Luka 11 - Bible en Guidar

Yesu tay ərban əkkama

¹ Yaŋ pay maɓɓani Yesu adakkam a təki maɓɓani. Adan abaymani, taka səmmbet gewleɗ nan aɓsən na: Daya arban səm əkkam va Yohanna arban sit gewleɗ nani.

² Aɓsit na: An munokum tat əkkama, mənah na: Afəm an na disiŋ, iya nok dəsan salala. Məlĩ nok dəde.

³ Pay pak apsəm way an nawtərsəm wəraya.

⁴ Avviyon səm mambray namə, vi nam pak mənam tat əvvuyon sit ɗiy en dəɗɗaŋ mambray azam pakə. Akõhgəm səddəv əraka.

⁵ Yaŋ aɓsit əmpa na: Naway səmmbokum də baynan, məs adaddan ananda tətaŋ dəfəɗ kawnah sən na: «Bayna əŋga avay peŋɗe hoku ɗa ka laha,

⁶ Vi taka səmmbet bayneŋgiɗu adek sə malaka anawda, intat də zəga napsən ɓa.»

⁷ Ya nan azlan sənək sə kəleŋgil na: Kədawyaw ɓa, maddamba məmpani səkay, in dit kirtu pak məvoŋko, nəɓap na əsilyew kapsuk peŋɗe ɓa,

⁸ In tat ənah sukum, an dəsil kapsən vi asan baynan ɓa, ya adan tay əki man məza wil ɓa, wasili wapsən zəgeɗ en wərayən asan azet pakə.

⁹ Ya naw in tat ənah sukum: Məssõhu wakərəhaŋgə. Məkayani wakərəhəni, mərga maddamba kawkol sukumi.

¹⁰ Vi ɗəf dəssõh pak warahə. Ɗəf an dəkayani warəha. Ɗəf an dərga maddamba kawkol səni.

¹¹ Naway səmmbokum an wətən assõhonək kilif na ndən kapsən dohõ a gəla kilif di?

¹² Awaniɓa an assõhuk ɗeŋzle na wapsən hərziya sa?

¹³ An munokum mbəraykum dərəŋ kəsənənək əpsit zəgeɗ mogget sit kirtukum na. Afukum na disiŋ dədapsit Zeŋgile Salala sit ɗiy dəssohonən dayə.

Yesu tay əzlan sit məzuzelen sənəni

¹⁴ Yesu agilgənək tuya məkkpaŋgan ɗəf goryom mərma hərzləmən səka ɗəfa. Adan tuya van agili, goryom mərma hərzləmən nak apelke, ɗiy pak aggətaŋka.

¹⁵ Ya ɗiy meɓɓet sə weleŋgit aɓɗaŋ na: Də Belzebul məlĩ net tuyeŋɗe adarɓih tuyeŋɗe.

¹⁶ Ɗiy meɓɓet tam vi kawla nazan na, assõhoŋguk sekene dede sə disiŋ sə mani.

¹⁷ Adan Yesu asən əɗɗum neti, aɓsit na: Dələv na məlĩ an məzugay ka zən pak na arayka, gəleɗe nakan wabzlaŋ ammba ziti.

¹⁸ Ya an Satan tay əgay ka zən na, mbari məlĩ nan adawziw di? Vi mənokum tat ənahaŋ na də Belzebul nədarɓih tuyeŋɗe.

¹⁹ Ya an naw də Belzebul nədawgilgit tuyeŋge na, kirtukum net də miy adawgilgitin di? Vi aski adassoŋ mətawaŋ wən akokum.

²⁰ Ya an də va Maŋgəlva nədawgilgit tuyeŋɗe na, vas kan na məlĩ na Maŋgəlva agapək akokum.

²¹ An ɗəf gurom azaɓanək zən də gulom əga gəla na məlĩ nani, zəgeɗ nan pak wassoŋ zeŋge.

²² Ya an məday kiyən də gbogboŋ adeke askak wəlani, wataf zəga nawgay nan məs aɗi kiyən akan naka, wawɗak arya nan məs amõh naka.

²³ Ɗəf an tay də in ɓa, məzuzel nawi. Ɗəf an dəbbah su əkkalan ɓa, watərayani.

Əmilye na əmpəs mbərayən

²⁴ An tuya agilik səka ɗəfa, wabbal awra wakay təki naffete, adan dərah ɓa, wanah na: Wanəmil addəv gəla naw məs nəgil səddəvən naka. An amilik addəvən, warəh məfaɗani gəm məzaɓani.

²⁵ An amilik addəvən, warəh məfaɗani, məzaɓani.

²⁶ Asna wambatə, waki əmpəsɗe mbəreyit meɓɓet buhul, mbəreyit day kiyən anani, watoŋgoŋ wassoŋ adaka. Əsuwa na ɗəfəs wasan tuwãh day ki an daabəŋ.

Zazay an təstəsə

²⁷ Adan Yesu adawpel vaska, guluk təslanək wəlat a weleŋgit ɗiyi tənah sən na: Əzaɓ aka gədəvət akən tuwəko gəm aket bide məs kəwaɗə.

²⁸ Yaŋ nan amna: Əzaɓ aket məzəprəmən əpel na Maŋgəlva, məzərmanən wən nan dərəŋgə.

Əssoh sekene

²⁹ Yaŋ ɗiy diyɗa akkalaŋ amaŋgava Yesu, atəŋgək əpele: Sayit ɗiyiŋki, Sayit ɗiy mbəreyti, tahəŋ əssõh sekene! Ya arahaŋ na sekene maɓɓan abbər sekene na məskəleŋ Yonas ɓa.

³⁰ Vi va Yonas asan sekene sit ɗiy na Niniwe, vaski Wətən Ɗəf adawsan sən sayit ɗiyəŋki.

³¹ Pay əgrak dələv na, məlyaŋgək na dohoŋ watəsil aka sayit ɗiyiŋki, watətaw wən aketi, vi tədek hã sə meteɓ ma dələv vi kaprəm əpel na Salmoŋ də wəsən nani. Ya an dəday ki Salmoŋ tay aŋka.

³² Ɗiy na walaŋgəla-metiŋ na Niniwe wasilyoŋ pay əgrak dələv aka sayit ɗiyiŋki, watawən wən aketi, vi aɗiyaŋgək marava aka aprəmənən əpel na Maŋgəlva sə ma Yonas. Yaŋ an dəday ki Yonas tay aŋka.

Əkekeɓe na gəɓa zə ɗəfa

³³ Ɗəf tay nasɗa lalam, kawɗaman ɓa awaniɓa kawɗup hiliw akan ɓa, ya waɗi a təki nawɗi lalam vi məzutoŋgoŋ pak dulanəngən əkekeɓe'e.

³⁴ Lalam na gəɓa zuk horoki. An horok tay moggoni, gəɓa zuk dəwən nan wasan kerkeri. Ya an horok tay moggon ɓa, zuk pak wasan guzliyo.

³⁵ Awla kana na an əkekeɓe' nazok guzliyi.

³⁶ An zuk pak tay əkekeɓe'e, an tay dəpəl ara guzli ɓa, zuk əkekeɓe'i baymani va aka lalam adawkekeɓe'uk də əwiɗ nani.

Yesu tay əhẽyẽt Farisaɗe dit mərbaŋ-mahenziŋ

³⁷ Aka Yesu adawpele, mə Farisa maɓɓan ayak dəzəmgən ananda, ndən toŋ asan əzəma.

³⁸ Mə Farisa nak aggətka vi awla dəɗa van tagay kawzəm ɓa.

³⁹ Daya aɓsən na: Munokum mə Farisaɗe, Munokum tat əɗetin gəɓet hĩlĩŋgiɗ nawsa zəga nokum də gəɓet kasliɗe nokum, ya kəknahaŋgək də ərma mama gəm daraw.

⁴⁰ Dərweŋɗe, məs dəɗɗa gəɓan dəɗɗa gədəvən ne'e ɓa sa?

⁴¹ Məvəl də an dəsan addivti, asna zəgeɗ pak wassoŋ sukumən salala.

⁴² Ya əray akokum munokum mə Farisaɗe, vi munokum tat əɗi makəlaw net teɓ na minti dit teɓ na ru də an net teɓ na guli nokum pakə, munokum mbagən təstəsə gəm əŋgla na Maŋgəlva ndəni an dəslə narma, ya kəlzeletin meɓɓet ɓa.

⁴³ Əray akokum munokum mə Farisaɗe, vi kəŋglaŋgək təki an nasso abe addəv gəla nakkal net Yudeɗi, gəm ɗiy dəsɗokuməngən a lumiɗi.

⁴⁴ Əray akokum, vi munokum tat va magamasɗe məza awlaŋ ɓa, məs ɗiy adadawaŋ dəket məza əsənən ɓa.

⁴⁵ Yaŋ taka net mərbaŋ-mahenziŋ azlani, aɓsən na: Mərbəzəga, məs kədawnahəs na anam kədawra'e.

⁴⁶ Yesu azlanka: Nokum van əray akokum, munokum mərbaŋ-mahenziŋ. Munokum tat əslanən zəga gagdak sit ɗiyi ya nokum kawrəŋgənən də pərəŋ vokum dayday ɓa.

⁴⁷ Əray akokum, vi munokum tat ərkanən magamasɗe net məskəleŋɗe məs efiŋgiɗkum abayaŋgə.

⁴⁸ Vasna, mənokum tay ərban na, mənokum tat ənnek də wəza net efiŋgiɗkum, vi net ndəɗaŋ dəbeyini, munokum tam ərka magamas neti.

⁴⁹ Sən aski Maŋgəlva anah addəv maɗɗulan na: Wanəslin sit məskəleŋɗe dit maslənɗe, wabayaŋgə gəm wasərnən met meɓɓet səreti.

⁵⁰ Vi kattokoni mbel net məskəleŋɗe en məggbo səza mətəŋ gabba dəlvafuŋ a ma sayit ɗiy en Kakaŋkiŋki.

⁵¹ Təŋ səzet mbel na Abel hã gap azet na Zakari məs məbayən aka walaŋ matuya də Gəla na Maŋgəlva. Vaski nədawnah sukum, kattokoni a ma sayit ɗiy en kakaŋkiŋki.

⁵² Əray akokum munokum mərbaŋ-mahenziŋ, vi kəgəmənək lekile na wəsəna, munokum sən kikum kətoŋgoŋ ɓa, ɗiy en dədaŋglaŋ ətoŋgoŋ mənokum met takə.

⁵³ Yaŋ agil sədaka, mərbaŋ-mahenziŋ dit Farisaɗe, adaŋgək gədəv akan diyɗa ahəsənək də wəna, apelgənənək aket zəgeɗ diyɗa.

⁵⁴ Anslənaŋ sənənək pew̃eŋ vi kawrəh əpel də heslepe sə mani.