Luka 14 - Bible en Guidar

Yesu tay əmbəlgən məsgbəgba'a

¹ Yesu atoŋguk eŋgil ana daya net Farisaɗe da pay naffet vi kawzəma, yaŋ adawsiviwini.

² Ɗəf məskan pay abani.

³ Yesu azlani, aɓsit mərbaŋ-mahenziŋ dit Farisaɗe dawnəh na: Tive tay nawmbəlgən ɗəf pay naffet sa tay ɓa?

⁴ Ndəɗaŋ ɓataɓata. Yaŋ Yesu agəma, ambəlgəni, appan ambatə.

⁵ Yaŋ aɓsit na: Naway səmmbokum, an wətəni awaniɓa medgeɗge nan abətək a vov net iŋkile pay naffet na agəm na zən əkdəhən ɓa di?

⁶ Dəɓap əzlanən aket zəgeɗis ɓa.

Əwel təkiya gəm əya ɗiy əkkala

⁷ Yesu apelik wənməkkpaŋga sit ɗiy miyeti vi awlek əwel zəga nassa na sləma. Aɓsit na:

⁸ An ɗəf ayukuk a təki nawɓele, kədassok aka zəga nassa na sləma ɓa, kuzuŋ ayək ɗəf gagdak daykiko,

⁹ ka ɗəf məs dəyukum adazzan ənah suk na: Apəl təki sən ɗəfəŋka, ka is kaddok də wil arok əssok aka zəga nassa an ɗarə.

¹⁰ Ya an məyuki a təki əkkal na, dok əsok aka zəga nassa an ɗarə, vi an ɗəf məs dəyuk adek na, wanah suk na: Baynawa ade əsok aka zəga nassa na sləma. Asna wakərah gagdak abet ɗiy məs kəssok əzəm dənɗaŋ vet pakə.

¹¹ Vi ɗəf an dəɓaygən ki zən pak kawɓe'gəni, ɗəf an dəɓe'gən kiyən pak kawɓaygəni.

¹² Yaŋ aɓsən ɗəf məs dəya nak tam na: An kəgəɗək zəga nawzəm kapaya awaniɓa moskoyo, kədawye bayneŋgiɗuk ɓa, milmiŋgiɗuk ɓa, həlfiŋgiɗuk ɓa, meggeŋgiɗuk məsaryeɗ ɓa, vi adawyukun tam laha kawfaɗ suk agəlan ɓa.

¹³ An kədək waynabaya na, aye məssehẽŋɗe, maŋgalɓayeɗi, vədalɗe gəm deŋgerɗe dərəŋgə.

¹⁴ Wasan suk ka əzaɓa vi aɓapən na əfaɗ suk agəlan ɓa. Vi kawfaɗ suki agəlan pay əsilye net ɗiy en təstəs səka əmta.

Wənməkkpaŋga na waynabaya

¹⁵ Yaŋ ɗəf taka səmmbet ɗiy məyet aprəm wənəska, aɓsən Yesu na: Əzaɓ aka ɗəf an nawzəm way addəv məlĩ na Maŋgəlva.

¹⁶ Yesu azlan sənək na: Ɗəf maɓɓan adək waynabaya də moskoyo, ayək ɗiy diyɗa.

¹⁷ Pay nawzəm way vanəska, aslənək balam nan dənah sitgin ɗiy miyet na: Məde vi zəga pak məzaɓani.

¹⁸ Baymet pak atəŋgaŋgək əpel məstaka na gədəvən adawda ɓa. An daabəŋ aɓsən na: Nəlbahək gulyo, wəray tay nəmbatgən ulani, kamə gədəvuk adawda akaw ɓa.

¹⁹ Ɗəf maɓɓan amna: Nəlbahək wasliɗe nense kəlaw waməmbat əyegeti kamə gəduvuk adawda akaw ɓa.

²⁰ Dəf maɓɓan amna: Kakaŋ nəgəm gulku vini nərah na əmbat ɓa.

²¹ Balam amndanək aza daya nani, anah sənək wən nan pakə. Yaŋ gədəv afən gəla adə, aɓsən balam nan nak na: Go' dok aket tiveɗ gugriɗ dit memeɗeŋɗe na walaŋgəla-metiŋ kəkigin məssehẽŋɗe, maŋgalɓayeɗi, deŋgerɗe gəm vədalɗe aŋka.

²² Yaŋ balam anah na: Daya an məs kəɗi wən nan nak agəɗka, ya təki apələk əmpa'e.

²³ Daya aɓsən balam nak na: Dok aket tiveɗ gugriɗ gəm dəmet mambereɗi, aska wəlet ɗiy dətoŋgoŋgən vi gəla naw dəknahgəni.

²⁴ Vi in tat ənah sukum: Ɗəf taka səmmbet ɗiy miyet daabəŋ nek tay nawnen way naw ɓa.

Tive nakkpaŋ gawla na Yesu

²⁵ Ɗiy diyɗa tay əzbanən Yesu. Ndən kpaŋ aɓsit na:

²⁶ An ɗəf adek azawa, an dəzel afən ɓa, man ɓa, guluk nan ɓa, kirtin ɓa, milmiŋgiɗin mezeŋleket dit məguluŋgit ɓa, mãy zeŋgilen pak ɓa na, aɓap na əsan ka gawla naw ɓa.

²⁷ Ɗəf an dəslan məzliwrihe nan dəzbawgən ɓa, aɓap na əsan gawla naw ɓa.

²⁸ Naway səmmbokum an aŋgələk ərka gəla-mələklək na, asan əɗɗum tagay aka an məs adawzani kawlan na an navan vanəs na wagrak wəza vanə sa di?

²⁹ Vi an atəŋgəka ya dəɓap əgrakən ɓa na, ɗiy en məs dədawlanən pak wamasaŋ akan

³⁰ dawnəh na: Ɗəfəŋka, atəŋgək ərka gəla ya dəɓap əgrakən ɓa.

³¹ Awaniɓa məlĩ awani, an tay əmbat əlpa də məlĩ mbərən na, asan na əɗɗum tagay na, an waɓap əmbat dit ɗiy gabal kəlaw kawləm sən ɗəf an dədazzan akan dit ɗiy gabal kaklaw sula ɓa di.

³² Ya an aɓap na ɓa, adan məlĩ andak tay faraɗa tagay waslən metiveɗ azani vi kassohon əslere.

³³ Vaski kan asan sən ɗəf nammbokum pak məs dəppet zəgeɗ nan pak ɓa, aɓap na əsan gawla naw ɓa.

Bətu məs atər na wəray ɓa

³⁴ Bətu zəga moggoni, ya an lelem na bətu agraka mi adawtər əmpa di?

³⁵ Atər na wəray aza dəlvafuŋ ɓa awaniɓa vi ba'ar ɓa, kaggbo'ni a gizbe. Məs də sləman naprəma dəprəma.