Luka 13 - Bible en Guidar

Əɗi marava awaniɓa əmta

¹ Pay dəpaska, ɗiy meɓɓet azzoŋguk ənah sən wən net məs Galileɗe məs Pilat aslehẽt mbel net dit en net zəgeɗ atawaŋ a matuya neti.

² Yesu azlanka, aɓsit na: mənokum əɗɗum na, mə Galileɗiskiŋ məs mambray daykiyit mə Galileɗ pak vi agəɗ aket vas sa?

³ Vaski ɓa, in tat ənah sukum an kəɗiyaŋ marava ɓa, vas kədawzaŋ baymokum.

⁴ Awaniɓa ɗiy kəlaw kiyit dədopodo məs gəla nawga aɓəsl aket a Silowe, abeye, mənokum əɗɗum na ndəɗaŋ dəraygənən daykiyit ɗiy dəssoŋ a Yerusalem pak sa?

⁵ Vaski ɓa, in tat ənah sukum an kəɗiyaŋ marava ɓa, vas kədawzaŋ baymokum.

Wənməkkpaŋga na sokoyo məza uwa akan

⁶ Yaŋ Yesu apel sit wənməkkpaŋgaŋka: Ɗəf ampək sokoyo addəv guli net megezlembirkeɗ nani, yaŋ ade əkay uwa akani, ya dərah ɓa.

⁷ Yaŋ anah sən məgə guli net megezlembirkeɗ na: Əzva hoku yaŋ nədazzaw əkay uwa aka sokoyoŋka, ya nawrah ɓa. Abəla, vimi adawyan dəlvafuŋ ɗar di?

⁸ Məgə guli azlani, aɓsən na: Daya, appan dabyaŋ əmpa, wanəso'on mammban tərwəslə, wanəzi sən ba'arə,

⁹ kuzuŋ abe na wawə an tay vas ɓa na Kəbəlgən kana.

Yesu tay əmbəlgət guluk məɓrukət pay naffete

¹⁰ Yesu tay ərba wən addəv gəla nakkal net Yudeɗ maɓɓani, pay naffete.

¹¹ Ɗak tat adak məs əmpəs mbərayən aɓruk wəzva kəlaw kiyən dədopoɗo, tat ɓe'e tawɓap əsilyat ziw ɓa.

¹² Adan Yesu awləta, apel sətka, aɓsət na: Gulku kəppetik səka əɓruk noko.

¹³ Aɗiyək van akata, ndət ləŋ le' ziwi, təgagdakan Maŋgəlva.

¹⁴ Yaŋ daya na gəla nakkal net mə Yudeɗi adə gədəva vi Yesu ambəlgət pay naffete, aɓsit ɗiy na: Pay sləre tay vi naɗɗa wəza, dəpas na məde kərahaŋgən əmbəla, məza pay naffet ɓa.

¹⁵ Daya azlan sənəka, amna: Məs muluvuluvuɗe, mənokum pak kawpəlnən medgeɗge awaniɓa koro nokum sə təki nawzəm pay naffet kawkan amet iŋkile ɓa sa?

¹⁶ Ya gulukkəŋ wətən Abraham məs Satan aɓruk wəzva kəlaw kiyən dədopoɗoŋ, dəslə kawpələt səka əɓruk nat pay naffet ɓa sa?

¹⁷ Adan apel vaska, məzuzelɗe nan pak wil adetinke, ɗiy pak annekeŋke vi zəgeɗ gagdakɗe agəɗəŋki.

Wənməkkpaŋga na zeŋve na meslene

¹⁸ Yaŋ anah kan na: Də mi nədawsla məlĩ na Maŋgəlva di? Də mi nədawslan di?

¹⁹ Agilik va zeŋve na meslene, ɗəf agəmtək azlgətək addəv guli net wəleŋɗe nani, təɓayka, təkkpaŋgək wəlaŋga, biŋgeɗ na disiŋ əzaɓən gəla net aka ki vani.

Wənməkkpaŋga na wuɗo

²⁰ Yaŋ anah əmpa na: Də mi nədawsla məlĩ na Maŋgəlva di?

²¹ Agilik va wuɗo, guluk təgəm təslahan ara gəpa marga taka, gəpa pak ahəska.

Maddamba feŋge

²² Yaŋ Yesu adawtoŋ dəddivit walaŋgeleɗe gugriɗe, mãy dəddivit walaŋgeleɗe əyeget ɗiy dawmbat a Yerusalem.

²³ Ɗəf aɓsən na: Daya ɗiy siɗikke dədawkõhoŋ sa? Yesu aɓsit na:

²⁴ Məsok zukum ətoŋ kəla maddamba feŋge. In tat ənah sukum: Vi ɗiy diyɗa wagayaŋ ətoŋgo, ya aɓapən na ɓa.

²⁵ An afən gəla asilke, ampanək maddamba, munokum nappaka wakətəŋgən ərga maddamba dawnəh na: Daya akol səmə. Wazlan wanah sukum na: Nəsən səŋga kənanən di ɓa.

²⁶ Wakətəŋgaŋ ənəh na: Məzəmək aboko, məsəka gəm, kərbək wən aket tiveɗ gugriɗ namə.

²⁷ Wazlan dawnah sukum na: Nəsən səŋga kənanən di ɓa. Məzar səzawa munokum məɗɗaŋ mambray pakə.

²⁸ Adaki əhəm gəm əmpəran slay ɗəf asani, an kulanənək Abraham, Isak gəm Yakob dit məskəleŋɗe pak addəv məlĩ na Maŋgəlva, nokum tamə kazgokumi appaka.

²⁹ Ɗiy wazzoŋ hã səmmba pay nampum gəm na moskoyo sə kəla disiŋ gəm sə dohoŋ wassoŋ addəv məlĩ na Maŋgəlva kawzəma.

³⁰ Asna ɗiy en meddirɓe wakkpaŋgaŋ maddaabəŋ, ɗiy en maddaabəŋ wakkpaŋgaŋ meddirɓe.

Yesu tay əhəmgən Yerusalem

³¹ Dəpaska Farisaɗe meɓɓet azzoŋgu ənah sən na: Agil dok səŋka, vi Herodə man aka əbayko.

³² Yaŋ aɓsit na: Məddoŋ mənah sən balwayəs na: In yakəŋ ərɓehet tuyeŋɗe gəm əmbəlgit ɗiy dəpaŋka gəm pumpum, pay mahokoni wanəgraka.

³³ Ya adahək nəzbangən tive nan dəpaŋka, mazayən gəm zaya, vi dəslə məskəleŋ dəmtəgən a mapoho na Yerusalem ɓa.

³⁴ Yerusalem, Yerusalem, is məbay məskəleŋɗe, məskə en məslən azok dit gərmeŋge. Təl gbəgbar nəŋgəl əkkelet ɗiy nok va gəmnda adakkelet kirtin ammba persleken kawvoŋ aket di, ya kəŋgereŋ ɓa.

³⁵ Mula, məppani gəla nokum. In tat ənah sukum: Sessel kuləwən na ɓa təŋ kakaŋka, hã gap mənokum ənahaŋ na: Əzaɓ aka ɗəf an dədazzan də iya na Daya.