Luka 19 - Bible en Guidar

Yesu gəm Zakayus

¹ Ya səza agul a Yeriko, atoŋguk dəddəvən.

² Yaŋ ɗəf məsarya adawyaŋ na Zakayus, daya net məkkalaŋ nzalaka,

³ Akay tive kawla naway Yesu di, ya dəɓap ɓa sən ɗiy tahəŋ diyɗa vi maŋgərzla yi.

⁴ Anzanək abe, apeŋ aka korvoŋ vi kawlani, vi Yesu dədak adawtoŋgo.

⁵ Adan Yesu agap a təki nani, aslanək harani, aɓsən na: Zakayus agəm zuk apriki, vi dəpaŋ adahək nasawgən eŋgil anokda.

⁶ Zakayus nak prik də kakara, atafək də ənneke.

⁷ Adan ɗiy awlanən vaska, aɗɗaŋgək wərwərə, aɓɗaŋ na: Ana ɗəf məs mambray da al əsani.

⁸ Yaŋ Zakayus aziw aba Məman Daya, amna: Daya wanəpsit wəɗak na arya naw sit məssehẽŋɗe. An ɗəf tay məs nəgəm zəga nan də vurum wanəmndagan sən təl poɗo.

⁹ Yesu aɓsən na: Əkõh atoŋguk eŋgiləŋ dəpaŋka, vi nan pak wətən Abrahami.

¹⁰ Vi Wətən Ɗəf ade na kawkayan gəm kawkõhgən an dəzə.

Wənməkkpaŋga də suley na meleŋge

¹¹ Səza ɗiy aprəmən wənəska, Yesu apelik wənməkkpaŋga maɓɓan əmpa vi tay go'o də Yerusalem gəm vi ɗiy tay əɗɗumoŋ na məlĩ na Maŋgəlva warban zən kakaŋ kakaŋka.

¹² Yaŋ anah kan na: ɗəf məs zeŋvit ɗiy gagdakɗe ambatək aka dələv faraɗa kawrəh məlĩ adaka, gəm kawmilyeni.

¹³ Ayek belemɗe nan kəlawə, apsitik suley taka taka sən nawaydi pakə, aɓsit na: məman vokum hã gap əmilye nawa.

¹⁴ Ya ɗiy nan azelnənka, aslənaŋgək maslənɗe dərɓagan dawnəh na: Məŋgəm na ɗəfəs dəzəmgən məlĩ akam ɓa.

¹⁵ Adan amndan səza arah məlyã ya anah dəyen sənin belemɗe məs apsit suley na təbəz babar naka, vi dəsəngən an arahaŋ də əman veti.

¹⁶ An daabəŋ adeke amna: Daya suley nok nak awək kəlaw akani.

¹⁷ Daya nan aɓsən na: Lewi, balam moggok gəm məs maɗɗula kənani, kəsokuk təstəs də zəga siɗikke, asok də gagdak aket walaŋgəleɗe gugriɗ kəlawə.

¹⁸ An masula'ən adeke, amna: Daya suley nok nak awək sle' akani.

¹⁹ Aɓsən tam na: Nok pak asok aket walaŋgəleɗe gugriɗ sle'i.

²⁰ Ɗəf maɓɓan pay dawnəh na: Daya suley nok məs nətər addəv kesekese nəɗi ta' a maŋgava nak yaŋka.

²¹ Vi nawgeslne' suko, ɗəf ɓəɓəl kənani, kawgəm zəga an məs is kəɗi ɓa, kakkal zəga na mabardaw məza is kəzlga ɓa.

²² Yaŋ aɓsən na: Wanətaw wən akok aka əpel na moko, balam mbərayən. Kəsənək na naw ɗəf ɓəɓəl nani, nawgəm zəga an məs in nəɗi ɓa, gəm nakkal zəga na mabardaw məs in nəzlga ɓa.

²³ Ya vimi kəɗi suley naw abaŋ ɓa di? An nədek na də ərah akan nədawgəmən kəta.

²⁴ Yaŋ anah sit ɗiy dəssoŋ adak na: Məmõh suley sə vani, məpsən ɗəf an dit suleyɗe kəlaw naka.

²⁵ Aɓsənən na: Daya, tay dit suleyɗe kəlawə.

²⁶ In tat ənah sukum, ɗəf an də zəga avan pak kapsəni azani, ya ɗəf an tay də zəga avan ɓa an navan siɗikke zlaŋ kawgəmni.

²⁷ Ya məzuzelɗe nawiŋ, ndəɗaŋ məs dəŋglaŋ nəzəmgən məlĩ aket ɓaŋki, məki aŋka, mətaw wəlet abawa.

Lumu taka an dərɓe faɗ gəm go'o də Yerusalem ( 19:28—23:56 ) Yesu tay əmbat a Yerusalem

²⁸ Səza apel wənəska ndən toŋ abet ɗiy əmbat a Yerusalem.

²⁹ Adan agap aza Betfage də Betani, go'o də gərəm net heremeɗi, ndən slən gewleɗ nan sula.

³⁰ Aɓsit na: Məddoŋ a walaŋgəla nabeska. An kətoŋgoŋguk addəvən, wakərahaŋ wət koro miynata, ɗəf dəpeŋ ɗah akat tagay ɓa. Məpəlta, məkiyta

³¹ An ɗəf assohõkumək na kami kədawpələn di na, mənah sən na: Wəray Daya tay azani.

³² Səza maslənɗe ambataŋgə, arəhənək va anah siti.

³³ Aka adawpəlnən wət koro, migilin aɓsitin na: Vimi kədawpəlnən wət koro van di?

³⁴ Azlanənək na: Wəray Daya tay azani.

³⁵ Akinənək sən Yesu, abasənək lukutɗe net akani apeŋgənən Yesu.

³⁶ Adan atəŋ əmbata ɗiy apekinik lukutɗe net aka tive.

³⁷ Aka adawgap aka surohho na mossorgo metiŋ net heremeɗi, gewleɗ pak zit anneke, atəŋgaŋgək əɗi ki Maŋgəlva, də wəlet dayadaya, vi sekeneɗ məs awlaŋ pakə.

³⁸ Aɓɗaŋ na: əzaɓ aka məlĩ məzəzzan də iya na Daya, zazay a disiŋ gagdak a təki məsəɗəɗə.

³⁹ Farisaɗe meɓɓet naweleŋgit ɗiyi aɓsənən na: Mərbəzəga, ahayẽt gewleɗ noko.

⁴⁰ Yesu azlanəka amna: In tat ənah sukum, an aɓətaŋka, kuneŋgeŋ waɗiyaŋ geŋgere.

Yesu tay əhəmgən Yerusalem

⁴¹ Aka Yesu azar go'o awla walaŋgəla-metiŋ, ahəmgənka.

⁴² Amna: Va pay dəpaŋkəŋ nok kəsənək va mbar ərəh zazay asani! Ya kakaŋ məɗamni səma horoko.

⁴³ Vi pay wade akoko, məzuzelkun wampaŋ mambara akoko, wasərŋgəslkuni, wahãslokun də təki pakə.

⁴⁴ Wakkãhkuni, is dit kirtuk addəvko. Appaŋ sukun na kuwən aka kuwən ɓa, vi kəsən pay məs Maŋgəlva ade wəbbah suk ɓa.

Yesu addəv Gəla na Maŋgəlva

⁴⁵ Yaŋ Yesu atoŋ addəv gəla na Maŋgəlva. Arɓih məvəlaŋ zəga,

⁴⁶ aɓsit na: Məverni na: Gəla naw na gəla nakkami, yaŋ nokum kəkkpaŋganən ka bətəŋ net məvoŋgoŋ tive.

⁴⁷ Tay ərban wən pay pak addəv Gəla na Maŋgəlva. Ya ɗiy deyeɗe net məsdəlveŋge dit mərbaŋ-mahenziŋ gəm ɗiy tektek naweleŋgit. Akayaŋgək tive nawbayni.

⁴⁸ Ya awsənən va adarmanən ɓa, vi ɗiy pak tay əgayaŋ əprəm əpel nani.