Isaya 7 - Bible en Guidar

Alabara sən məlĩ Akaz

¹ Aka pay Akaz wətən Yotam, dəhən Oziyas, asan məlĩ na Yuda, Resin, məlĩ na Aram adek də Peka wətən Remalya məlĩ na Israyel əgayaŋ də Yerusalem. Ya dəɓapən əgay dəndən ɓa.

² Yas məprəman sən Akaz zev Davit də wənah na, ɗiy na Aram na ateheŋgik a Efrayim. Makra məlĩ dit ɗiy nan aɓələk va wəleŋɗe ŋgərəɓ məs səmyã adaɓleti.

³ Yawe aɓsən Isaya na: Agil ɗa, is də wətuk Se'ar-Yasub kələmsəngən Akaz; tay a metteɓ ma təki məborən səma bobok, aka tive nawmbat a guli na Məzəskoɓo.

⁴ Kənah səngən na: Asla zuko! Asok ɓatɓatə, kəgeslne ɓa, kədawŋgəm əppan mokrok əddak səbet motoffoɗe sula məzuzlaŋgən ɓa, səba ədagədəv net may Resin ɗəf na Aram də wətən Remalya ɓa.

⁵ Adan Aram, Efrayim gəm wətən Remalya aziwgininik a mekret nawgəɗ suk mbərayən dawnahaŋ na:

⁶ Məlgən əgay də Yuda, məzlahgəngən makrani, mədoɗ səm kiyən vi dəsapgən azamə, məɗigən wətən Tabe'el məlĩ nani.

⁷ Vaŋki an Daya Yawe anahə: Agəɗ na ɓa, asan na ɓa.

⁸ Vi ki Aram na Damasi, ki Damas na Resin; addəv wəzva kaklaw sləre kiyən sle' abeŋ na ɗiy wassoŋ addəv Efrayim ɓa.

⁹ Vi ki Efrayim na Samari yi, ki Samari na wətən Remalya yi; an ətaf nokum tay ɓəlɓəl ɓa na kəziweŋ na ɓa.

Emanuwel

¹⁰ Yaŋ Daya azban əpel sən Akaz də wənah na:

¹¹ Attok zəga narban azan səza Daya Maŋgəlva noko. Dəsan sə təki kpumkpum na təki nassa net ɗiy mimtiti awaniɓa səkəla disiŋ hã sə disiŋ.

¹² Yaŋ Akaz azlanək na: Awwo, zəga tay nədattok ɓa; nəsla na Daya ɓa.

¹³ Yas anah na: Kamə aprəma, gəla na Davit. Gəsi kəyetin ɗiy hara kəyanəngən Maŋgəlva nawa'e sa?

¹⁴ Vini kana, Daya zək nan wapsukum zəga narba azani: Awla waŋ ŋgbuɓɓo watəɗi daway, watəwə wiyna. Watəya iya nan na Emanuwel.

¹⁵ Wazəm mẽl naka moŋvo də amama, hã ndən gap əsən əzel zəga mbərayən gəm əwel an moggoni.

¹⁶ Tak wiyən van dəgapgən nawsən əzel mbərayən gəm əwel moggon na, ɗiy naket dəlveŋge sula məs kədawgeslne' sit milyeŋge net nak wappanəni.

¹⁷ Daya waki pay na tatwãh akoko, aket ɗiy noko gəm aka gəla na afuko hara, zeŋvin dəgəɗ ɗah ɓa daga məlĩ na Efrayim arsla kiyən səza Yuda. Waɗɗa də va məlĩ na Asiri.

Əgul təkiya gəm an adawkiya

¹⁸ Pay dəpaska, Yawe, waffu kawye zikɗeɗ naket məɗɗaraɗe na Eziptə gəm sən amama naka dələv na Asiri.

¹⁹ Wazzongu, wassoŋ pak a təki məpəlayya məs iŋkile akeren dawdawa gəm addəv poporit gərmeŋge, addivit geslembeɗ məs degirge azet pakə də a təki nawsa iŋkile net zəgeɗ pakə.

²⁰ Pay dəpaska, Yawe waŋgəl slambər sə təkaɗ ki məlpa vasna məlĩ na Asiri warban wəɓoŋ nokum də wəfaɗ kiykum, ki buhkum gəm eŋgeme pak wafeɗe.

²¹ Pay dəpaska, ɗəf pak wazgəl bəlata gəm gilew sula,

²² sən moŋvo adawkiyaŋ diyɗa kawzəmi mẽl naka moŋvo. Ɗəf an dəpəl aka dəlvəska mẽl naka moŋvo də amama adawzəma.

²³ Pay dəpaska, təki məs tilit megezlembirkeɗ asan gabal nawki təbəz babar gabal wakkpaŋ təki net tintifɗe gəm gedirgeɗi.

²⁴ Kawtoŋ adak na, də bəle gəm dit herɗe. Dələv dəwənnan wakkpaŋ dit degirge gəm dit tintifɗe.

²⁵ Mossorgoɗe gugriɗ məs ɗəf adanse də bardaw pak kawɓapi əmbat adak ɓa, sən geslne sit tintifɗe gəm gedirgeɗi. Kappeti wasliɗe dit gilew dəndepetingini.