Luka 2 - Bible en Guidar

Uwa na Yesu

¹ Pay dəpaska, Məlĩ Ogustu aɗiyək wən nan nawver iya net ɗiy naka dələv pakə.

² Əver maddaabəŋ vanəs agəɗ na aka pay Kiriniyus asan daya na kivadələv na Siri yi.

³ Ɗiy addoŋguk əvere, naway pak a walaŋgəla-metiŋ nani.

⁴ Yosef tam asilik səka dələv na Galile sə walaŋgəla-metiŋ na Nazaret, ambatək a Yude a walaŋgəla-metiŋ na Davit məs adawyaŋ na Bet-Lehem, vi səddəv məlma gəm həlfa na Davit iyi,

⁵ vi kawver ki zən dət Miryam ɗak nan dədaway nakə.

⁶ Aka adassoŋ adaka, pay nawa nat gapə.

⁷ Tuwək wiyən mizilin tizi nata, tətərək də lukutu, təvoŋgənək addəv zəga nawzəmgit zəgeɗi, vi dərəhaŋ təki a təki net melekeɗ ɓa.

Maslay tay ərban zən azet məzuteɗeŋɗe

⁸ Aka kivadələv vani, məzuteɗeŋɗe tahəŋ a muyã nani, tahəŋ əganən timiŋgiɗ net dəfɗa.

⁹ Maslay na Daya agilik abeti, gagdak na Daya awiɗik kiyit tərwəslə, geslne' armek diyɗa.

¹⁰ Yaŋ maslay aɓsit na: Kədawgeslne'eŋ ɓa, vi alabara nenek nədawnah sukum, wasan ənnek metiŋgin viyit ɗiy pakə.

¹¹ Vi muwa sukumi məzukõh dəpaŋ a walaŋgəla-metiŋ na Davit, ndəni Kristu Daya.

¹² Aŋki zəga an narban sukum: Wakərəhaŋ mipriŋge mətərən də bəssa, məvoŋgən addəv zəga bəlay nawzəm net zəgeɗ addəvən.

¹³ Yaŋ ləŋ mezəlpaŋ na disiŋ diyɗa azzoŋ əsap də maslay an naka, agagdakanən Maŋgəlva, aɓɗaŋ na:

¹⁴ Gagdak sən Maŋgəlva a disiŋ məsəɗəɗə, zazay aka dəlva a walaŋgit ɗiy en aŋgələ.

Məzuteɗeŋɗe tay əmbataŋ a Bet-Lehem

¹⁵ Səza maslayɗe azaraŋ faraɗa səzet əddoŋ a disiŋ, məzuteɗeŋɗe aɓɗaŋ a walaŋ zit na: Mədam a Bet-Lehem van ɗah mulagən an məs dəgəɗəŋka, an məs Daya arbə səməŋka.

¹⁶ Agəmənək zit əmbat adaka, arətənək Miryam də Yosef gəm mipriŋge, məvoŋgən addəv bəlay nawzəm net zəgeɗ addəvən.

¹⁷ Səza awlanəni, abotonənək an məs məneh sit aka wən na wiyən vani.

¹⁸ Ɗiy en dəprəmən an məzuteɗeŋɗe anah sitin pak aggətaŋka.

¹⁹ Ya nat Miryam na tərmek wənɗes pak akata, də əɗɗum aket a makrata.

²⁰ Yaŋ məzuteɗeŋɗe amilyoŋ dawgagdakan Maŋgəlva gəm əɗikiyən vi an məs aprəmaŋ gəm an məs awlaŋ agəɗək va an mənah siti.

Tay əpsənən iya sən Yesu

²¹ Səza əvoŋ dodopoɗon agəɗ naskələn awra, yaŋ kan məpsən iya na Yesu, iya an məs maslay aŋgəɗ tak əsɗa nan addəvət mani.

Tay ərbanən Yesu addəv Gəla-na-Maŋgəlva

²² Adan pay nabbur net va mahenziŋ na Moyis aŋgəl agapə, ndəɗaŋ mah əkan a Yerusalem, vi karban sən Daya,

²³ va məverin addəv mahenziŋ na Daya na: Uwa mizilin na məlviya pak na Daya yi.

²⁴ Gəm vi kawzaɓ-Maŋgəlva va mahenziŋ na Daya anahə: Biŋgeɗ na maha ndap sula awaniɓa mizlzliŋgirɗe sula.

²⁵ Ɗəf maɓɓan tay a Yerusalem adaka, iya nan na Simeyoŋ, ɗəf nan təstəsi, məgeslne' sən Maŋgəlva, tay əga əkõh na Israyel. Zeŋgile Salala tay akani,

²⁶ Zeŋgile Salala arban sənək na amtə na tak dula Kristu na Daya ɓa ɓa.

²⁷ Əmpəs areɗik addəv Gəla na Maŋgəlva. Adan migil Yesu akinənək vi kaɗɗa sən va mahenziŋ anahə,

²⁸ aslanək wiyən van aka vani. Agəɗək əsoko sən Maŋgəlva, amna:

²⁹ Kakaŋ na Mərbəzəga, is tat əpəl balam nok də zazay va əpel nok anahə.

³⁰ Vi haraw awlak əkõh noko,

³¹ an məs kəzaɓan abet ɗiy pakəŋka.

³² Ndəni təki babar narbok azet ɗiy-ɗarə, gəm gagdak net mə Israyelɗe ɗiy noko.

Kəleŋ na Simeyoŋ

³³ Afən dət man assoŋguk gərəŋ sən wən an məpel aka wən nani.

³⁴ Simeyoŋ aɗɗak əzaɓ eketi, aɓsət Miryam man na: wiynəŋ tay ahəŋ vi əzbəra awaniɓa əsilye net ɗiy diyɗa a Israyel, gəm va zəga nawsilgin əŋzlama.

³⁵ Is zəknoko, masalam watilik zeŋgiloko; hã gap an əɗɗum net ɗiy diyɗa arbəka.

Anna məskəleŋkə

³⁶ Məskəleŋgək tat lahəŋka'e adawyaŋ Anna, wətən Fanuyel zev Aser. Təbək əzva. Dərɓaga təgəɗ əzva buhul kaka' ammba zələt təŋ səka ŋgbuɓɓo nata,

³⁷ təsatək də gəlata; təgəɗək əzva kaklaw dodopoɗo kiyən poɗo. Tawzar səddəv gəla na Maŋgəlva ɓa. Ndət əgagdakan Maŋgəlva dəfəɗ də kapaya, də əɗɗa meme gəm əkkama.

³⁸ Yaŋ təde daka' də pay nan ləŋ tədaɗɗa soko sən Maŋgəlva, tədawpel wən na wiyən van sit məzuganən əkõh na Yerusalem pakə.

Wəmnda a Nazaret

³⁹ Adan agrakənən an mahenziŋ na Daya aɗiyə, ndəɗaŋ buryok a Galile a Nazaret walaŋ gəla metiŋgin neti.

⁴⁰ Wiyən tay əɓaya, tay əsɓa, aknahək də maɗɗula. Mbəlembəle na Maŋgəlva asanək akani.

Yesu də Əzva kəlaw kiyən sula addəv gəla na Maŋgəlva

⁴¹ Aza wəzva pak migilin əddoŋ a Yerusalem a wəzləra na Pak.

⁴² Səza agap əzva kəlaw kiyən sula, ndəɗaŋ peŋ va məsərəka na wəzləra.

⁴³ Səza əvoŋ na wəzləra aggrakə, ndəɗaŋ buryok, wiyən Yesu nak bew a Yerusalem, ya migilin dəsənnən eket ɓa.

⁴⁴ Azet na tay dit ɗiy en dəmbataŋ dənɗaŋ. Adawaŋgək wəsɓəta taka, yaŋ atəŋgaŋ wəkayanən a weleŋgit ɗiy neti gəm masəŋkeɗ neti.

⁴⁵ Ya dərəhnən ɓa, amndoŋ a Yerusalem də əkayani.

⁴⁶ Aka pay ma hoko'ən, arəhənək addəv gəla na Maŋgəlva, ɗewwe a weleŋgit mərbaŋ zəga. Ndən əprimti gəm əssõhẽti.

⁴⁷ Dəprəmənən pak aggətaŋgək aka əsən nani də əzlan nani.

⁴⁸ Səza awlanəni, aggətaŋka. Man təɓsən na: Wətuwa vi mi kəgəɗ səm vaŋ di? In də afuk pak məkoyokuk mam təpa'təpa'ə.

⁴⁹ Aɓsit na: Vi mi kədawkayawən di? Kəsənən na aslək nəsawgən ezet zəgeɗ na əbba ɓa sa?

⁵⁰ Ya aprəmənən gabba əpel məs adawpel sit ɓa.

⁵¹ Ndən prik dənɗaŋ, pay a Nazaret, ndən əprəm meti. Man tərmak wənəs pak akata.

⁵² Yesu tay əmbat abe abe də maɗula, də əɓaya gəm də mbəlembəle aba Maŋgəlva gəm azet ɗiyi.