Luka 21 - Bible en Guidar

Əvəl nat gagəbay məssahãŋkə

¹ Yaŋ Yesu aslan harani, awlek məsaryeɗ əɗiyən əvəl net addəv akoti net deleɗi.

² Awlətək gagəbay məssahãŋgək təzgək koɓo sula addəvən tamə.

³ Yaŋ anah na: Gesiŋ nədawnah sukum: Ga gəbay məssahãŋgək kəs təɗiyək daykiyit ɗiy pakə.

⁴ Vi neti aɗiyaŋgək siɗikke səza arya net an diyɗa, ya nata, səza sahã nat təgəm təɗi an nazgəl kiyət dəndən pakə.

Yesu tay əpel aka əɓzla na Gəla na Maŋgəlva

⁵ Adan ɗiy meɓɓet adawpeleŋ aka Gəla na Maŋgəlva, va məbay sən gawla dit gərmeŋge moggeti gəm dit zəgeɗ məɗiyit sən Maŋgəlva, Yesu amna:

⁶ Zəgeɗ məs kulaŋgiŋki, pay maɓɓan wade, məs kuwən apəl na aka kuwən maɓɓan məza kaɓzluni ɓa ɓa.

Tatwãhɗe gəm əsərma temtemi

⁷ Assohõnənək dawnəh na: Mərbəzəga dewɗe zəgeɗis adaɗɗaŋ di? Mi narban pay zəgeɗis adaɗɗaŋ di?

⁸ Yesu amna: Məsla zukum adawzokumən ɓa. Vi ɗiy diyɗa wazzoŋ də iya naw dawnəh na: Intə Messiya pay agapka. Kədazbetin ɓa.

⁹ Wakəprəmaŋ alabaraɗe na əgay go'o də faraɗa, kədawgeslne'eŋ ɓa. Aslək dəgəɗgən vaska, ya əgrak dələv ləŋgi ɓa.

¹⁰ Yaŋ aɓsit na: Ɗiy wagayaŋ dit ɗiy meɓɓeti. Məlĩ wagay də məlĩ maɓɓani.

¹¹ Əɓla na dələv wagəɗ diyɗa, mãy wagəɗ a təki temtem gəm gəbayɗe mərma. Zəgeɗ nawgeslne' sit diyɗa gəm sekeneɗ warbaŋ a disiŋ.

¹² Ya daabəŋ kiyit zəgeɗis pak na, warəmkuməni wasərnən mokum, wakukumən abet deyeɗe naddivit gəlaɗe nakkal net mə Yudeɗi, kazgokumi a fərsəna, kawkukumi abet milyeŋɗe gəm abet deyeɗe na kivadələv temtem aka wən na iya nawa.

¹³ Zəgeɗis pak wazzoŋ sukuməni vi kəssoŋgən məziwe nawa.

¹⁴ Mərma wən nan a mokrokum, kədaɗɗumoŋ dafsən va kədawhãyaŋ aka zukum ɓa.

¹⁵ Vi naw wanəpsukum mokum də maɗɗula an məs məzuzel nokum aɓapaŋ na əziw abokum awaniɓa əbayaŋ ma də munokum ɓa.

¹⁶ Efiŋgiɗkum, mãy mokum, milmiŋgiɗkum, hilfiŋgiɗkum mãy bayneŋgiɗkum dayday wapsukkumən avet ɗiyi, wabayaŋ sərokum.

¹⁷ Ɗiy pak wazelkumən vi iya nawa.

¹⁸ Ya sessel muhur kikum təttaka azə na ɓa.

¹⁹ Də əsok zukum kədawkõhgənən zeŋgilokum.

Yesu tay əpel aka əzla na Yerusalem

²⁰ An kulanənək məzəlpaŋ asərŋgəslənək Yerusalem, məsən na pay nawza nan agapka.

²¹ Asna ɗiy en dədassoŋ a Yude dənzoŋ aket mossorgoɗe gugriɗe, ɗiy en dəssoŋ a Yerusalem dəgilyoŋgu, ɗiy en nawra adawtoŋgoŋ a walaŋgəla-metiŋ ɓa.

²² Vi wasan pay namndan harat huloŋku kaknahan an məverin.

²³ Əray aket gil en dədaway gəm en məzuweɗgitin kirin pay nani. Vi əzəmsahã metiŋ dədawsan aka dəlva gəm ədagədəv na Maŋgəlva aket ɗiy veti.

²⁴ Waskotoŋ ama masalam, karmeti a fərsəna aket dəlveŋge net ɗiy-ɗar pakə. Ɗiy ɗar wandapanən Yerusalem hã gap pay net ɗiy-ɗar toŋgu.

Əzza na Wətən Ɗəfa

²⁵ Zəgeɗ warban ara paya, ara təla aret ngərzleɗi. Aka dəlvafuŋ na geslne' warmet ɗiy-ɗarə, wagəgrəŋgaŋ sən ɓaɓəlma pehe gəm vovulumɗe nani.

²⁶ Ɗiy wamtaŋ sən geslne viyit zəgeɗ dədaɗɗaŋ aka dəlva, vi gagdakɗe na disiŋ waguguslu'oŋgu.

²⁷ Asna kawlani Wətən Ɗəf əzzan aka slaybuwən də əɓapa gəm də gagdak diyɗa.

²⁸ An zəgeɗis atəŋgaŋgək əɗɗa, misili, məsilgin kiykum, vi əbit nokum go'oy.

Wənməkkpaŋga də sokoyo

²⁹ Yaŋ Yesu apel sit wənməkkpaŋga: Mula sokoyo gəm wəleŋɗe pakə.

³⁰ An kulanənək tay əndəfoŋ səkayə, kəsənənək sən kikum ləŋ na mənzi go'oy.

³¹ Vaski yi'e an kuleninik zəgeɗis əɗɗaŋgə, məsən na məlĩ na Maŋgəlva go'oy.

³² Gesiŋ nədawnah sukum: Sessel sayit ɗiyəŋ atoŋ na məza zəgeɗis dəɗɗaŋ ɓa ɓa.

³³ Disiŋ də dəlvafuŋ wagrakaŋgə, ya sessel əpel naw agrak na ɓa.

Ətər wəray na wəga

³⁴ Məsla zukum vi mokrokum adawgəgrəŋ aka əzlər mbazla ɓa, aka əbay na mbazla, gəm aka əɗɗum aka ənziya egge ka pay nan kazzan mədigirzike akokum,

³⁵ va zəva ɓa, vi wade aket ɗiy dəssoŋ aka dəlvafuŋ pakə.

³⁶ Məssoŋ ketketi məkkam pay pakə, vi kərahaŋgən gbogboŋ nawkõh səmet zəgeɗ en dədaɗɗaŋ pakə, kiziweŋgin aba wətən Ɗəfa.

³⁷ Kapaya, Yesu tay əɗɗa əyak addəv Gəla na Maŋgəlva, ndən əgilyen dəfəɗ əmbat əvoŋ aka mossorgo məs adawyaŋ na mossorgo net heremeɗi.

³⁸ Ɗiy pak əzzoŋ bapummo azan addəv Gəla na Maŋgəlva vi kaprəmni.