Luka 3 - Bible en Guidar

Wəza na Yohanna məgəɗ baptem ( 3:1-20 ) Ərba wən na Yohanna məgəɗ baptem

¹ Aka əzva ma kəlaw kiyən sle' en na Tiberiyus Kaysariya aka məlyã, Pontiyus Pilat iyi daya na kivadələv na Yude; Herodə tamə məlĩ na Galile; Filip məlmən tam dəsan məlĩ na Iture gəm na kivadələv na Trakoni; Lusaniya tam məlĩ na Abilene;

² Hanna də Kayafas tam dəssoŋ deyeɗe net məsdəlveŋge. Yaŋ əpel na Maŋgəlva ade sən Yohanna wətən Zakari a kapta-muyã.

³ Abbalanək kivadələv na maŋgava Yurdeŋ pakə, ətəlma aka wən na baptem na əɗi marava navvuyon mambraya,

⁴ va məverin addəv ɗerewel na məskəleŋ Isaya na: Ɗəf tay ənzla vaŋvəl a kapta-muyã na: Məzaɓan tive vi Daya, məziwgit tiveɗ nan sarara.

⁵ Məzzoro pak kawndəkni, mossorgo metiŋ də mossorgo pak kaɓliwti, tiveɗ polndoŋpolndoŋ pak kawziwgiti, tiveɗ giɗikgiɗik pak kawziyeti.

⁶ Ɗiy pak wawlanən əkõh dəde səza Maŋgəlva.

⁷ Aɓsən vanday net ɗiy dədazzoŋ azan vi dəɗɗa sitgin baptem na: Kirtit barwayɗe nawa dərban sukum ənza səma ədagədəv an dədazzan di?

⁸ Məgəɗ wəzaɗe en narban na kəɗiyaŋgək marava, kədaɗɗumoŋ a mokrokum na: Dəhiŋgiɗin Abraham mənani ɓa. Naw in tat ənah sukum, Maŋgəlva tay də gbogboŋ nakkpeŋget kuneŋgeŋ ka kirtin Abraham.

⁹ Məɗiyni ma zlimbe aket suwerit wəleŋɗe səkay, wəlaŋga məs awa moggon ɓa pak kawbəlni, kawsapən aka offo.

¹⁰ Ɗiy assohõnən dawnəh na: Awani dəslə azam naɗɗa kan di?

¹¹ Azlanəka, aɓsit na: Ɗəf an də lukutɗe sula, duɗakan də ɗəf an məs nan tay ɓa. Ɗəf an də zəga nawzəm tamə, dəɗɗa vaska'a.

¹² Məkkalaŋ nzalaka pak azzoŋguk vi kawrəh baptem, assohõnənka: Mərbəzəga, mi an dəslə azam naɗɗa di?

¹³ Azlan sitik na: Kədaŋglaŋ day ki an məɗi sukum ɓa.

¹⁴ Məzəlpaŋ tam assohõnənək dawnəh na: Nam tam awani dəslə azam naɗɗa di? Azlan sitik na: Kədawtafaŋ arya net ɗiy də gagay ɓa mãy ərma wən ɗar sən ɗəf ɓa, ya mənnek də əfaɗ na iya nokum.

¹⁵ Adan ɗiy tahəŋ addəv əgan, gəm baymet əɗɗumoŋ a mekret aka wən na Yohanna na, asan na Kristu ɓa sa,

¹⁶ Yohanna azlani, aɓsit pak na: Naw in tat əgəɗ sukum baptem dit iŋkile, ya ɗəf məs dəday kiyu də gagdak wade, nəgap nawpəl slapat net hensek nan ɓa. Wagəɗ sukum baptem də Zeŋgile Salala gəm də offo.

¹⁷ Tay də tekpesle nawseŋger zəga nan avani, vi kawɗakan hay dit keselme. Wakkalan hay nan a maha, ya keselme na, wazle də offo məs amta ɓa.

¹⁸ Yohanna arbanək alabara nenek sit ɗiyi gəm asɓeti də əpel sit wənɗe meɓɓet diyɗa.

¹⁹ Na məlĩ Herodə məs Yohanna adawhayan aka wən nat Herodiya ga məlməni, gəm aka zəga naɗɗa nan mbərayən temtem məs Herodə van agəɗə,

²⁰ azleɓik maɓɓan aket əmpa də əzgan Yohanna a fərsəna.

Baptem gəm ərak na Yesu ( 3:21—4:13 ) Baptem sən Yesu

²¹ Sə dərɓaga ɗiy pak arəhaŋ baptem, Yesu tam arah baptem. Aka adakkama, disiŋ akolko,

²² Zeŋgile Salala na Maŋgəlva aprikik akan də gəba zən va mukuɗuŋgulo. Əpel adek sə disiŋ, na: Istə Wətu na makrawa, in tat ənneken zu də is sawɓa.

Dihiŋgiɗ Yesu

²³ Yesu wagəɗ aza əzva kaklaw hoku aka atəŋ wəza nani. Va aza əɗɗum net ɗiy na, wətən Yosefi, wətən Heli,

²⁴ wətən Mattat, wətən Levi, wətən Melki, wətən Yannay, wətən Yosef,

²⁵ wətən Mattatiyas, wətən Amos, wətən Nahum, wətən Esli, wətən Naggay,

²⁶ wətən Ma'at, wətən Mattatiyas, wətən Semeyin, wətən Yosek, wətən Yuda,

²⁷ wətən Yohanan, wətən Resa, wətən Zorobabel, wətən Salatiyel, wətən Neri

²⁸ wətən Melki, wətən Addi, wətən Kosam, wətən Elmadam, wətən Er,

²⁹ wətən Yesu, wətən Eliyezer, wətən Yorim, wətən Mattat, wətən Levi,

³⁰ wətən Simeyoŋ, wətən Yuda, wətən Yosef, wətən Yonam, wətən Eliyakim,

³¹ wətən Meleya, wətən Menna, wətən Mattata, wətən Natan, wətən Davit,

³² wətən Yesse, wətən Obed, wətən Bo'ez, wətən Sala, wətən Nason,

³³ wətən Aminadabu, wətən Admin, wətən Arni, wətən Esrom, wətən Fares, wətən Yuda,

³⁴ wətən Yakob, wətən Isak, wətən Abraham, wətən Tara, wətən Nakor,

³⁵ wətən Seruk, wətən Ragaw, wətən Falek, wətən Eber, wətən Sala,

³⁶ wətən Kaynam, wətən Arfasad, wətən Sem, wətən Nuwe, wətən Lamek,

³⁷ wətən Matusala, wətən Enok, wətən Yaret, wətən Malele'el, wətən Kaynam,

³⁸ wətən Enos, wətən Setu, wətən Adam, wətən Maŋgəlva.