Luka 22 - Bible en Guidar

Deyeɗe tay əɗɗaŋ kuket narma Yesu

¹ Adan pay na əzləra dit meptekeɗ məza wuɗo ɓa məs adawyaŋ na Pak agapə.

² Deyeɗe net məsdəlveŋge dit mərbaŋ-mahenziŋ akayaŋgək kuket nawzani Yesu, ya tay əgeslne'eŋ sitin ɗiyi.

Yuda tay məsla zən napsit Yesu deyeɗe

³ Yaŋ Satan atoŋ a makra Yudas məs adawyaŋ na Iskariyot, məs səweleŋgit gewleɗ kəlaw kiyit sula.

⁴ Yaŋ ambatə, asler dit deyeɗe net məsdəlveŋge gəm deyeɗe net məzəlpaŋ aka va mbar adapsit di.

⁵ Annekeŋke, yaŋ aynanən napsən koɓeɗi.

⁶ Atafəka, yaŋ akay pay an dəslə kapsit məza ɗiy əsənən ɓa.

Yesu aslənək ɗiy dəzaɓanəngən zəga nawzəm na Pak

⁷ Səza pay maddaabəŋ net peŋɗe məza wuɗo ɓa məs nawtaw wəla zəga vi Pak agapə.

⁸ Yesu aslənək Piyer də Yohanna, aɓsit na: Məddoŋ məzaɓan zəga nawzəm na Pak, məzəmgəni.

⁹ Aɓsənən na: Aŋga kəŋgəl mədagən di?

¹⁰ Aɓsit na: An kətoŋgoŋguk a walaŋgəla, ɗəf də hinziw akan waze ələm sukum; məzbani, Addəv gəla a təki adawtoŋgo,

¹¹ mənah sən afən gəla van na: Mərbəzəga amna: ngay gəla nədawzəm Pak addəvən dit gewleɗ naw di?

¹² Ɗəf nan warban sukum gəla an na disiŋ metiŋgin, məzaɓani, adaki kədawzaɓanən əzəm na Pak.

¹³ Addoŋko, arəhənək zəga pak va anah siti, azaɓanənək əzəm na Pak.

Way an salala

¹⁴ Adan pay nan agəɗə, Yesu asanə əzəm dit maslənɗe.

¹⁵ Aɓsit na: Maw anzanək sirsir aka əzəm way na Pak əŋ də munokum tak nədawzəm sahã.

¹⁶ Vi in tat ənah sukum, sessel nəzəm na ɗah ɓa hã an məɗama nan arbanək zən addəv məlĩ na Maŋgəlva.

¹⁷ Ndən huloŋguk gəmə, agəɗ soko, amna: Məgəma muɗakan awalaŋ zukum,

¹⁸ vi in tat ənah sukum, sessel nəsə na ɗah mbazla na uwa net megezlembirkeɗ ɓa, hã gap an məlĩ na Maŋgəlva adeke.

¹⁹ Ndən mepteke gəmə, agəɗək soko sən Maŋgəlva, arɗani apsit dawnəh na: Aŋki gəɓa zuw məpsa vikum, məɗɗa vaska vi kəɗɗumowəngəni.

²⁰ Vas agəɗə'e dət huloŋguk nawsa zəga sə dərɓaga azəmən waya, amna: Huloŋkəŋkə, ndətə wənmiynan meleketeni miynan dit mbel naw məs dəggbo'oŋ vikum.

²¹ Ya va ɗəf nawzəm Kiyu yaŋ ərɗa way də iyna.

²² Vi Wətən Ɗəf wamtə va məziwgini, ya əray aka ɗəf məs dəzəm kini.

²³ Atəŋgaŋgək əssohon ziti, naway nawɓap əɗɗa zəgas kan səmmbet di.

Naway nawsan daya di?

²⁴ Yaŋ əbayma agəɗ awalaŋgit maslənɗe aka wən na naway nawsan daya di.

²⁵ Yesu aɓsit na: Milyeŋge net ɗiy-ɗar tay əzəmaŋ məlĩ aketi, məs də gagdak aketi, tay əɗɗaŋ ɗiy dəyeningin na məɗɗaŋ moggoni adawyenini.

²⁶ Ya nokum vaski ɓa, daya na walaŋkum dəkkpaŋ va sawã, ɗəf an nabe dəkkpaŋ va məgəɗ wəza.

²⁷ Ya naway dəday di, məs dəsan əzəm sa, awaniɓa məgəɗ sən wəza? Naw nəmna məs dəsan əzəməŋki ɓa sa? Ya naw in tat a walaŋkum va məgəɗ wəza.

²⁸ Nokum, munokumtə məs kəziweŋ ɓəlɓəl addəv wəsla nawa.

²⁹ Nəpsukumək məlyã va Afu apsuwa.

³⁰ Wakəzəmaŋgə, wakəsaŋ a təki nawzəm naw addəv məlĩ nawa, wakəssoŋ aket mezeŋgeɗ na məlyã vi kawtawwən aket mahəlfaɗe kəlaw kiyit sula na Israyel.

Wəza na Piyer dərɓaga akkpaŋgan mani

³¹ Daya amna: Simoŋ, Simoŋ, Satan assohõkumuk kawtaŋgalkum va haykəmari.

³² Ya nəkkamək viko, vi ətaf nok adawza ɓa. Nok an kəmilke asɓet milmiŋgiɗko.

³³ Piyer aɓsən na: Daya, nəzaɓanək zu nawmbat də isi, dəsan a fərsəna gəm aka əmta zlaŋ.

³⁴ Yesu aɓsən Piyer na: in tat ənah suko, gəmnda ahəm na dəpaŋ məza kənah gap təl hoku na kəsənu ɓa ɓa.

Pertete, nzəkkari gəm masalam

³⁵ Yaŋ Yesu aɓsit na: Gala nəslənkum məza pertete ɓa, nzəkkari ɓa, hensek ɓa, zəga tay dəkkpap sukum sa? Aɓɗaŋ na tay dəkkpap səm ɓa.

³⁶ Yaŋ aɓsit na: Ya kakaŋ na: Ɗəf an də pertete dəgəm avani, vaska'e də nzəkkari; ya ɗəf an tay də masalam ɓa, dəvəl lukut nan dəlbahgən taka.

³⁷ Vi in tat ənah sukum an məs məvernəŋ dəknahgən akawa: Məŋɗani aweleŋgit məɗɗaŋ mambraya. Vi an məverin akaw pak tay əɗɗa.

³⁸ Aɓɗaŋ na: Daya, masalamɗe yeŋ sula. Aɓsit na: Məki.

Yesu tay əkkam aka mossorgo net heremeɗi

³⁹ Adan Yesu agili, ambatək va ɗaɗay aka mossorgo metiŋ net heremeɗi. Gewleɗ nan azbanənka.

⁴⁰ Əgap a təki nani, aɓsit na: Məkkamə vi kədawtoŋgoŋ addəv ərak ɓa.

⁴¹ Yaŋ abit səzet fafra' nan na gba' naskan gərma, akduku, akkam

⁴² dawnəh na: Əbba, an kəŋgəlka azargət huloŋguk na əzəm sahã kəŋ səzawa, ya əŋgla naw adaɗɗa ɓa, an nok dəgəɗə.

⁴³ Yaŋ maslay arban zən azan sə disiŋ vi kasɓani.

⁴⁴ Adan geslne' arma, akkamək zən soksoku, hanza nan akkpaŋgək va mbel mərme zit kpi'kpi' afuŋ.

⁴⁵ Səza asil səka əkkama, ndən bəryok ezet gewleɗ neki, arihik məleŋgti vi zit tay baybayə.

⁴⁶ Aɓsit na: Mi yi! Mənokum əleŋ sa? Məsili, məkkamə vi kədawtoŋgoŋ addəv ərak ɓa.

Ərma na Yesu

⁴⁷ Yesu dəɓəl əgrak əpel ɓa vanday yaŋka. Ɗəf adawyaŋ na Yudas taka sə waleŋgit gewleɗ kəlaw kiyit sula abeti. Azarək aza Yesu kafyokoni.

⁴⁸ Yesu aɓsən na: Yudas də əfyok kədawzəm ki Wətən Ɗəf sa?

⁴⁹ Adan en dəssoŋ dəndə Yesu awlanən an dədaɗɗa, aɓsənən na: Daya, məbil də masalam sa?

⁵⁰ Taka səmmbet abələk gawla na daya net məsdəlveŋge hã sləman dəzəŋ piwi.

⁵¹ Yaŋ Yesu azlan na: Məppani məkə. Arəŋgənək sləma ɗəf naka anzaɗəka.

⁵² Yaŋ Yesu anah sitik deyeɗe net məsdəlveŋge, deyeɗe net məzugaŋ Gəla na Maŋgəlva dit ɗiy məsɓet məs dəzzoŋ ərman na: Kəgilyoŋ dit masalamɗe mãy zleŋɗe vi karmu va kəɓəs na məvoŋtive nani di?

⁵³ Pay pak nəsawək də munokum addəv Gəla na Maŋgəlva kərmuwən ɓa. Ya aŋki pay nokum də gagdak na guzliyo.

Piyer tay ənah na dəsən Yesu ɓa

⁵⁴ Adan armanəni, akanənək eŋgil ana daya net məsdəlveŋge da, Piyer tay əzbet sə faraɗa.

⁵⁵ Asɗaŋgək offo adak daŋgla, asoŋguk amani. Piyer tay ɗewwe awaleŋti.

⁵⁶ Səza məgəɗ wəza tula ama offo, ndət harat akan seki, təmna: Ɗəfəŋ pak asanək dəndəni.

⁵⁷ Piyer aɗamanək dawnəh na: Nəsən ɗəfəs ɓa ɗakə.

⁵⁸ Dərɓagan siɗikke ɗəf maɓɓan awlaka, amna: Nok pak neret kənani. Piyer Amna: Ɗəfa, intə ɓa.

⁵⁹ Dərɓagan ənziya zəga na təbəz taka ɗəf maɓɓan apelik man taŋtaŋ dawnəh na: Gesiŋ, ɗəfəŋ pak asanək dəndəni, vi mə Galile yi.

⁶⁰ Piyer amna: Ɗəfa, nəsən an kədawnah ɓa. Tak dəgrak əpel ɓa gəmnda ahəmə.

⁶¹ Daya kpaŋgən harani awla Piyer. Yaŋ Piyer aɗɗumonək əpel məs Daya anah sən lahəŋ nak na: Tak gəmnda adawhəm dəpaŋka, wakənah na kəsənu ɓa təl hoku.

⁶² Adan Piyer agil appaka ahəmək sawɓa.

Məraniyi Yesu mərgani

⁶³ Ɗiy məs Yesu asan evet amasaŋgək akani, arganənka.

⁶⁴ Asərətaŋgək zəga aka harani, assohõnəni aɓɗaŋ na: Agəɗ kəleŋ ɗa, naway dərguk di?

⁶⁵ Aranənək əmpa də tive temtemi.

Yesu aba ətawwəna

⁶⁶ Adan təki adaŋgə, ɗiy gugriɗ net mə Yudeɗi dit deyeɗe net məsdəlveŋge gəm mərbaŋ-mahenziŋ akkalaŋka, akiyənək Yesu aba ətaw wən neti.

⁶⁷ Aɓɗaŋ na: An əstə Kristu, anah səmə. Aɓsit na: An nənah sukumko kətafnən na ɓa.

⁶⁸ An nəssohõkumko, kəɓapən na əzlan kpak ɓa.

⁶⁹ Təŋ gəgaŋka Wətən ɗəf wasan aka va dəzəŋ na əɓap na Maŋgəlva.

⁷⁰ Ndəɗaŋ pak aɓɗaŋ na: Nok na, istə kan Wətən Maŋgəlva sa? Mənokum vat mənokum tat ənəh na intə.

⁷¹ Yaŋ aɓɗaŋ na: Mənam tat də Wəray nawkay miziwe əmpa sa? Mənam sən kiyəm məprəmək səmani.