Luka 5 - Bible en Guidar

Yesu tay iye gewleɗ en madabəŋ

¹ Adan ɗiy assoŋ ɓəsɓəs akan vi kaprəm əpel na Maŋgəlva, nan asan ziwwe ama bobok na Genesaret,

² ndən təm bəlayɗe sula a ma bobok məs mərmaŋ kilif apurkoŋ səddivit əskoɓ zəveɗe neti.

³ Ndən peŋ addəv taka səret bəlayɗe veti, an na Simoŋ. Akkamanək dəzargənəgən bəlay van siɗikke səza mabuzgum. Ndən kan ɗew əyeget ɗiy səddəv bəlay vani.

⁴ Adan appan əpele, aɓsən Simoŋ na: «Dok abe a təki kpukpumo, məzget zəveɗe nokum kərmaŋgən kilfi.»

⁵ Simoŋ azlanka amna: «Mərbəzəga, kim məvoŋ aka əɗɗa wəza, zəga tay mərəm ɓa. Ya aka əpel nok na, wanəzget zəveɗe.»

⁶ Adan aɗɗanən vaska, armaŋgək kilif diyɗa, hã zəveɗe net əŋgaraŋgə.

⁷ Ahevetnin mekkeyeŋgiɗit naddəv bəlay maɓɓan nak dəzzoŋgən əbbahaŋ sitini. Ndəɗaŋ payə, aknihnin bəlayɗe sulegit hã ndəɗaŋ ətəpaŋ.

⁸ Adan Simoŋ Piyer awla vaska, ndən gbəduk də takpran aba Yesu dawnəh na: Ader səzawa, vi ɗəf məs mambray nani Daya.

⁹ Geslne armaka, ndən dit ɗiy en dəndən pak vi kilfeŋge məs armaŋ diyɗaŋka.

¹⁰ Vaski yi'e mãy Yakob də Yohanna kirtin Zebede məɗɗaŋ wəza də Simoŋ. Yaŋ Yesu aɓsən Simoŋ na kədawgeslne ɓa təŋ kakaŋka wakəsok mərəm ɗiy medereti.

¹¹ Akeninik bəlayɗe net a mabuzgum, appetinik zəgeɗ pak azbanəni.

Yesu tay əbbur məskokolo

¹² Aka Yesu adawsan a walaŋgəla-metiŋ maɓɓani, məskokolo adeke. Adan awla Yesu, ndən kup də magədəvən akkaman dawnəh na: Daya, an kəŋgəlka akəɓap əbburwa,

¹³ Yesu atələk vani, arəŋgəni, amna: Nətafəka ambələ. Yas ləŋ kokolo appani.

¹⁴ Yesu abayək mani: Kədawnah sən ɗəf ɓa, ya dok ərban zuk aza məsdəlva, aɗɗa əvəl sən Maŋgəlva ammba əbbur nok va Moyis aɗi wən nani, vi karban sit na kəmbəlka.

¹⁵ Əpel aka wən na Yesu tay ətəray abe abe. Ɗiy diyɗa azzoŋguk azani vi kaprəm əpel nani gəm kawrəh əmbla səka gbəgba' neti.

¹⁶ Yaŋ abit a kapta-muyã takərgən va ɗaɗay kakkama.

Yesu tay əmbəlgən ɗəf zən məmtəni

¹⁷ Yaŋ pay mbərən Yesu tay əɗɗa əyaka. Farisaɗe dit mərbaŋ-mahenziŋ tahəŋ gurom gurom a maŋgavani, azzoŋ səweleŋgit gəleɗe naka dələv na Galile, sə Yude mãy sə Yerusalem. Əɓap na Daya tay də Yesu dəmbəlgitigin məs gbəgbaɗe.

¹⁸ Ɗiy akinənək ɗəf zə məmtən aka zəga nawvoŋgo, akayaŋgək tive nawtoŋgən aza Yesu, vi kawvoŋgən abani.

¹⁹ Ya adan ɗiy tahəŋ diyɗa na, dəsənnən dəŋga adawtoŋgənən di ɓa, ndəɗaŋ peŋ aka gəla, ahokoŋ ki gəla vani, aprikgənən dədak də zəga nawvoŋ, addak təki aba Yesu.

²⁰ Adan Yesu awla ətaf neti, amna: Ɗəfa, mambray nok avvuyko.

²¹ Mərbaŋ-mahenziŋ dit Farisaɗe atəŋgaŋgək əɗɗum a mekret dawnəh na: Ɗəf naŋgay aŋ məpel mbərayən aka Maŋgəlva əŋ di? Naway məvvuyon mambray an Maŋgəlva yi ɓa di?

²² Yesu asənək əɗɗum neti, azlani, aɓsit na: Vimi kədaɗɗumoŋ vas a mokrokum di?

²³ Mi məza tuwãhi ɓa day di? Ənah sən ɗəf na mambrayɗe nok avvuyoŋko sa awaniɓa ənah sən na: Asili doko?

²⁴ Ya vi kəsənəngən na Wətən Ɗəf tay də gagdak navvuyon mambray aka dəlva na, yaŋ anah sən ɗəf zə məmtən nak na: Anok nədawnah suko, asili, agəm zəga nawvoŋ noko dok eŋgil anokda.

²⁵ Yaŋ ləŋ asili keret ɗiy pakə, agəm zəga məs avoŋ akan naka, ndən mbat eŋgil ananda də əgagdakan Maŋgəlva.

²⁶ Ɗiy pak assoŋgək gərəŋgə, agagdakanənək Maŋgəlva, geslne adeke, aɓɗaŋ na: Dəpaŋ zəgeɗ naggət aketi.

Yesu tay əya Levi

²⁷ Ya dərɓaga aska, Yesu agilke, awlak məkkal nzalaka, iya nan na Levi, tuŋngo addəv gəla nawfaɗ nzalaka. Aɓsən na: Azbawa.

²⁸ Levi appetik zəgeɗ pakə, asil azbani.

²⁹ Levi adə sənək waynabaya sən Yesu ananda. Məkkalaŋ nzalaka diyɗa dit ɗiy meɓɓet assoŋguk əzəm dənɗaŋ.

³⁰ Farisaɗe dit mərbaŋ-mahenziŋ net aɗɗaŋgək wərwər, aɓsitin gewleɗ nan na: Vimi kədawzəmaŋ mãy kədawsaŋ dit məkkalaŋ nzalaka gəm dit məs mambrayɗe di?

³¹ Yesu aɓsit na: Ɗiyen də zay na gəɓa zitiŋ də wəray na zloktor an məs gbəgbaɗeŋ ɓa ɓa.

³² Nəde vi kawye ɗiy en salala ɓa, abbər ɗiy mbəreyit dəɗiyaŋgən marava ɓa.

Yesu gəm əɗɗa meme

³³ Yaŋ aɓsənən na: Gewleɗ na Yohanna tay əɗɗaŋ meme gəm əkkam ɗayɗayə dit gewleɗ net Farisaɗe pakə, ya en nok na, ndəɗaŋ əzəmaŋgə, əsaŋgə.

³⁴ Yesu aɓsit na: Akəɓapnən ənah sit ɗiy miyet a təki əɓel dəɗɗaŋgən meme aka afən əɓel van tay dənɗaŋ sa?

³⁵ Ya pay wade, Kawgəmni afən əɓel sə waleŋti, asna pay nan waɗɗaŋ meme.

³⁶ Yesu anah sitik wənməkkpaŋga əmpa, amna: Ɗəf tay nawŋgar səza lukut meleketen kawɗisən lukut məzvan dəndən ɓa, vasna məŋgarni an meleketeni, ya an məŋgar səza meleketen van asap na də an məzvan ɓa.

³⁷ Ɗəf tay nawzi mbazla na meketepe addivit kenekeneɗ məzvet ɓa, vasna mbazla na meketepe waɓih kenekeneɗ veti, wambat afuŋ, kenekeneɗ vet warayaŋgə.

³⁸ Ya aslək əzi mbazla na meketepe addivit kenekeneɗ meleketeni.

³⁹ Ɗəf dəsə mbazla məzvani, aŋgla an na meketepe ɓa, ndən ənah na, an məzvan nenek day.