Kolosi 3 - Bible en Guidar

¹ Adan kan məsilgukumi səka əmta də Kristu, vi vaski məkeyet zəgeɗ en na disiŋ, a təki Kristu asan aka va dəzəŋ na Maŋgəlva.

² Məɗɗum aket zəgeɗ en na disiŋ, məza aket zəgeɗ naka dələv ɓa.

³ Kəmtaŋka ya zeŋgilokum tay məɗaman də Kristu aza Maŋgəlva.

⁴ Kristu wi zeŋgilokum, an arbanək zəni, nokum pak wakərbanən zukum dəndən addəv gagdaka.

Ənziya an məzvani gəm ənziya meleketeni

⁵ Məbay zəgeɗ negge naddəv gəɓa zukum, polkoyo, mbərayən, mãy na zəga diyɗa diyɗa, əŋgla mbərayən gəm mamayã net deleɗi (mamayã net deleɗ van məstaka yi də əzban zəgakamaŋgəlva.)

⁶ Sən wən net zəgeɗiski ədagəɗəv na Maŋgəlva adazzan aket ɗiy məza aprəmən man ɓa.

⁷ Nokum pak, addivit zəgeɗ vas kədawaŋ lahəŋka pay kəssoŋ addivti.

⁸ Ya kakaŋ na, nokum van məppet zəgeɗiŋ pakə, ədagədəva, herɗe, əɗɗa daraw, ərma mama, wən net wil adawgilyen səmokum ɓa.

⁹ Kədawaŋ wən sən zukum ɓa, vi kəggbukunək ɗəf məzvan də zəga naɗɗa nani.

¹⁰ Kugulunək ɗəf meleketeni, məs dədawnduf kawgap aza əsən an gərrakə kawgilye va məs dəzəməɗa.

¹¹ Eskiŋ na zəga tay duɗakan gərek də mə Yuda ɓa, məs dəskəlawra də gayã ɓa, məs dukol haran ɓa də məs dukol harani, balam də ɗəf an na kiyən ɓa, Kristu wi zəga pak addəv zəga pakə.

¹² Vas na, adan Maŋgəlva awelkumuk kəssoŋgən salala gəm məŋglukum, mugul ulasahã, əɗɗa moggoni, əɓe'gən kiya, məza ki ɓəɓəl ɓa, gəm əɓəsa.

¹³ Məɓəs sən sən zukum. An ɗəf taka sərokum tay də wən aka ɗəf maɓɓani, məgəɗ mbəlembəle a walaŋ zukum; va Daya agəɗ sukum mbəlembəle, nokum pak məgəɗ vaska.

¹⁴ Aka as pak na məssoŋ də əŋgla, ndəni helege na əsap an gərrakə.

¹⁵ Zazay na Kristu dəzəm məlĩ a mokrokum, məs məyukum akan kəssoŋgən gəɓa zukum taka. Məgəɗ sən soko.

¹⁶ Əpel na Kristu dəsan a walaŋkum də ərəh nan pakə, məyagan gəm məbbah sən zukum də maɗɗula. Məyə sən gəlya sən Maŋgəlva də mokrokum, gəlyanalva, gəlya gəm gəlya dəde səza Əmpəsa.

¹⁷ Məs kədawɓap əpeleŋgi awaniɓa an kədaɗɗaŋgə, məɗɗa də iya na Daya Yesu, də əmndan soko dəndən sən Maŋgəlva Afəni.

Əssa net ɗiy addəv ənziya meleketeni

¹⁸ Munokum gili, məɓe' sit zilgiɗkum va an dəslə aza Daya.

¹⁹ Munokum zeli məŋgliw gil nokum kədawbayaŋ sitin gagay ɓa.

²⁰ Munokum kirni məprəm met migilkum addəv zəga pakə, vi as neki aza Daya.

²¹ Munokum efiŋgiɗti, kədawdan sitin gədivit kirtukum ɓa, vi maɗɗulet adazlzlaɓ ɓa.

²² Munokum belemɗe məprəm met deyeɗe nokum naka dəlvəŋ addəv zəga pakə. Kədaɗɗaŋ ama heret kaka vi zit dənnekgən ɓa, ya mokrokum dəsan zayə, məgeslne' sən Daya.

²³ An kədaɗɗaŋ pak dəde səza megenegenekum, va sən Daya məza va sit ɗiy ɓa,

²⁴ dawsənən na, səza Daya kədawrəhaŋ zəga na vokum nawzəmgəla. Məgəɗ sən wəza sən Daya Kristu.

²⁵ Ɗəf an dəraygəni, an araygən adawbəla vi Maŋgəlva aɗɗa uɗak ɓa.