Kolosi 2 - Bible en Guidar

¹ Nəŋgəl na, kəsənəngən əgay metiŋgin məs nədawgay ammbokum, ammbet ɗiy na Lawdikiya gəm ammbet en duluwən ɗah ɓa.

² Vi kasɓan mekreti, dəssoŋgən məslerit addəv əŋgla, məknihit də ərəh na əsən an gegesiŋ, dəsənəngən wən məɗama na Maŋgəlva ana Kristu.

³ Addəvni ərəh na maɗɗula gəm na əsən pak aɗamaŋgə.

⁴ Nədawnəh vasna, vi ɗəf adawmbəɗokum də əpel na ma nenek ɓa yi.

⁵ Də gəɓa zu tay azokum ɓa zlaŋ, maɗɗulaw tay də munokum, zu neki dawla ənziya moggon a walaŋkum gəm əziw ɓəlɓəl nokum addəv ətaf Kristu.

Ərəh zeŋgile addəv Kristu

⁶ Adan kətafənək Yesu Kristu Daya nokum, mədaw addəvni.

⁷ Məmpa suwerkum gəm məziwgin zeŋgilokum akani, məziw ɓəlɓəl addəv ətaf va aza məs kəyaganəni, məgəɗ soko sən Maŋgəlva.

⁸ Məzi zukum ɗəf adawmbəɗokum də zəga nawsən nan diyɗa gəm də zəga narba ɗar mekeleŋ məs dəde səza əɗɗum net ɗiyi, dəziw aka əsən dəde səgge, məza səza Kristu ɓa ɓa.

⁹ Vi addəv gəɓa zə Kristu gərak na Maŋgəlva asani.

¹⁰ Dəndəni kərəhən zəga pakə. Daya yi aket deyeɗe gəm migil gagdaka.

¹¹ Addəvni kəskəlaŋawra, əskəlawra məs məɗɗan də va ɗəf də ərəŋgən gəɓa zə ɗəfi ɓa, əskəlawra məs dəde səza Kristu yi.

¹² Adan məndəkkumi dəndən addəv baptem, addəvni yi'e kəsilyoŋ səka əmta də ətafa, də wəza na Maŋgəlva məs dəsilgin səret ɗiy mimtiti.

¹³ Lahəŋka məmtukum kənanən viyit heslepeɗe nokum gəm gayã na gəɓa zukum, Maŋgəlva apsukumək zeŋgile dəndəni, avviyet sukumək heslepeɗe nokum pakə.

¹⁴ Aŋgarək ɗerewel na dəmən məzuzəm kiyəm naka, yaŋ azan də əkkpa'ən aka məzliwrihe.

¹⁵ Aggbukik deyeɗe dit gagdakɗe na disiŋ, arbə sitik wil abet ɗiy pakə, askak wəlet addəvni.

¹⁶ Ɗəf adawtaw wən akokum aka wən na waya, aka wən na əsa, aka wən na əzləra, aka wən na təlaper awaniɓa aka wən na pay naffet ɓa.

¹⁷ As pak na, zəga məs dədazzan adarban kaka'ə, ya gegesiŋ nan addəv gəɓa zə Kristu wi.

¹⁸ Ɗəf adawtaw wən akokum aka wən na əɓegən ki zə ɗəfa gəm wən na əgagdaket maslayɗe ɓa, tay əɗiyən kiyit aka ula məs awlaŋgə, yaŋ adagagdakanən zit də tive na əɗɗum na ɗəfa.

¹⁹ Appanənək əsler də Kristu ki əsap net məkristu, məs gəɓa zə ɗəf pak asap azan slersler əzəm dit mesleŋsleŋɗe gəm bəletɗe, yaŋ adawɓay va Maŋgəlva aŋgələ.

Zeŋgile meleketen addəv Kristu ( 2:20—4:6 ) Əmta gəm əssa madaram də Kristu

²⁰ Adan kəmtaŋgək də Kristu, faraɗa kənanaŋ dit zəgeɗ negge, vimi kədanziyaŋ va ɗiy negge kədawɓe'eŋ sitin əsərəkɗe zeŋvit eskis əmpa di?

²¹ Kədawrəŋgən ɓa, kədawnen ɓa, kədasap dəndən ɓa.

²² As pak awəl sitik zəgeɗ naŋgəna an məɗɗay wəza dənɗaŋgə, əsərək gəm əyak dəde səzet ɗiyi.

²³ Zəgeɗiski tay ulaŋ va zəga na maɗɗula, vi tahəŋ əpel aka wən na əzba va ɗəf aŋgəl sən kiyni, aka əɓe'gən ki zə ɗəfa, əzəmgən sahã na zə ɗəfa, atəraŋ wəray abbər ki ənneken gəɓa zə ɗəf ɓa.