Luka 1 - Bible en Guidar

Ətoŋ addəvən ( 1:1-4 )

¹ Adan ɗiy diyɗa agayaŋgək wəver alabaraɗe məs dəɗɗaŋ awalaŋgəm,

² va ɗiy en məs agəɗ keret də ətəŋ nan akkpaŋgaŋ ka məɗɗaŋ wəza na Əpele,

³ naw pak nulak lew səza nəkoson gabban lewlew təŋ səza suwerini, karban suk məverin nan də mabbərkizəni anoko ɗəf gagdak Teyofil,

⁴ vi kəsəngən gesiŋ na əyak an məs kərahə.

Uwa na Yohanna məgəɗ baptem gəm əssa wəyən nan gəm an na Yesu ( 1:5—2:52 ) Maslay tay ərban uwa na Yohanna məgəɗ Baptem

⁵ Aka pay na Herodə məlĩ na Yude, məsdələv tay adak iya nan na Zakari, addəv ngaɓa na Abiya; guluk nan zev Aron tə, iya nat na Elizabet.

⁶ Sulegit pak ɗiy təstəsəŋ aba Maŋgəlva. Tahəŋ wəzbanən wən məs Daya aɗiyə gəm mahenziŋ nan pak məza heslepe ɓa.

⁷ Ya tahəŋ də muzliya ɓa, vi Elizabet ndarzlayək tə, ndəɗaŋ sulegit pak azəmaŋgək əzva.

⁸ Ya addəv əɗɗa wəza nan aba Maŋgəlva, əzban aza əkkpaŋ na ngaɓa nan,

⁹ məwelni də vẽpəlwa, va matuya adazba, vi kawtoŋ addəv gəla na Daya, kawzla tursan adaka.

¹⁰ Ngaɓa net ɗiy beymet tay əkkam appaka pay əzla tursan.

¹¹ Yas maslay na Daya arban zən azani, ziwwe dəka dəzən na gəlamatuya nawzla tursan.

¹² Ulan ləŋgə, kiy Zakari zlərwiyə, geslne' armaka.

¹³ Yaŋ maslay aɓsən na: Kəgeslne ɓa, Zakari, vi əkkam nok aprəmka. Guluk nok Elizabet watəwəsuk wiyna, kəlvan gən na Yohanna.

¹⁴ Wakərah ənneke də əpepɗeke, ɗiy diyɗa wannekenin zit də uwa nani.

¹⁵ Vi wasan metiŋ aba Daya. Asə na mbazla net megezlembirkeɗ ɓa, mbazla məhə̃sən ɓa. Waknah də zeŋgile salala səddəvət mani.

¹⁶ Wamilgit mə israyelɗe diyɗa aza Daya, Maŋgəlva neti.

¹⁷ Wadaw aba Daya də əmpəsa gəm əɓap na Eliya, vi kawmilgin mekret efiŋgiɗit kirin ezet kirtiti, məɓoŋgit tam dəɗɗumoŋgən va ɗiy təstəsə, vi kawzeɓet ɗiy nawga Daya.

¹⁸ Yaŋ Zakari anah sən maslay na: Mbarmbari nədawsənən na wagəɗ gesiŋ di? Vi naw nəgalək səkay, ɗak naw tam təndak əzva.

¹⁹ Maslay azlan sənək na: Intə Gabriyel aba Maŋgəlva nədawsawa vi kawgəɗ sən wəza. Məslənu na, vi kawpel suk gəm kawnah suk alabara neneke.

²⁰ Awle hərzlumuk warəhmə, kəɓap na əpel ɓa hã pay zəgeɗis adaɗɗaŋgə vi kətaf əpel naw məs dədaknəh də pay nan ɓa.

²¹ Pay nan ɗiy tahəŋ wəganən Zakari. Aggətaŋgək aka əlya nan addəv Gəla na Maŋgəlva.

²² Adan agili dəɓap əpel sit ɓa, asənənək na tay an awəl addəv Gəla na Maŋgəlva. Ndən təŋ əpel sit goryom goryom, asanək man ŋgba'ə.

²³ Adan pay na wəza nan agrakə, ndən mbat eŋgil ananda.

²⁴ Dərɓagan əvoŋ siɗikke, Elizabet ɗak nan ta' daway, təɗamanək gap təla sle. Tənah na:

²⁵ Vaŋ Daya agəɗ suwa. Atorik wil səraw səwaleŋgit ɗiyi.

Maslay tay ərban uwa na Yesu

²⁶ Aka təla masləreni, Maŋgəlva aslənək maslay nan Gabriyel a walaŋgəla-metiŋ məs adawyaŋ na Nazaret aka dələv na Galile.

²⁷ Azat waŋ gbuɓɓo, akən məs ɗəf adawyaŋ Yosef adawkaya, gabbet may Davit. Iya nat waŋ vat na Miryam.

²⁸ Maslay toŋ a maŋgavata, yaŋ amna: Anneken zuko, is məs kərah mbəlembəle, Daya tay də isi.

²⁹ Wəsɗa nan agəgrəŋgatəka, tat əɗɗumon va əsɗa vanəs aŋgəl ənaha.

³⁰ Maslay aɓsət na: Kəgeslne ɓa Miryam, vi kərahək mbəlembəle səza Maŋgəlva.

³¹ Wakəɗi daway, wakəwə wiyən mizilin, kəlvangən na Yesu.

³² Wasan metiŋgini, kawyani na Wətən Məsəɗəɗə. Daya Maŋgəlva wapsən mazaŋga na məlĩ Davit afəni.

³³ Wazəm məlĩ aka gəla na Yakob hã faɗə, əzəm məlĩ nan agrak na ɓa.

³⁴ Miryam təɓsən maslay na: Mbarmbari zəgas adaɗɗa adan nəsap də ɗəf mizilin ɓaŋ di?

³⁵ Maslay azlani, aɓsət na: Zeŋgile Salala wade akoko, əɓap na Məsəɗəɗə wade əsərətuk də zeŋgile nani. Vi vaski wiyən məs kədawa wasan Salala, kawyani na Wətən Maŋgəlva.

³⁶ Awle Elizabet həlfuk təɗiyək daway na wəyən mizilin aka əgal nata, təla masləren nat yaŋka ndət məs adawyaŋ lahəŋ na ndarzlaykə.

³⁷ Vi zəga tay məs Maŋgəlva aɓap na ɓa ɓa.

³⁸ Miryam təmna: Balamək na Daya yakəŋkə, dəgəɗ suk va əpel noko. Yaŋ maslay appata, ambat səzata.

Miryam tat əmbat ulət Elizabet

³⁹ Dəpaska'e ləŋgə, Miryam təsilke təmbatək də kakara aka vadələv na walaŋ gərəm a walaŋgəla-metiŋ na Yuda.

⁴⁰ Ndət toŋ ana Zakari da, təsɗat Elizabet.

⁴¹ Səza Elizabet təprəm əsɗa nat Miryam, wiyən aɓələk addəvta. Elizabet təknahək də Zeŋgile Salala,

⁴² yaŋ təŋgəsl vaŋvəl dayadaya, təmna: Əzaɓ akok sə walaŋgit gil, əzaɓ aka uwa naddəvko!

⁴³ Naw nawat nan kan ma Daya naw tədegən anawdaŋ di?

⁴⁴ Vi səza nəprəm əsɗa noko, wiyən aɓələk sən ənnek səddəvwa.

⁴⁵ Əzaɓ akat akən tətafa, vi an Daya anah sət, waknahə.

Gəlya məmyã'ən nat Miryam

⁴⁶ Miryam təmna: zeŋgilew tat əgagdakan Daya,

⁴⁷ makraw tay ənnek də Maŋgəlva, məkõhguwa.

⁴⁸ Vi aziyək haran akat balamək nan akən ɗarə. Awle, kakaŋ na, sayit ɗiy pak wənahaŋ suwən na məs əzaɓ akata,

⁴⁹ vi Məzuɓap agəɗ suwək zəgeɗ gagdakɗe. Salala yi iya nani,

⁵⁰ ulasahã nan tay əzban sayit ɗiy məzugeslne' sənən va amə'ə.

⁵¹ Apparək gbogboŋ na vani, andolik məs əɗɗum nawkaɓ aketi.

⁵² Aprigitik məlyeŋge səka mazaŋga na məlĩ neti, aɓaygitik məzuɓe'gənən kiyti.

⁵³ Abetik ɗiy en də mãy də arya. Arɓihik məsaryeɗ mbataŋ vet mekeleŋ.

⁵⁴ Adek əbbah sən Israyel maslən nani, aɗɗumonək ulasahã nani,

⁵⁵ va anah sit efiŋgiɗmə, sən Abraham gəm sən zeŋvin hã faɗə.

⁵⁶ Miryam təsatək dət Elizabet gap zəga na təla hoku, siske na ndət həmndak eŋgil anat da.

Uwa na Yohanna məgəɗ baptem

⁵⁷ Pay nawa nat Elizabet gapə, ndət bok wiyna.

⁵⁸ Meggeŋgiɗət dit hilfiŋgiɗət aprəmənək na Daya agəɗ sətək moggon diyɗa, annekenənək zit dənta.

⁵⁹ Adan əvoŋ madodopoɗon agapə, addoŋguk əskələn awra, aŋglaŋ əlvan na Zakari va iya na afəni.

⁶⁰ Yaŋ man təzlani, təmna: Awwo, kawyani na Yohanna.

⁶¹ Aɓsətən na: Ɗəf tay səmmbet hilfiŋgiɗuk məs də iya vas ɓa.

⁶² Yaŋ apeleŋ sənən afən də veti, vi kassohon va aŋgəl əyani.

⁶³ Zakari aŋgələk kalaɓkə, avere amna: Iya nan na Yohanna. Ɗiy pak aggətaŋka.

⁶⁴ Gətgətəs ləŋ man akol gəm hərzlumən apələ, atəŋ əpele, agagdakan Maŋgəlva.

⁶⁵ Gəslne' armək ɗiy də gəla kiyin tərwəsl pakə. Aka kivadələv naggərəm na Yude pak tay əpeleŋ aket zəgeɗ dətoŋgoŋgiski.

⁶⁶ Məs dəprəmən wənəs pak tay əɗɗumonən pay pakə. Tay ənahaŋ na: Wiynəŋ kan ka mi adawsan di? Vi va Daya tay akani.

Gəlya na kəleŋ na Zakari

⁶⁷ Zakari afən wiyən nak aknahək də Zeŋgile Salala. Agəɗək kəleŋ, amna:

⁶⁸ Soko sən Daya Maŋgəlva na Israyel vi azlgək sləma aket ɗiy nani, akõhgitike.

⁶⁹ Agilgənək Məzukõhgəm gagdak səddəv gəla na Davit gawla nani.

⁷⁰ Va məs anah lahəŋ də met məskəleŋɗe nan salala.

⁷¹ Əkõh məs dədawpələm səvet məzuzelməni, mãy səvet məzuzeleməni.

⁷² Arbanək ulasahã nan aket efiŋgiɗmə, də əɗɗumon wənmiyna salala nani,

⁷³ va asway sən Abraham afəmə, vaski adapsəmə;

⁷⁴ dərɓaga akõhgəm səvet məzuzelɗe vi məɓapgən əgagdakan məza də geslne' ɓa,

⁷⁵ addəv salala gəm təstəs abani, addəv ənziya nam pakə.

⁷⁶ Noko, wətuwa, kawyuki na məskəleŋ na Məsəɗəɗə; vi wakədaw aba Daya vi kawzeɓet tiveɗ nani,

⁷⁷ vi kapsit əsən na əkõh sit ɗiy nan də əvvuyon mambray neti,

⁷⁸ sən mbəlembəle na ulasahã na Maŋgəlva namə. Ndəndəni pay məzugilyen adawkasak akam hã sə disiŋ,

⁷⁹ vi dəkasakgin ɗiy en nara guzli dit en nara zeŋgile na əmta, gəm vi kawdawgən tələm aka tive na zazaya.

⁸⁰ Yohanna aɓayka, maɗulan asəɓka. Asanək a kapta-muyã hã gap pay arban zən abet ɗiy na Israyel.