Luka 23 - Bible en Guidar

Yesu aba Pilat

¹ Yaŋ asilyoŋ pakə, akanən aba Pilat.

² Atəŋgənək əkiyaŋ dolgoy akan dawnəh na: Mərəhək ɗəfəŋ əsilgit ɗiy naka dələv nam dəɓoŋgoŋgəni, tay ətek ɗiy dawfaɗ nzalaka sən Kaysara, tay ənah na ndən sən kiyən na Kristu yi məlĩ yi.

³ Pilat assohõnək dawnəh na: Istə məlĩ net mə Yudeɗ sa? Yesu aɓsən na: Is kədawnahən.

⁴ Pilat aɓsit deyeɗe net məsdəlveŋge dit ɗiy pakə: Nərah mbərayən aza ɗəfəŋ ɓa.

⁵ Yaŋ ampanən tilit dawnəh na: Tay əɓoŋgit ɗiy də əɗɗa əyak aka dələv baymani, atəŋ a Galile hã gap aŋka.

Yesu aba Herodə

⁶ Adan Pilat aprəm vaska, assohõn na ɗəf van mə Galile yi sa?

⁷ Adan aprəm na səka dələv na Herodə ade, aslənək aba Herodə, vi pay nani Herodə tay a Yerusalem.

⁸ Adan Herodə awla Yesu, annekenək zən diyɗa, vi anziyək man aka dulagəni, vi adaprəm məs adawpeleŋ akani, tay əɗɗum dulagən daɗɗa sekene.

⁹ Assohõnək əssõh diyɗa, ya tay an Yesu azlan sən ɓa.

¹⁰ Deyeɗe net məsdəlveŋge dit mərbaŋ-mahenziŋ tahəŋ ziwziw adaka. Əkiyaŋ dolgoy zit soksok akani.

¹¹ Herodə dit məzəlpaŋ nan azelenənka, amasaŋgək akani. Agul sən lukut məzəwiɗe, amndagan aza Pilat.

¹² Pay dəpaski Herodə akkpaŋgək bayna Pilat, vi lahəŋ əsler tay a waleŋgit ɓa.

Tay ətawaŋ wən aka Yesu namta

¹³ Pilat akkeletik deyeɗe net məsdəlveŋge, ɗiy gugriɗe gəm ɗiy pakə.

¹⁴ Aɓsit na: Ɗəfəŋka, kəki suwənək va məzuɓoŋgit ɗiyi, ya naw yaŋ nəssohõnək abokum, nərah mbərayən azan net zəgeɗ məs kədawkiyaŋ dolgoy akanəŋ ɓa.

¹⁵ Herodə pak dərah mbərayən azan ɓa vini amilgən azamə. Ya yaŋ zəga tay agəɗ gala nawbayən akan ɓa.

¹⁶ Vini wanərga kappani. [

¹⁷ Vi aza va əzləra na Pak agap pak, Pilat wapəl sit mə fərsəna taka.]

¹⁸ Aŋzlaŋgək vaŋvəl aka ma taka dawnəh na: Azan ɗəfəŋka appan səm Barabbas.

¹⁹ Məzgan ɗəf nan a fərsəna na aka wən na gogoyo dəgəɗ a walaŋgəla-metiŋ, gəm əbay gəbay yi.

²⁰ Pilat apel sitik əmpa vi aŋgəl kappan Yesu.

²¹ Ya azlaŋgək vaŋvəl dawnəh na: Akkpa' aka məzliwrihe. Akkpa' aka məzliwrihe.

²² Pilat anah sitik mahoko'ən: Mambray mi agəɗ di? Nərah mbərayən azan gala nawbayən ɓa. Wanərga kana, wanəppani.

²³ Ya anzlaŋgək vaŋvəl zit soksoku, aɓɗaŋ na nakkpa'i aka məzliwrihe. Geŋgere net adayək kiyən.

²⁴ Pilat atafək əɗɗa sit an assohoŋgu.

²⁵ Appanək ɗəf məs assohoŋ məs məzgan a fərsəna aka wən na gogoyo dəgəɗə gəm əbay gəbay naka, apsitik Yesu dəɗɗanəngən an aŋglaŋ.

Tay əkkpa'nən Yesu aka məzliwrihe

²⁶ Aka adawkanən Yesu, armanənək Simoŋ mə Sirene, dazzan sura, akkrək sənən məzliwrihe akan dəzbangən Yesu.

²⁷ Ɗiy diyɗa azbanənka gəm gil məzuhəmaŋ də wəska morkoyo ambrani.

²⁸ Yesu kpaŋgən haran aketi, amna: Gil na Yerusalem, kədawhəmaŋ viyu ɓa. Məhəmgən kikum dit kirtukum dərəŋ.

²⁹ Vi pay yaŋ əzzan məs adawnahaŋ na: Əzaɓ azet ndarzlayɗe gəm akət en duwaŋ ɗah ɓa, dit bideɗ məs məweɗti ɗah ɓa.

³⁰ Asna wanahaŋ sitin mossorgoɗe gugriɗ na: Məɓəsl akamə! Sitin mossorgeɗe tam na: Məɗamamə!

³¹ Vi an məgəɗ səni wəlaŋga məddəkan vas na, mbar adaɗɗa aka an məklakan di?

³² Akaŋgək məɗɗaŋ mambray sula dəndəne'e vi kawzeti.

³³ Adan agapaŋ a təki adawyaŋ na bəbər kiya, akkpa'ənək adaka gəm məɗɗaŋ mambray taka dəka dəzəŋ, taka dəka zlaɓay.

³⁴ Yesu amna: Əbba, avvuyon siti, vi dəsənnən məs adaɗɗaŋ ɓa. Awɗeketinik lukutɗe nan a walaŋ zit də əɗɗa vẽhpəlwa.

³⁵ Ɗiy tahəŋ ziwziw adak ula. Ɗiy gugriɗ kpaŋgənən ka zəga nawmasa, aɓɗaŋ na: Akõhgit ɗiy meɓɓeti, dəkõhgən kiyən tamə an ndəni Kristu məs Maŋgəlva awel kana.

³⁶ Məzəlpaŋ amasaŋgək akani'e, azaraŋ azani, atəlsənən moɗokroy,

³⁷ aɓɗaŋ na: An istə məlĩ net mə Yudeɗ na, akõhgən kiyko.

³⁸ Əver tay a disiŋ kiyən na: Aŋki məlĩ net mə Yudeɗi.

³⁹ Taka səmmbet məɗɗaŋ mambray məkkpa'it aranək dawnəh na: Kristu kənan ɓa sa? Akõhgən kiyko gəm mənamə.

⁴⁰ Ya an maɓɓan ahayãnəka, amna: Nok kawgeslne sən Maŋgəlva ɓa sa? Vi nok pak addəv tatwãh məstaka kənani.

⁴¹ Nam ɓa təsi, vi an dərəhəm aslək də wəza namə, ya nan mbərayən tay agəɗ ɓa.

⁴² Yaŋ amna: Yesu aɗɗum akawa pay kədawtoŋ addəv məlĩ noko.

⁴³ Yesu azlan sənək na: Gesiŋ nədawnah suko, dəpaŋgənəŋ wakəsok də in a təɗa.

Əmta na Yesu

⁴⁴ Dəpas wagəɗ tətaŋpay səka, guzli titir agəɗə aka dələv də wən nan hã gap təbəz hoku na moskoyo.

⁴⁵ Pay asərətka, məzlzlara duɗakan təki addəv Gəla na Maŋgəlva aŋgarək səddakən.

⁴⁶ Yesu aŋgəslək vaŋvəl dayadaya, amna: Əbba, in tat əppan əmpəs naw avoko. Səza anah vaska, ndən zamə.

⁴⁷ Adan daya net məzəlpaŋ səkat awla zəga an dəgəɗə, agagdakanək Maŋgəlva dawnəh na: Sessel ɗəfəŋ ɗəf təstəsi.

⁴⁸ Ɗiy məs dəkkalaŋ vi kawla an dədaɗɗaska, adan awlanən zəga an dəgəɗə, amndoŋguk darga mekreti.

⁴⁹ Masənkeɗ nan dit gil məs dədazbanən hã sə Galile pak tahəŋ ziwziw faraɗa ulanən an məs dədaɗɗa.

Tay ətoŋgənən Yesu addəv magamasə

⁵⁰ Ɗəf tay iya nan na Yosef, taka naret ɗiy məsɓeti, ɗəf moggoni, təstəsi.

⁵¹ Dəsler dənɗaŋ addəv an aynaŋ naɗɗa ɓa, addəv wəza net ɓa. Ɗəf na Arimate yi, walaŋgəla-metiŋ net mə Yudeɗi, məzuga məlĩ na Maŋgəlva.

⁵² Ambatək aza Pilat, assohõnək kigəbay Yesu.

⁵³ Apriginike. Atərək də gabaga, avoŋgənək addəv magamas an məkkuhun addəv milɓe məs məvoŋgəni ɗəf adak tagay ɓa.

⁵⁴ Pay nawzaɓan zə ɗəfi, pay naffet go'oy.

⁵⁵ Gil en dəzbanən dəzzoŋ hã sə Galile ambataŋgək də Yosef, awlanənək magamasə, awlanənək va məvoŋgən kigəbayni.

⁵⁶ Ndəɗaŋ buryok, akayaŋ mẽl temtem mes məŋginit neneke gəm tursan. Yaŋ affeteŋ pay naffet va mahenziŋ anahə.