Isaya 9 - Bible en Guidar

¹ Ɗiy məzudawaŋ ara guzliyo awlanənək əkeɗeɗe metiŋgini. Ɗiy məssoŋ aka dələv namta də tiɗimtiɗim nani, əkeɗeɗe wakekeɓe aketi.

² Kənzlərgitik ɗiyi Daya kəɓaygənək ənnek net metiŋgini. Tahəŋ ənnek abok va ənnek pay na mawala, va adannekeŋ də ənzla vaŋvəl də uɗak zəga mərahən səddəv əgaya.

³ Vi kəŋzləwək zuk dəsan sit gədakə, zleŋge na mawəleti, gəm tandaŋ nargeti, va kəɗɗa far aka pay net Madiyanɗe.

⁴ Vi hensek na məzuzel məzəkkergin dəlvafuŋ, gəm lukut məs də mbel azan pak wakkpaŋgaŋ zəga nawzəm na offo.

⁵ Vi məwəsəmi wiyna, məpsəmi wiyin mizilin. Gagdak na məlĩ tay akani. Kawyani də iyaŋka: Məzusəɓ sən ɗəf va ndən tuwãhə, Maŋgəlva gbogboŋgo, afən an faɗə, Daya na zazaya.

⁶ Waɓaygən gagdak na məlĩ nani, wapsən zazay gəm əzəm məlĩ məza əgrak ɓa sən Davit. Wasɓan aka məlĩ nani, watawwən net ɗiy təstəs aka tiveni, təŋ kakaŋka hã faɗə, aski an Daya Məzuɓappak adaɗɗa addəv əŋgla nani.

Daya tay əslan van narga

⁷ Daya azkanək əpel nan aka Yakob, yaŋ abət aka Israyel.

⁸ Ɗiy pak asənnənka, va na Efrayim bayman gəm ɗiy na Samari də əkaɓ net gəm də əɓaygən kiyzit dawnahaŋ na:

⁹ menekeɗe ɗar dəbzlaŋgə, waməmsak ərkan dit gərmeŋge məslmeti! Məbiltiŋ korvoŋɗe waməddiɗet dit muguguleɗ na Liban!

¹⁰ Daya wasilgit məzuzelɗe na Israyel en na Resin akani wahheɗet məzuseɓɗe nani.

¹¹ Səmmba pay nampum Aram, səmmba pay na moskoyo mə Filistiɗe. Wazəmən Israyel hã met zlovroŋ zlovroŋgu. Də as pak zlaŋ na, dəppan ədagədəv nan ɓa, van tay təlla aka ərga.

¹² Də as pak ɗiy dəmilyoŋ aza məzuvərit ɓa, dəkayanən Daya Məzuɓappak ɓa.

¹³ Yas Daya arsla kiya də kutur sə Israyel kiva gogozlo gəm vəlar aka pay taka.

¹⁴ Ɗəf məsɓan də gagdaka ndəni dəsan kiya. Məskəleŋ mərbə wən na uwa wəna, ndəni kuturo.

¹⁵ Ɗiy məzədawgitin azetinike, ɗiy en adadawgitin azaŋka.

¹⁶ Vini kan Daya annek na dit kirin gewleɗ nadak ɓa, awəl na sãhã aket mitiweɗ gəm gil net gəbayɗe ɓa. Vi mə ɗarɗarən pakə məɗɗaŋ mbəraynəŋgə; an adawpeleŋ pak wən ɗari. Də as pak dəppan ədagədəv nan ɓa, van tay təlla aka ərga.

¹⁷ Vi daraw arma offo va gedirge də tintif, məzərma offo əkan addivit wəleŋɗe ŋgərəɓə gəm kawpeŋgit enene tirliŋtirliŋ a disiŋ.

¹⁸ Addəv herɗe na Yawe Məzuɓappak, dələv azləka; ɗiy tahəŋ va zəga nawzəm na offo: ɗəf tay dədappan məlmən ɓa.

¹⁹ Tay ətawaŋ səka dəzəŋ, may dəppan ədet ɓa; tay əzəmən mbərən naka vet zlaɓay, ya awbaŋ ɓa. Naway pak tay əmpər meggeni:

²⁰ Manase əmpər Efrayim Efrayim tamə əmpər Manase, ndəɗaŋ sulegit sap a Yuda. Də as pak dəppan ədagədəv nan ɓa, van tay təlla aka ərga.