Luka 10 - Bible en Guidar

Wəslən maslənɗe kaklaw buhul kiyit sula

¹ Dərɓaga aska, Daya awelik gewleɗ meɓɓet kaklaw buhul kiyit sula, aslin sula sula aban addəv walaŋgəla-metiŋ də walaŋgəla məs ndən sən kiyən adaddan adaka.

² Aɓsit na: Əbəl tay diyɗa ya məɗɗaŋ wəza nan tahəŋ diyɗa ɓa. Məkkaman Afən əbəl kana vi dəsləngən məɗɗaŋ wəza a təki əbəl nani.

³ Məddoŋgu, in tat əslənkum yaŋ va kirit timiŋgiɗ a weleŋgit kirɗemuyã.

⁴ Kədawgəmaŋ pertete ɓa, nzəkkari ɓa, hensek ɓa. Kədasɗaŋ ɗəf tive tive ɓa'a.

⁵ Gəla məs kədawtoŋgoŋ addəv pakə, mənah tagay na zay dəsan addəv gəlaŋka.

⁶ An ɗəf na zay tay adaka, zazay nokum wasan akani. An tay ɓa, sessel wamil akokum.

⁷ Məssoŋ addəv gəla an vani, məzəmə, məsə an məpsukum pakə. Vi məgəɗ wəza aslək dərahgən iya nani. Kədaddoŋ addəv gəla ahã toŋ ahã toŋ ɓa.

⁸ Addəv walaŋgəla-metiŋ awandi pak məs kətoŋgoŋgu, məs adawtafkumun adaka, məzəm an məpsukum pakə.

⁹ Məmbəlgit məs gbəgbaɗe nadaka, mənah sit na: Məlĩ na Maŋgəlva adderik azokum.

¹⁰ Ya addəv walaŋgəla-metiŋ awandi pak məs kətoŋgoŋgu, an dətafkumun adaka ɓa, məgil aket tiveɗ gugriɗ nani, mənah na:

¹¹ Hologudum na walaŋgəla-metiŋ nokum məs dərəm aza tələm dayday mənam tat əttu' sukum, ya məsən hara na məlĩ na Maŋgəlva go'oy.

¹² In tat ənah sukum, pay nan na, an nawgəɗ sən Sodom wasan ɗəɗah ki an na walaŋgəla-metiŋ vanəska.

Walaŋgəlaɗe gugriɗ məzuɓoŋgoŋ də wətaf

¹³ Əray azoko Korazin, əray azoko Betsayda. Va sekeneɗiŋ a Tir gəm a Sidon məɗɗet na, kəta aguloŋguk lukut na gəlabay farfarə, aggbo'oŋguk moŋglo aketi, aɗiyaŋgək marava.

¹⁴ Vi vaski, pay nawtawwən na, an nawgəɗ sən Tir də Sidon wasan ɗəɗah kiyən nokum.

¹⁵ Ya is Kafarnahum, wakəɓaygən zuk hã a disiŋ sa? Hã a təki nanziya net mimtit kədawpurkoko.

¹⁶ Yaŋ anah sit na: Ɗəf dəprəm mokum maw aprəmə, məs dəzgokum, anaw azgə, məs dəzgaw tamə, ana ɗəf məs dəslənu azgə.

Əmilye net maslənɗe kaklaw buhul kiyit sula

¹⁷ Maslənɗe kaklaw buhul kiyit sula nek amilyoŋguk də ənneken ziti, aɓɗaŋ na: Daya, əmpəsɗe mbəreyit dayday tay əɓe'eŋ səmən vi iya noko.

¹⁸ Yaŋ Yesu aɓsit na: Nulak Satan əbəta hã sə disiŋ va uwiɗ na buna.

¹⁹ Yaŋ na, nəpsukumək gagdak nawdaw dəket dohõɗe dit hərziyeɗi, gəm aka əɓap na məzuzele pakə, sessel zəga tay nawgəɗ sukum ɓa.

²⁰ Kədannekenən zukum vi əmpəsɗe mbəreyit aɓe'eŋ sukumən dərəŋ ɓa, mənneken zukum vi iya nokum məverni a disiŋ.

Yesu tay ənneken zəni

²¹ Avan avanəs ləŋ, Zeŋgile Salala aknahək Yesu də ənneke yaŋ amna: Intat əgagdokoko Əbba, Daya na disiŋ də dəlvafuŋ, vi kəɗemetik zəgeɗis səma heret məs maɗɗulet dit məs əsəna, kərbet sit kirin muzliyeɗi. Ha'aw, Əbba, vi vaski kəŋglu dəgəɗgən ama horoko.

²² Zəga pak Ebba apsuka. Ɗəf tay dəsən Wətən an Afəni ɓa ɓa, ɗəf tay dəsən Afən an Wətəni ɓa ɓa, gəm ɗəf an Wətən aŋgəl narban səni.

²³ Yaŋ akkpaŋ azet gewleɗ nani, apel sit anet kaka'ə: Əzaɓ aka hara məzulaŋ an məs kədawlaŋ.

²⁴ Vi gesiŋ nədawnah sukum: Məskəleŋɗe diyɗa dit milyẽŋge diyɗa aŋglaŋgək ulanən an kədawlaŋgə, ya dulanən ɓa. Aŋglaŋgək əprəm an kədaprəmaŋgə, ya dəprəmnən ɓa.

Wənməkkpaŋga na məs mə Samari moggoni

²⁵ Yaŋ mərbə-mahenziŋ taka asil vi kawla nazani, aɓsən na: Mərbəzəga, mi nədaɗɗa nərahgən zeŋgile məza agrak na ɓa di?

²⁶ Yesu aɓsən na: Mi məverin addəv mahenziŋ di? Mi kədaŋɗan adak di?

²⁷ Yaŋ azlan na: Aŋglu Daya Maŋgəlva nok də mokrok pakə, də megenegenok pakə, də gbogboŋ nok pakə, də maɗɗulok pakə. Aŋglu meggok va kəŋglu ki zuko.

²⁸ Yesu aɓsən na: Kəzlanək moggoni, aɗɗa vaska, wakəsok modoroko.

²⁹ Ya nani, aɗiyək zən va təstəsə, aɓsən Yesu na: Naway meggew di?

³⁰ Yesu amna: Ɗəf tay dəsil sə Yerusalem əpirken a Yeriko. Abətək aket məvoŋgoŋ tive, agbukunək zəga səzani, arganənka, addoŋko, mbagən va məmtəni.

³¹ Məsdələv maɓɓan adawək tive vani, awlak ɗəf naka amzla faraɗa, ndən toŋgu.

³² Vaska'e mə levi adek kəla təki vani, awlak ɗəf naka. Amzla faraɗa, ndən toŋgu.

³³ Yaŋ mə Samari, məzəddan malaka, agapək aza ɗəf naka. Səza awla na, awlak sasãhni.

³⁴ Azarək azani, amə mẽlẽ də mbazla aket huweɗ nan neki, ayneti, aslan aka koro nani, aka addəv gəla net melekeɗi, azgək sləma akani.

³⁵ Vit pumpum nani, andek deleɗ na təbəz sula, apsənək afən gəla net melekeɗi, amna: Aga an kəzetik deleɗ daykiyit eski, an nəmilik na wanəmndeget suko.

³⁶ Yaŋ Yesu amna: Azok kana, sə weleŋgit ɗiy hokiski naway megge ɗəf məs dəbət aket məvoŋgoŋ tives di?

³⁷ Mərbə-mahenziŋ azlanka: Ɗəf məs dula sasãhnəŋki. Yesu aɓsən na: Doko, agəɗ vas tamə.

Yesu anat Marta da gəm Miryam

³⁸ Aka adaddoŋgu, ndən mbəzla a walaŋgəla maɓɓani, guluk maɓɓat məs adawyaŋ Marta tətafək anat da.

³⁹ Məlmət tat məs adawyaŋ na Miryam, təsatək ɗew ammba təl Daya əprəm əpel nani.

⁴⁰ Marta tat əgay də wəza temtemi. Tədeke, təmna: Daya assok məlmukəŋ təppaw nədawgay dit wəzeɗe takərguwəŋ ɓa sa? Anah sət tədegin əbbah su ɗa.

⁴¹ Daya azlan sətəka: Marta, Marta, is tat nda'nda' əyan zuk dit zəgeɗ diyɗa.

⁴² Zəga taka yi an nawtərwəraya, Miryam təgəmək haran an moggoni, kawtafni səvat ɓa.