Luka 17 - Bible en Guidar

Mambraya gəm əvvu mambraya

¹ Yaŋ Yesu aɓsit gewleɗ nan na: Tuwãhi ka zəgeɗ nawtaŋgbãygən ɗəf adazzoŋ ɓa, ya əray aka ɗəf an dəsan tive nawkiti.

² Ɗəɗah sən iynan gərəm metiŋgin awlan əzgan addəv kpukpum na pehe ki ndən əskotgən təttaka səmmbet kirin muzliyeɗiŋki.

³ Məga zukum. An məlmuk agəɗək mbərayən, anah sən də maɗula. An aɗiyək marava, avvuyon səni.

⁴ An agəɗ sukuk mbərayən təl buhul pay taka, tay əzan azok təl buhul nan pak dawnəh na: «Nəɗiyək marava», avvuyon səni.

Ətafa

⁵ Yaŋ maslənɗe aɓsənən Daya na: Apsəm ətaf azani.

⁶ Daya amna: Va munokum tat də ətaf gba zeŋve na meslene, wakənah sənən korvoŋgəŋ na: Apətə, ampə a pehe, waɓe' sukum.

Wəza na balam

⁷ Naway səmmbokum də balam nan məzənse awaniɓa məzutaɗa, an adek sə gulyo ndən kawnah sən na: Go' ade aŋ azəmə di?

⁸ Anah sən na dərəŋ na: Azaɓan su zəga nawzəma, agəm lukut na wəza noko, agəɗ suw wəza hã an nəgrakək əzəm də əsa, dərɓagan kan na, kəzəmgəni gəm kəsəgən tamə.

⁹ Wasokon balam van vi aɗɗa sən an məs aɗi sən wən nan sa?

¹⁰ Vaski yi'e nokum van adawsan sukum, an kəɗɗanənək an məs məɗi sukum wən nan pakə, mənah na: Balamɗe mənan ɗarə, an dəslə naɗɗa nam məgəɗə.

Yesu tay əmbəlgit məskokoleɗ kəlaw

¹¹ Adan Yesu adawmbat kəla Yerusalem, atoŋguk də Samari gəm də Galile.

¹² Aka adawtoŋ a walaŋgəla maɓɓani, məskokoleɗ kəlaw azzoŋguk ələm səni. Aziweŋgik faraɗa.

¹³ Aslanənək wəlet ənahaŋ na: Yesu mərbəzəga awəl sahã akamə.

¹⁴ Adan awle aɓsit na: Məddoŋ mərban zukum azet məsdəlveŋge. Aka adaddoŋ abburoŋko.

¹⁵ Taka səmmbet adan awla na ambəlka, ndən buryok də əgagdakan Maŋgəlva wəlan koɓo'koɓo'u.

¹⁶ Ndən kup də magədəvən ammba təl Yesu, agəɗ sənək soko. Ɗəf nan mə Samari yi.

¹⁷ Yesu assohũ amna: Kəlawgit pak dəbburoŋ ɓa sa? Ya ngahəŋ en vaytak di?

¹⁸ Tay məs dəɗɗum əmilyen əgəɗ sən əsoko sən Maŋgəlva ɓa abbər malakaŋ kaka sa?

¹⁹ Yaŋ aɓsən na: Asili, doko, ətaf nok akõhgukko.

Əzza na məlĩ na Maŋgəlva

²⁰ Farisaɗe assohõnənək Yesu: Dewɗe məlĩ na Maŋgəlva adazzan di? Azlan aɓsit na: Məlĩ na Maŋgəlva ade na va zəga nawla ɓa.

²¹ Kawnahi na tay aŋka, awaniɓa tay ada ɓa. Vi məlĩ na Maŋgəlva tay a walaŋkum.

²² Aɓsit gewleɗ nan na: Pay wade, akəŋglaŋ ula pay təttaka səmmba pay na Wətən Ɗəfa, ya kulanən na ɓa.

²³ Wanah sukumən na yanda ada awaniɓa yaŋ aŋka. Kədaddoŋ adak ɓa, kədanzoŋ adak ɓa.

²⁴ Vi va buwən adawiɗ piti' a disiŋ təŋ sə maŋgava hã amaŋgava maɓɓani, vaski Wətən Ɗəf adawsan pay nani.

²⁵ Ya daabəŋ nani wazəm sahã diyɗa, sayit ɗiy en kakaŋkiŋ wazgani.

²⁶ An məs dəgəɗ pay na Nuwe, vas adaɗɗa'e pay na Wətən Ɗəfa.

²⁷ Ɗiy əzəmaŋgə, əsaŋgə, əɗiyaŋ gili əɗiyaŋ zeli hã gap pay an Nuwe atoŋ addəv bəlay, buwən mə vekeveke pay azet pakgiti.

²⁸ Va agəɗə'e aka pay na Lot, ɗiy tay əzəmaŋgə, əsaŋgə, əlbahaŋ zəga, əvəl zəga, əmpaŋ wəleŋɗe, ərkaŋ gəla.

²⁹ Pay məs Lot agil sə Sodom, offo na busuk azi sə disiŋ va buna, azet pakgiti.

³⁰ Vas adawsan pay na Wətən Ɗəf adarban zəni.

³¹ Pay nan dəpaska, ɗəf məs naka təgbalka məs zəgeɗ nan eŋgili, adawpriken əndet ɓa. Vaska'e Ɗəf məs na gulyo, adawmilyen dərɓe kpak ɓa.

³² Məɗɗumon wən nat ga Lot.

³³ Ɗəf an nawkay əkõhgən zeŋgileni, wazani, ɗəf an nawzani wakõhgəni.

³⁴ In tat ənah sukum: Dəfəɗ nani ɗiy sula wassoŋ aka zəga nawvoŋ taka, Kawgəmi taka, mbagən maɓɓani.

³⁵ Gil sula wassoŋ əsər a təki taka, Kawgəmi taka, mbagət maɓɓata. [

³⁶ Zel wassoŋ sula awra, Kawgəmi taka, mbagən maɓɓani.]

³⁷ Gewleɗ nan azlanənka aɓsənən na: Aŋga adaɗɗa di Daya? Yaŋ aɓsit na: A təki mogogoy asani adaki mogdok ziyneɗ adakkalaŋ.