Kolosi 1 - Bible en Guidar

Ətoŋ addəvən ( 1:1-8 ) Wəsɗa

¹ Səzet mãy Pol maslən na Yesu Kristu də əŋgla na Maŋgəlva, gəm Timote məlməmə.

² Sit ɗiy salala na Kolosi, milmiŋgiɗəm en dəssoŋ təstəs addəv Kristu. Mbəlembəle də zazay na Maŋgəlva Afəm dəsan də mənokum.

Əkkam nawfete

³ Mənam tat əfet aka Maŋgəlva Afən Daya nam Yesu Kristu, mənam tat əkkam aka wən nokum pay pakə.

⁴ Məprəmək wən na ətaf nokum kətafən Yesu Kristu, gəm əŋgla nokum viyit ɗiy salala pakə,

⁵ məs dəziw aka əga nokum məzaɓan a disiŋ, məs kəprəmaŋ daabəŋ addəv əpel na gegesiŋ na Alabara Neneke,

⁶ məs dəgap anokumda; tay ənzləra gəm əɓay ammba dələv pakə, vaski yi'e anokumda, təŋ səza pay məs kəprəmnən gəm kəsənnən mbəlembəle na Maŋgəlva addəv gesiŋ nani.

⁷ Va kəprəmnən səma Epafras baynam na makram məgəɗ wəza də mənamə, məgəɗ wəza na Kristu dəsənmokumi.

⁸ Ndəni dəboton səm wən na əŋgla nokum addəv Əmpəsa.

Kpak na Kristu gəm əpel nani ( 1:9—2:19 )

⁹ Sən aski, təŋ səza pay nam məprəm wən nokum, məppan gabba əkkam vikum ɓa. Mənam tat əkkaman Maŋgəlva dəknahkumgən də əsən an gərak na əŋgla nani, dəpsukum maɗɗula gəm əsən də Əmpəsa.

¹⁰ Asna wakəɓap ədawaŋ va Daya aŋgələ, də əkayan an nannek zən addəv wəza moggon nawtərwəraya gəm əɓay addəv əsən Maŋgəlva.

¹¹ Kəssoŋgən də əɓap addəv zəga pak va aza əɓap na gagdak nani, vi kəmpanəngən təlkum əɓəsən də ənneke,

¹² məgəɗ sən soko sən Afəni, məs dəkkpaŋgokum də əɓap nawrəh haran nokum səza an məzaɓan sit ɗiy salala addəv əkeɗeɗe'e.

¹³ Ndəni dəgilgəm səra gagdak na guzliyo, atoŋgəm addəv məlĩ na Wətən an məs aŋgələ.

¹⁴ Dəndəni mərah əbit kimə, də əvvuy net mambrayɗe namə.

Kristu zək nani gəm wəza nani

¹⁵ Agilik səɗek va Maŋgəlva məs awlanən ɓa, maddaabəŋ na an məzəməɗən pakə;

¹⁶ vi dəndəni Maŋgəlva azəməɗ zəga pakə, a disiŋ də aka dəlvafuŋ pakə, an hara ɗəf adawla də an hara ɗəf awlan ɓa pakə, dəssoŋ mezeŋgeɗ na məlyã, gagdak net deyeɗe, gagdakɗe, əɓapɗe pakə. Zəga pak dəndəni gəm səni məzəməɗən.

¹⁷ Ndəni daabəŋ kiyit zigeɗ pakə, dəndəni zəga pak asan a gəlani.

¹⁸ Ndəni ki zə əsap net məzutafaŋgə, ndəni ətəŋga, maddaabəŋ səret ɗiy mimtiti vi dəsangən maddaabəŋ addəv zəga pakə.

¹⁹ Vi addəvni Maŋgəlva awla lew an gərrak dəsangəni.

²⁰ Dəndən aŋgəl əsleren zəga pak də zək nani, səza aziwgin zazay dit mbel na məzliwrihe nani, dəssoŋ zəgeɗ naka dəlvafuŋ, dəssoŋ zəgeɗ na disiŋ zlaŋ.

²¹ Nokum, faraɗa kənanaŋ lahəŋka, məzuzelɗe, addəv əɗɗum də wəza nokum mbərayən.

²² Ya kakaŋ na, aslerekumək də zək nan addəv gəɓa zə Wətəni, də əmta nani, vi karbokum salala məza heslepe ɓa gəm məza nawrəh əpel akokum ɓa abani,

²³ an mənokum tat addəv ətaf ziw ɓəlɓələ, məza əppan zukum əkukum faraɗa səza əga na Alabara Nenek məs kəprəmaŋgəŋ ɓa, məs məpel wən nan aza an məzəməɗən naka dəlvafuŋ pakə, məs in Pol nəkkpaŋ məgəɗ wəza nanəŋka.

Əslən an məslən Pol ammba əsap net məzutafaŋgə

²⁴ Kakaŋ in tat ənnek addəv tatwãh naw vikum, in tat əknahan tatwãh na Kristu an dəpəl addəv gəɓa zuwa ammba gəɓa zəni, ana əsap net məzutafaŋgə,

²⁵ məs naw nəkkpaŋgək məgəɗ wəza nan va aza an Maŋgəlva avayə vi kaknahan əpel na Maŋgəlva vikum,

²⁶ ana wən məɗama məs dəɗam farfar pay na seyit ɗiy pakə, məs Maŋgəlva arban kakaŋ sit ɗiy salala nani.

²⁷ Maŋgəlva aŋgələk ərban gagdak na wən məɗama nan metiŋgin məs azaɓan viyit ɗiy-ɗar pakə, ndəni Kristu məs na mokrokum, əga na gagdaka.

²⁸ Ndəni kan mədawpel wən nani, mədassak sit ɗiy pakə, mədawyeget ɗit pak də maɗɗula, vi kawziwgin ɗəf pak gərrak addəv Kristu.

²⁹ Vini nədawzəm sahã əgay əɗɗa wəza də gbogboŋ nan məs dədaɗɗa wəza də in a makrawa.