Luka 15 - Bible en Guidar

Wənməkkpaŋga na time məzan yaŋ məmnda mərəhni

¹ Məkkalaŋ nzalaka dit məɗɗaŋ mambray pak azaraŋgək aza Yesu kaprəm əpel nani.

² Farisaɗe dit mərbaŋ-mahenziŋ aɗɗaŋgək wərwər, aɓɗaŋ na: Ɗəfəŋka tay ətef məɗɗaŋ mambraya, tay əzəm dənɗaŋ.

³ Yaŋ anah sit wənməkkpaŋgaŋ dawnəh na:

⁴ Naway səmmbokum an tay dit timiŋgiɗ səkatə, taka mbo' na, appet na en kaklaw vaytak kiyit vaytak a kapta-muyã, vi kada əkayan an məzan hã ndən gas ərəhən ɓa di?

⁵ An arəhəka waslan a mawəlan də zən neki,

⁶ an adek eŋgili, waye bayneŋgiɗin dit meggeŋgiɗni, wanah sit na: Mənnek də iyna, vi nərahək time naw məs dəzə naka.

⁷ In tat ənah sukum, vaski ənnek adawsan a disiŋ vi məs mambray təttaka dəɗi marava dayki an viyit en təstəs kaklaw vaytak kiyit vaytak məs tahəŋ də wəray nawɗi marava ɓa.

Suley na təbəz məzan yaŋ məmnda mərəhni

⁸ Awaniɓa an guluk tat dit suleyɗe na təbəz babar kəlaw, taka mbo' na, təsɗa na lalam kawfaɗ gədəv gəla kawkayan də maɗɗula hã ndət gas ərəhən ɓa sa?

⁹ An tərahək na, atiye bayneŋgiɗit dit meggeŋgiɗta watənah sit na: Mənnek də iyna, vi nərəhək suley naw məs dəzə naka.

¹⁰ In tat ənah sukum, vaski ənnek adawsan azet maslayɗe na Maŋgəlva vi məs mambray təttaka dəɗi marava.

Wiyən məzan yaŋ məmnda ərəhni

¹¹ Yaŋ anah əmpa na: Ɗəf maɓɓan tay dit kirtin sula.

¹² An sawã aɓsən afən na: Əbba avay hara arya nawa. Yaŋ awɗakan sitik arya nani:

¹³ Dərɓagan əvoŋ siɗikke, sawã nak akkalanək arya nan pakə, ndən mbat aka dələv faraɗa. Azanək arya nan aka polkoyo ɗarə.

¹⁴ Səza azan pakə, yaŋ mãy na ngaryã agəɗ aka dələv vani, atəŋgək əzəm sahã.

¹⁵ Ndən mbat kulo' aza ɗəf naka dələv nadak vani, yaŋ a gulyeŋge nan əteɗ vedemɗe.

¹⁶ Aŋgələk kawba də heleŋ məs vedemɗe adawzəmaŋ, ya ɗəf tay dədapsən ɓa.

¹⁷ Yaŋ atəŋ əɗɗum aka əssa nani, amna: Məɗɗaŋ wəza na əbba mbarwaŋ də zəga nawzəm ndoɗoɗ-ndoɗoɗ di, yaŋ naw in əmta aŋ sən mãya.

¹⁸ Wanəsili, wanəmndaw aza əbba, wanənah sən na: Əbba nəgəɗək mbərayən aza Maŋgəlva gəm azoko,

¹⁹ nəslə nawsaw ka wətuk əmpa ɓa. Aɗiyu va ɗəf nammbet məɗɗaŋ wəza noko.

²⁰ Ndən le' mbat ana afən da. Aka asan faraɗa ləŋ afən awlaka, awələk sahã akani. Anzanka, azlah a mawəlani, afyokoni.

²¹ Wiyən aɓsən na: Əbba, nəgəɗək mbərayən aza Maŋgəlva gəm azoko, nəslə nawsaw ka wətuk əmpa ɓa.

²² Yaŋ afən aɓsit belemɗe nan na: Go' məki lukut an moggoni, məgul səni, məgul sən ndama aka vani, məkkpa sən henseki.

²³ Məki wət wasli məkərən, mətaw wəlani, məzəmsəmə məzlərsəmə,

²⁴ vi wətuwəŋ amtəka naka ya ambəlka, azəka naka məmndaki ərəhni. Atəŋgaŋgək əɗɗa wəzləra.

²⁵ Pay nani wətən an daya tay awra. Ya aka adazzani, azar go'o də gəla, aprəmək wəsmaya gəm wəskəla.

²⁶ Ayək ɗəf taka səmmbet məɗɗaŋ wəza, assohõn an dəgəɗə.

²⁷ Yaŋ ɗəf nak aɓsən na: Məlmuk dəmili, afuk aslba sənək wət wasli məkərən, vi amil sənək petpeti.

²⁸ Yaŋ wətən an daya nak adə gədəva, aɓoŋ dawtoŋ eŋgili. Afən vit əkkamani.

²⁹ Yaŋ azlani, aɓsən afən na: Awla əzva diyɗa nədawgəɗ suk wəza. Nətoŋ ɗah kiy wən məs kəɗi abaw ɓa, ya naw na kəvay ɗah porsokuk vi nənnekengən zu dit bayneŋgiɗu ɓa.

³⁰ Ya adan wətuk məs dəzəm arya nok dit məpolkoyeɗ ade, is wət wasli məkərən pam əslba sən dərəŋgə.

³¹ Afən aɓsən na: Wəyin nawa, is tat də in pay pakə, zəga naw pak noki.

³² Aslək məzlərgəni, mənnekgəni, vi məlmukuŋka, amtəka naka ya ambəlka, azəka naka məmndaki ərəhni.