Luka 12 - Bible en Guidar

Əzga' aka muluvuluvu

¹ Pay nani ɗiy akkalaŋgək zəga na gabal kaklawɗe hã əndapanən ziti. Yaŋ Yesu atəŋ əpel sit gewleɗ nani: Məsla zukum səza wuɗo net mə Farisaɗe ana muluvuluvu neti.

² An mətərən pak wappasə, tay an məɗama məs kawsənni ɓa ɓa.

³ An məs kənahaŋ ara guzli pakə, waprəm kapaya. An məs kəseske'eŋ ammba sləmokum ammba təkiya kawtəli ma nan aka təgbalka.

Ɗəf an nawgeslne səni

⁴ In tat ənah sukum, munokum bayneŋgiɗwa: Kədawgeslne'eŋ sitin məbayaŋ gəɓa zə ɗəf ɓa, dərɓaga asna aɓapaŋ na əɗɗa mədayki as ɓa.

⁵ Wanərban sukum an kədawgeslne'eŋ sənəni: Məgeslne' sən an məs dərɓaga əbay gəɓa zə ɗəf na tay də gagdaka nazgan addəv offo məs amta ɓa. Vaski, in tat ənah sukum ndənəski kədawgeslne sənəni.

⁶ Kawvəli honzurɗe sle aka koɓo sula ɓa sa? Ya taka tay məs Maŋgəlva azgət kiyən səmmbet ɓa.

⁷ Ya muhur kikum dayday pak məŋɗani yi. Kədawgeslne'eŋ ɓa, də sləma kənanaŋ daykiyit honzurɗe diyɗa.

Ətaf Yesu Kristu awaniɓa əzel

⁸ In tat ənah sukum, ɗəf awandi pak dərban abet ɗiy na nawi yi, Wətən Ɗəf tam warban abet maslayɗe na Maŋgəlva na nani yi.

⁹ Ya ɗəf məs dəzelew abet ɗiy na, Wətən Ɗəf tam wazelen abet maslayɗe na Maŋgəlva.

¹⁰ Ɗəf dəpel mbərayən aka Wətən Ɗəf pak warah əvvuy na mambray nani: Ya məs dəran Zeŋgile Salala arah na əvvuy na mambray nan ɓa.

¹¹ An akukəmənək addəv gəla nakkal net Yudeɗi, awaniɓa abet milyeŋɗe, awaniɓa abet ɗiy gugriɗe, Kədaɗɗumoŋ aka va mbar kədawhayaŋ ammba zukum di awaniɓa mi kədawnahaŋ di ɓa.

¹² Vi Zeŋgile Salala warban sukum an məs nawpele pay nanəska.

Wənməkkpaŋga na məsarya məza maɗula ɓa

¹³ Yaŋ ɗəf sə walaŋgit ɗiy aɓsən Yesu na: Mərbəzəga anah sən məlmu muɗakangən zəga nawzəmgəla.

¹⁴ Yesu aɓsən na: Ɗəfa, naway dəɗiyu mətaw wəna awaniɓa nawɗakan sukum zəga di?

¹⁵ Yaŋ anah sit ɗiy pakə: Məgəɗ maɗula, məsla zukum səza mãy na əŋgla na arya diyɗa, vi addəv diyɗa na arya dayday zeŋgile ɗəf asan viyit aryeɗ nan ɓa.

¹⁶ Yaŋ apel sit wənməkkpaŋga dawnəh na: Ɗəf tay məsarya, məs guli nan agəɗ sən zəga diyɗa.

¹⁷ Aɗɗumuk a makran dawnəh na: Mbar nədaɗɗa di? Vi in tat də təki nakkalan zəga na mabardaw naw ɓa.

¹⁸ Yaŋ amna: Aŋki nədaɗɗa: Wanəŋgrof mahẽɗ nawa, wanərkə gugriɗe, wanəkkalan haykəmari gəm arya naw pak adaka.

¹⁹ Asna wanənah sən megenegenew na: Megenegenewa, is tat dit zəgeɗ mogget diyɗa məzeɓet viyuk vi wəzva diyɗa. Affeti, azəmə, asə, azlərə.

²⁰ Ya Maŋgəlva aɓsən na: Məza maɗulan ɓa, dəfɗəŋka kattokoki zeŋgiloko, zəgeɗ məs kəkkal pakəŋ ka na nawa adassoŋ di?

²¹ Vas adawsan sən ɗəf an məkkalan arya sən kiyən, məs dəsan məsarya aba Maŋgəlva ɓa.

Əgan səva Maŋgəlva

²² Yesu aɓsit gewleɗ nan na: Vini nədawnah sukum: Kədawgəgrəŋgaŋ sən ənziya egge nokum vi an kədawzəmaŋgə awaniɓa an kədawsaŋ ɓa, mãy aka gəɓa zukum na mi kədawguloŋ di ɓa.

²³ Vi zeŋgile yi day ki əzəma, gəɓa zə ɗəf tam day ki lukut.

²⁴ Mule gaŋgrekeɗ ɗa, aslgaŋ ɓa, awbəlaŋ ɓa, tahəŋ də təki nawzaɓ zəga ɓa, awaniɓa maha ɓa, ya Maŋgəlva tay əzəmgiti. Kədayaŋ kiyit biŋgeɗ də sləma ɓa sa?

²⁵ Naway səmmbokum də əgəgrəŋ nan nawɓap əzzeken wəzva nan siɗikke dayday di?

²⁶ Adan kan zəga siɗikke zlaŋ kəɓapən na ɓa, vimi kədawyanən zukum əɗɗum aka wən net zəgeɗ dəmbraŋ di?

²⁷ Mule mitiŋkiziŋkiziŋ nawra va adaffuyõ. Aɗɗa wəza ɓa, awɗəm gaɗmay ɓa. Ya in tat ənah sukum: Salmoŋ də gagdak nan diyɗaŋ zlaŋ dəgul ɗah lukut moggon va nan ɓa.

²⁸ An Maŋgəlva tay əgul sən kevile nawra vas na, məs dəsan dəpaŋka ya pumpum na offo wazla na sasak munokum məs ətaf nokum məgəsnəŋ sa?

²⁹ Ya nokum, kədawkayanən an kədawzəmaŋ ɓa, an kədawsaŋ ɓa, kədawyanən zukum əɗɗum ɓa.

³⁰ Vi zəgeɗis pak ɗiy-ɗar naka dələv tay əkeyetin met homtokhomtoku, ya nokum Afukum asənək na mokum tay aketi.

³¹ Ɗəɗah məkayan məlĩ na Maŋgəlva daabəŋ, zəgeɗis kapsukumi azani.

Arya a disiŋ

³² Kədawgeslne'eŋ ɓa, gebet muzliya, vi Afukum awlak lew napsukum məlĩ nani.

³³ Məvəl ərəh nokum, məpsit məzurayɗe, mərmah gabalɗe net deleɗ məs awray ɓa, arya məza agrak ɓa a disiŋ. Vi adaka məhala arəh na ɓa, məsuksləma araygən na ɓa.

³⁴ Vi a təki arya nokum asani, adaki mokrokum adawsani.

Gewleɗ məzuganən daya neti

³⁵ Minan dadakokum vi wəza, lalam nokum dəsan guɗɗo.

³⁶ Məssoŋ va ɗiy məzuganən daya neti, pay adazzan də wəɓele, wakol sənən maddamba an agapəka argak maddamba.

³⁷ Əzaɓ aket gewleɗiski an daya net arihik tay wəganəni. Gesiŋ nədawnah sukum, wagul lukut na wəza, waye dəzəmaŋgəni, nan tam wagəɗ sit wəza.

³⁸ Əzaɓ aket gewleɗ neti, an adek tətaŋ dəfɗa awaniɓa day ki as siɗikke, arihik tay wəganəni.

³⁹ Məsən na: An afən gəla asənək pay məhala adazzan na, appan na dətilikgin gəla nan ɓa.

⁴⁰ Nokum pak məzaɓan zukum, vi Wətən Ɗəf wade pay an kəɗɗumoŋ akan ɓa.

Məgəɗ wəza moggoni gəm məgəɗ wəza mbərayən

⁴¹ Yaŋ Piyer aɓsən na: Daya səm kədawpel məkkpaŋgaŋ sa awaniɓa sit ɗiy pakə?

⁴² Daya azlanka: Məgəɗ wəza awani kan moggon pepet məs daya nan aɗi aket məɗɗaŋ wəza nan pak vi dəpsitigin haykəmari də pay nan di?

⁴³ Əzaɓ aka balaməska an daya nan adek ərəhən tay əɗɗan vaska.

⁴⁴ Gesiŋ kpak nədawnah sukum: Daya nan waɗi aka arya nan pakə.

⁴⁵ Ya an gawla vanəs aɗɗumuk a makran na: Kakaŋ na daya naw aliyək dazzani, yaŋ atəŋ ərge məɗɗaŋ wəza, zel dit guli, tay əzəma, əsa gəm mbazla əbayən,

⁴⁶ daya na məgəɗ wəzas wade də pay an məs dəɗɗum akan ɓa də pay məs dəsən ɓa. Wabəlan sek sula, wapsən haran nan sap dit ɗiy en tahəŋ də ətaf ɓa.

⁴⁷ Məgəɗ wəza məs dəsən an daya nan aŋgələ, ya dəɗi kiyən akan ɓa, dəɗɗa va daya nan aŋgəl ɓa, kawvərni əvər diyɗa.

⁴⁸ Ya məs dəsən ɓa, yaŋ agəɗ an məs dəslə nawvərən, Kargani siɗikke. Məs məpsən diyɗa, kassohoni diyɗa, məs məpan sən avan diyɗa kassohoni diyɗa day ki as kəmpa.

Yesu tive nawɗeket ɗiyi

⁴⁹ Offo nəde əzga aka dəlvafuŋ, nəŋgəl kəta na yas asəɗka.

⁵⁰ Baptem tay nədawrəha; haya va asan su gədak hã dəknahgəni!

⁵¹ Azokum nəde na vi kawki zay aka dəlvi sa? Awwo, in tat ənah sukum zay yi ɓa, uɗaki dərəŋ.

⁵² Vi təŋ səza kakaŋka, ɗiy sle addəv gəla taka wawɗakaŋgə: Hoku aslereŋ na dit en sula ɓa, en sula aslereŋ na dit en hoku ɓa.

⁵³ Afən wiyən wawɗak də wətəni, wiyən tam də afəni, mat waŋ dət wətəta, wətət tam dət mata, ɗak dət ga wətəta, ga wətət tam dət ma zəlta.

Əprəman gabba paya

⁵⁴ Yaŋ Yesu anah sit ɗiy əmpa na: An kulanənək slaybuwən asilik səmmba pay na moskoyo, go'ləŋ munokum tat ənahaŋ na buwən waziyə, tay əɗɗa vaska.

⁵⁵ An kulanənək səmyã asilik se dohoŋ munokum tat ənahaŋ na: Təki kakãh duroɓduroɓ wagəɗə, tay əɗɗa vas gesiŋ.

⁵⁶ Məs muluvuluvuɗe, kəsənənək uɗakan va dəlvafuŋ gəm disiŋ asani, ya mbar kawsənən uɗakan pay an kakaŋ ɓa di?

Əkay əsler də məzuseɓ noko

⁵⁷ Vimi kawsənən an təstəs sən kikum ɓa di?

⁵⁸ An is tat əddok də məzuseɓ nok aba mətaw wəna, agay əsler dəndən tive tive kuɗakgən dəndəni, vi adawkuk aba mətaw wəna, mətaw wən tam kapsukuk ava məgə fərsəna, məgə fərsəna tam kazgok a fərsəna ɓa.

⁵⁹ In tat ənah suko: Kəgil na sədak an kəfaɗ dəmən nakokəŋ gərak ɓa ɓa.