓa dit məs mambrayɗe pakə.

³⁶ Məsoŋ də ula sahã va Afukum asan məwəl sahã.

Kədawtaw wən aket ɗiy meɓɓet ɓa

³⁷ Kədawtawaŋ wən aka ɗəf ɓa, asna kawtawi wən akokum ɓa. Kədazlbenin ɗiy də ətawwən ɓa, asna kazlbukumi də ətawwən ɓa. Məvvuyon siti, asna kavvuyon sukumi.

³⁸ Məpsit zəga, asna kapsukumi, əsla moggon pa' setete hã əggbo' adawziyaŋ sukumun ama lukut nokum metiŋginiŋka. Vi zəga məs kədawslenin ɗiy dəndənəŋka, dəndəni adawslukuməni.

³⁹ Yesu apel sitik wənməkkpaŋga əmpa: Daŋgar waɓap əkdəh daŋgar sa? Sulegit pak abətaŋ na addəv vov ɓa sa?

⁴⁰ Məzuyagan zəga aday na ki mərbəzəga nan ɓa, ya məzuyagan zəga an ayaganək təstəs na wasan va mərbəzəga nani.

⁴¹ Vimi kədawla kevile ara məlmuko, ya nok kawla motoffo məs dəsan arok ɓa di?

⁴² Mbari kədawɓap ənah sən məlmuk na: Məlmuwa, appaw nəgəm suk kevile səroko, yaŋ nok van motoffo tay aroko'e di? Məs muluvuluvu, agilgən motoffo sərok daabəŋ, asna akəwəl lewlew nawgəm kevile səra məlmuko.

Wəlaŋga də uwa nani

⁴³ Wəlaŋga moggon tay dədawa kirtin mbəreyit ɓa, awaniɓa wəlaŋga mbərayən tay dədawa kirtin mogget ɓa.

⁴⁴ Wəlaŋga pak kawsəni də uwa nani. Kawɓuhi sokoyo səka gedirge ɓa, kawɓuhi uwa na megezlembirke səka dezize ɓa.

⁴⁵ Ɗəf moggon wagilgən zəga moggon sə təki wəzaɓ moggon na makrani. Ɗəf mbərayən, sə təki əzaɓ nan mbərayən adawgilgən mbərayən. Vi an dəknah a makra ɗəfi ma ɗəf adawpele.

Gəleɗe sula

⁴⁶ Vimi kədayuwən na Daya! Daya! Ya kaɗɗanən an məs nədawnah ɓaŋ di?

⁴⁷ Ɗəf məs dəde azaw pakə, məs dəprəm əpel nawa gəm məs dəgəɗ wəza dənɗaŋ na, wanərban sukum va naway agil di.

⁴⁸ Agilik va ɗəf mərkə gəla, aso'ək vov nan kpumu aɗiyək gabban aka milɓe. Iŋkile azzoŋko aziweŋgik ammba gəla naka, ya dəɓəsl ɓa, vi mərkani moggoni.

⁴⁹ Ya məs dəprəm əpel nawa, dəgəɗ wəza dəndən ɓa, agilik va ɗəf mərkə gəla aka dəlva, məza əso' vov nawɗi gabban ɓa. Adan iŋkile azzoŋ ammba gəla naka, aɓəslək ləŋ go'u, əbzla na gəla van daryawi sawɓa.