Luka 24 - Bible en Guidar

Əsilye səka əmta, ərban zəni gəm əpeŋ na Daya ( 24:1-53 ) Əsilye na Yesu səka əmta

¹ Pay maddaabəŋ na lumu taka də təki biŋbiŋgi, gil nek pay a magamasə, akinin mẽl temtem mes məŋginit nenek məs akayaŋ neki.

² Arəhənək gərəm nak məkəɗəŋgələn sə ma magamasə.

³ Səza atoŋgoŋ adaka, dərəhən gəbay na Daya Yesu ɓa.

⁴ Aɗɗaŋgək gərəŋ aka an dəgəɗə. Yaŋ ɗiy sula arbanən zit azeti, tahəŋ dit lukutɗe məzuwiɗeŋ azeti.

⁵ Geslne' armeke, ndəɗaŋ kiyit afuŋ təkə, ɗiy net aɓsitin na: Vimi kədawkayanən ɗəf madaran aweleŋgit ɗiy mimtit di?

⁶ Tay aŋ ɓa, asilke. Məɗɗumon an məs anah aka adawsan a Galile,

⁷ Anahək na: Sessel kapsəni Wətən Ɗəf avet məɗɗaŋ mambraya, kakkpa'ən aka məzliwrihe, dəsilgən pay mahoko'ən səka əmta.

⁸ Yaŋ aɗɗumonən əpel nan naka.

⁹ Amilyoŋ səma magamasə, anah sitin wən net zəgeɗis pak sit gewleɗ kəlaw kiyit taka gəm sit en meɓɓet pakə.

¹⁰ Ndəɗaŋgə Miryam mə Magdala, Yohanne, Miryam ma Yakob; gil məs dəssoŋ dənɗaŋgə, net pak anah wən vani'e sit maslənɗe.

¹¹ Ya agilik va wən na dərwa ɗar azet maslənɗe, dətafən əpel net gil vet ɓa.

¹² Yaŋ Piyer asil anzan a magamasə, adan aɓe' adaka, awle gabagaɗe kaka'ə. Yaŋ amndan ananda, aggətək aka zəga an dəgəɗə.

Aka tive na Emawus

¹³ Pay dəpaska'e gewleɗ sula sə waleŋgit adaddoŋ a walaŋgəla na Emawus, zəga na kilometər kəlaw kiyən taka səza Yerusalem,

¹⁴ yaŋ adazgaŋ meŋ aka walaŋ zit aka zəga an dəgəɗə.

¹⁵ Aka adawpeleŋ gəm adawtawanəni, Yesu zək nan arufke, ambat dənɗaŋ.

¹⁶ Ya heret dəkol gala nawsənən ɓa.

¹⁷ Yaŋ Yesu aɓsit na meŋ na mi kədawzəmaŋ də ədawəŋ di? Yaŋ aziweŋ zit sirip.

¹⁸ Taka naret adawyaŋ na Kəleyopas azlan sən na: Istə kaka' malaka a Yerusalem məs kəsən məs dəgəɗ addəv əvoŋgəŋ ɓa sa?

¹⁹ Assohotike: Mi dəgəɗ di? Yaŋ azlan sənən na: Məs dəgəɗ aka Yesu mə Nazaret, məskəleŋ məzuɓap addəv wəza də addəv əpel aba Maŋgəlva də abet ɗiy pakə,

²⁰ va deyeɗe net məsdəlveŋge namə dit deyeɗe namə azəmənək kiyən vi kawtaw wən namta akani gəm akkpa'nən aka məzliwrihe.

²¹ Azam na ndəni məs nawbit Israyel. Ya də as pakə, pay hoku yaŋ dəpaŋka zəgeɗis aɗɗaŋgə.

²² Əmpa na gil sə walaŋgəm atapamənka, na mompumoŋ pum alvəɗaŋ a magamasə,

²³ dərəhən gəbay nan ɓa. Gil vet amilyoŋko, anahaŋ səmənək na, maslayɗe arbanənək zit azeti, apsitin na madarani.

²⁴ Ɗiy meɓɓet sə walaŋgəm ambataŋgək a magamas vani, arəhənək va gil vet anahaŋgə, ndən sən kiyən na, dulanən ɓa.

²⁵ Yaŋ Yesu aɓsit na: Məs kiyit tay ɓa gəm məs mekret ɓəl dawtaf an məskəleŋɗe anahaŋgə;

²⁶ dədah zəgeɗis dəɗɗaŋgən aka Kristu dəzəmgək sahã dətoŋgən addəv gagdak nan ɓa sa?

²⁷ Yaŋ aboton sit zəgeɗ en naɗɗa akan səddivit ɗerewelɗe pakə, təŋ səza Moyis hã gap azet məskəleŋɗe pakə.

²⁸ Yaŋ agapaŋ go'o də walaŋgəla məs adawmbataŋ agəɗək va nawtoŋgo.

²⁹ Azəmaŋgək sahã ammban dawnəh na: Asok də mənamə, vi pay tay ɓa, dəfɗi kana. Atoŋguk vi kawsan dənɗaŋ.

³⁰ Yaŋ asan dənɗaŋ kawzəma, agəm mepteke, asokonək Maŋgəlva, arɗani, apsiti.

³¹ Yaŋ heret akolu, asənənka, yaŋ azə səma hereti.

³² Yaŋ anahaŋ awalaŋ zit na: Makram dəzlə va offo aka adawpel səm aka tive, də əprəman səm wən net ɗerewelɗe nak ɓa sa?

³³ Aka pay vanəski asilyoŋ, amilyoŋ a Yerusalem, arihinik gewleɗ kəlaw kiyit taka, akkalaŋgək dit ɗiy məs dədassoŋ dənɗaŋ,

³⁴ aɓɗaŋ na: Gesiŋ kpakə Daya asilke arbanək zən aza Simoŋ.

³⁵ Net abotonənək an dəgəɗ aka tive, gəm va arban zən azet darɗan mepteke.

Yesu tay ərban zən azet gewleɗ nani

³⁶ Aka adawpeleŋ vaska, ndən pay ziw addekti yaŋ aɓsit na: Zazay dəsan akokum.

³⁷ Makret azlaka, ageslne'eŋke, azet na məzvef awlaŋgə.

³⁸ Yaŋ aɓsit na: Vi mi kədawgeslne'eŋ di? Vimi əɗɗum vas asan a mokrokum di?

³⁹ Mula vaw də təlwa, Intə zək nawa. Mərəŋguwa, mula, vi Əmpəs tay də slu awaniɓa dit slesleŋɗe va kulanən nəsaw dəndən ɓa.

⁴⁰ Adan apel vaska, arban sitik van də tələn.

⁴¹ Addəv ənnek neti, dətafnən tagay ɓa, yaŋ adaggətaŋgə, aɓsit na: Zəga nawzəm tay avokum aŋ sa?

⁴² Apsənənək pəɗak na kilif məpsani.

⁴³ Atafəka, ampər a mahereti.

⁴⁴ Yaŋ aɓsit na: Aŋki əpel naw nədawnah sukum aka nədawsaw də munokum naka. Adahək an məverin akaw addəv mahenziŋ na Moyis də addivit məskəleŋɗe gəm gəlya na Davit pak dəknahgəni.

⁴⁵ Yaŋ akol maɗɗuleti dəprəməngən an məverin,

⁴⁶ aɓsit na: Vaŋki məverin: Kristu wazəm sahã, wasil səka əmta pay mahoko'ən,

⁴⁷ vi karbani wən nawɗi marava navvuyon mambray azet ɗiy pak də iya nani, dətəŋ sə Yerusalem.

⁴⁸ Munokumtə miziweɗe na wənəŋka.

⁴⁹ Wanəslən sukum an məs Afu aynan wən nani. Ya məssoŋ a walaŋgəla-metiŋ hã an əɓap sə disiŋ adek akokum kana.

Yesu tay əpeŋ a disiŋ

⁵⁰ Yaŋ, Yesu ake hã kəla Betani. Aslan van aɗɗa əzaɓ aketi.

⁵¹ Aka adaɗɗa əzaɓ aketi, awɗakək dənɗaŋ, məslani a disiŋ.

⁵² Neti, sə dərɓaga appu'oŋ sənəni, amndoŋguk a Yerusalem də ənnek metiŋgini.

⁵³ Tahəŋ pay pak addəv Gəla na Maŋgəlva, əffet akani.