Isaya 66 - Bible en Guidar

Məzəzba təstəs gəm məs azba təstəs ɓa

¹ Vaŋ Yawe anahə: Disiŋgi mazaŋga na məlĩ nawa, dəlvafuŋ tamə təki nawɗi təlwa. Gəla mi kədarkaŋ suwən di? Təki mi gala naffet naw di?

² Yawe aɗiymani: Zəgeɗ kədawlaŋgəs pak vaw diɗɗe Intə nəɗɗe An haraw asan aket yeŋki: məssahãy, ɗəf naddəv tatwãha, gəm məzəprəm əpel nawa də əkkersənə.

³ Mətaw wəla wasliya, tay əbay ɗəfa; məzaɓ-Maŋgəlva də wət time, aŋzləwək wəla kəra; məgəɗ su əvəla, avəl suwək də mbel na vedem; məs dəzlə su tursan, tay əki əzaɓ aka mbərayən. Net aweleŋgik tiveɗ neti tahəŋ ənnekeŋ də wəza net daryawɗeski,

⁴ Nawa, wanəwel sit sãhã; wanəki zəgeɗ en nawgeslnegit aketi. Vi nəyeke ya ɗəf tay dəzlan su ɓa; nəpelke ya dəprəmwən ɓa. Aɗɗaŋgək mbərayən a maharawa, an məs aweleŋ na ndəni an nəzeli.

Əpel na Yawe an bayma faɗə

⁵ Məprəm əpel na Yawe, mənokum məkkereŋ sənən əpel nani. Milmiŋgiɗkum azelkumənko, aɓɓahkumənək aka batam iya nawa. Tay əmasaŋ akokum dawnəh na: Kəta Yawe dərban gagdak nani, mulagən ənnek nokumu! Ya neti, wassoŋ addəv ərba wili.

⁶ Məprəm gogoyo məzəzzan sə walaŋgəla-metiŋgini, gogoyo dədazzan səddəv gəla nakkama: Wəla Yawe yi dampəlkiya aket meseŋgiɗni.

⁷ Tak dəɓəl əssat ɓa ndət boku tak təɓay uwa ɓa ndət bok wiyən mizilin.

⁸ Naway dəprəm zəv as ɗah di? Naway dula zəv zəgas ɗah di? Dələv wawə aka pay taka sa? Ɗiy nakan watəŋgaŋ aka taka sa? Na Siyon na, ətəŋ əɓay uwa ləŋgə awek kirtini.

⁹ Yawe amna: Wanəkol bat guluk məza kawani ɓa sa? Awaniɓa intə məzəɗɗan təwəgəni gəm kawtakət sa? Maŋgəlva nok amna.

¹⁰ Mənnek də Yerusalem, mərban ənnek nokum dəndəni, mənokum məs kəŋgluwəni, mənnek dəndəni. Mənokum məs kəhəmaŋ ammban pakə mənneki.

¹¹ Wakəwaɗaŋgə wakəbaŋ dit bide məsokonən makra ɗəfa wakəsenini, zukum dənnekgin dit bide na gagdak nani.

¹² Vaŋki Yawe anahə: Zazay wadaw loklok va məlpa addəvən, gagdak net ɗiy-ɗar wadaw va guzlo məknahən. Nokum wakəwaɗaŋgə kawslokumi a persleke ɗəf sləkə kasmaygukumi aka takpra ɗəfa.

¹³ Va ma wiyən tədawɓətgən wətəta, vas nədawɓət gukum addəv Yerusalem!

¹⁴ Wakulanəni, mokrokum wanneki, slesleŋɗe nokum wassoŋ gboŋgboŋ va əndəf na kevile. Yawe warban gagdak nan sit məɗɗaŋ wəza nani, gəm ədagədəv nan sit məzuzelini.

¹⁵ Vi Yawe yaŋ əzzan addəv offo, mawteŋɗe net pilseŋge nan tahəŋ va barkataŋɗe. Waki gagay na ədagədəv nani kawhãy addəv hərzlum offo.

¹⁶ Vi addəv offo gəm də masalam Yawe adatawwən aka ɗəf pakə. Ɗiy en adawbay wassoŋ diyɗa.

¹⁷ Ɗiy məbburnən kizit vi kawtoŋ əzaɓ-Maŋgəlva a guli net wəleŋɗe ammba ɗəf dədəka məzəm slu na vedem, məzəm zəga daryaw gəm kakkam, wamtaŋ aka ma taka Yawe aɗiymani.

Əkkal metiŋgin an bayma faɗə

¹⁸ Nəsənək wəza gəm əɗɗum neti, pay naw agapək nakkelet mahəlfa net ɗiy pakə. An azzoŋko, wawlanən gagdak nawa.

¹⁹ Wanəziwgin zəga narban gagdak naw aweleŋti. Wanəslin ɗiy en dəndəwəɗaŋ aret ɗiy na Tarsis, Pul, Lud, dələv net məhoŋ herɗe net ɗiy na Tubal gəm Yavan gəm aket mətuwəraɗe faraɗa məs dəprəmən wən naw ɓa, dulanən gagdak naw ɗah ɓa'a. Neti warbanən gagdak naw aweleŋgit ɗiy-ɗarɗeski.

²⁰ Wakinin milmiŋgiɗkum səweleŋgit ɗiy-ɗar pak va əvəl sən Yawe, aket pilseŋge, mawteŋɗe net pilseŋge gəm mawteŋɗe nawgaya, aket koropilseŋge gəm zlogomeɗ a Yerusalem aka mossorgo salala nawa, va mə Israyelɗe adawkiyaŋ əvəl na zəga nawzəm addəv gəla na Yawe dit hiliŋgiɗ salala, Yawe anahə.

²¹ Wanəgəm ɗiy sə weleŋgit ka məsdəlveŋge gəm ka mə leviɗe Yawe anahə.

²² Yawe aɗiyman na: Wanəzəməɗ disiŋ gəm dəlvafuŋ meleketeni, wassoŋ faɗ abawa. Vaski uwa nokum gəm iya nokum adawsan faɗə.

²³ Vas adawsan təlaper pak gəm aza va pay naffet agəɗ pakə, ɗiy pak wappu'oŋ abawa, Yawe anahə.

²⁴ Wagilyoŋ vi kawla kigəbeyit ɗiy məs dətemeŋ akawa. Tava məs dəzime amtə na ɓa, offo net amtə na ɓa. Wassoŋ ka zəga daryaw viyit ɗiy pakə.