Isaya 8 - Bible en Guidar

Iya na wətən məskəleŋ

¹ Daya anah suwək na: «Agəm kalaɓ metiŋgin nawver akani, aver əver an ɗiy adaprəmaŋ akan də mabəl Maher Salal Has Baz», va ənah na: Agəm zuk ammba ərəh namawgaya, agul zuk addəv popoho.

² Nəgimik may Uriya məsdəlva gəm Zakarya wətən Yeberekiya ka miziweɗe naw en təstəsə.

³ Nəsawək dət məskəleŋgək ɗak nawa. Təɗiyək daway, təwək wiyna. Ndəni Yawe anah su na: «Alvan na: Maher Salal Has Baz.

⁴ Vi tak wiyən van dəsəngən ənah na əbba awaniɓa əmma na, kawkani arya na Damas gəm ərah səma əgay na Samari sən məlĩ na Asiri.»

Asiri aguluk təkiya

⁵ Yawe azbanək əpel su əmpa amna:

⁶ Ɗiyiŋ tahəŋ əzeletin iŋkile na Silowe, məzədawaŋ sanana; ya tahəŋ əkker sitin may Resin gəm wətən Remalya.

⁷ Vi aska, Yawe waki iŋkile na məlpa diyɗa də gəgay aketi ndəni məlĩ na Asiri də gagdak nan pakə, məlpa van waknahə wasulup mabuzgumɗe nan pakə,

⁸ Wagul Yuda, wasulup sulupu, wagap hã aza wəla ɗəfa. Persleken məpparən watəsl slosloprok na dələv noko, Emanuwel.

An ɗiy aɗɗumoŋ naɗɗa ɗari

⁹ Məssahan zukum ɗiyi, mokrokum dəzlahə; məpak sləmokum mənokum naket dəlveŋge en ɓa'ə: Miynan dadakkum, mokrokum dəzlahə. Miynan dadakkum, mokrokum dəzlahə.

¹⁰ Miynan an naɗɗa, wazlzlaɓə. Məpel va kədawpeleŋ pakə, ya agəɗ na ɓa, vi Maŋgəlva tay də mənamə.

Gərəm nawtaŋgbaygən ɗəfa

¹¹ Vi Yawe anah suwəka, va kəɓəs na də va ɗəf mərmuwa, azga suwək nədazban tive net ɗiyis ɓa dawnəh na:

¹² An ɗiyis pak adawyaŋ na wən mətuvuro kədawyanən wən mətuvuro ɓa kədawgeslne'eŋ sən an adawgeslne'eŋ sənən ɓa, mokrokum adawzla ɓa.

¹³ Yawe Məzuɓappak ndəni kədawsənaŋ ka Salala; ndəni nawgeslne' səni, anani mokrokum adawzla səni.

¹⁴ Wasan ka gəlamatuya gəm ka gərəm nawki gəbaya, ka milɓe nazlbe milyẽŋge na Israyel sulegiti, ka mazzaɗ gəm bizwil abet ɗiy na Yerusalem.

¹⁵ Ɗiy diyɗa wataŋgbãyaŋ akani, waskotoŋgu, wanzlaŋgə, watoŋgoŋ addəv mazzaɗə warmaŋgə.

Pay nassa ɓatɓatə gəm nawga

¹⁶ Arma wəna, aziwgin mahenziŋ aweleŋgit gewleɗ nawa.

¹⁷ In tat əga Yawe məs dəkkpaŋgan haran faraɗa səka gəla na Yakob, ya akan nəɗi əɗɗum nawa.

¹⁸ In yakəŋ dit kirin məs Yawe avayə, migilik va zəga narba gəm va sekene nazzan səza Yawe Məzuɓappak a Israyel, ndən məs dəsan aka mossorgo metiŋ na Siyon.

¹⁹ An tay ənahaŋ sukumən na: Məddoŋ ule məɗɗaŋ tetele gəm məskan heligi, ndəɗaŋ məzəɗɗaŋ fofyoko gəm məzəɗɗaŋ ŋgburŋgburu. Namna ɗiy pak awlanən maŋgəlva net gəm əpel dit məzvefɗe aka wən net ɗiy mederet ɓa sa?

²⁰ Məzlan sit na: Məprəm mahenziŋ gəm əpel na Maŋgəlva. An kənah sitin vas ɓa, ɗəf tay nawla bapummo səmmbet ɓa.

Guzli tiŋgbizlim

²¹ Wabbalaŋ aka dəlva, ɗəhət-ɗəhət, gidivit foŋgo. An may armeke, gidivit wadə, waranən məlyã gəm Maŋgəlva neti. Waslanən heret a disiŋ

²² Asna wawlaŋ kəlafuŋ, tatwãh yi adawlaŋgə, guzli titir tiŋgbizlimi yi, dəfəɗi yi məza təki wehhe ɓa.

²³ Vi ɗəf məs dəfɗəs abət akan na akõh na ɓa. Addəv pay an dətongu, Yawe arbək wil sən dələv na Zabulon də dələv na Neftali. Addəv an nazzan hara na, waɗi kiyit hã səka tive nama pehe dəgar ki məlpa na Yurden gəm aka dələv net ɗiy en dəsənaŋ Maŋgəlva ɓa assoŋgu.