Isaya 62 - Bible en Guidar

Yerusalem amsakək əzaɓa

¹ Nəsaw na ɓatɓat aka wən na Siyon ɓa; nəsaw na ɗew ɓatɓat aka wən na Yerusalem ɓa, hã gap an təstəs nan arbək kerkeri, əkõh nan tam va mətal offo dawzla.

² Ɗiy-ɗar wawlanən təstəs noko, məlyeŋge pak wawlanən gagdak noko. Kawyuki də iya meleketen məs ma Yawe adawɗiya.

³ Wakəsok va kulpup an na sləma na məlĩ ammba va Yawe, va mətərkiya na məlĩ a dagrakay va Maŋgəlva noko.

⁴ Kawyuki əmpa na: «Məzgani» ɓa, sən dələv nok tamə, kawnah səni əmpa na: «Məpiweni» ɓa. Vi nok kawyuki na: «Ənneke» dələv nok tamə: «Məɓelta», vi Daya waɗi ənnek nan akoko, dələv nok tamə, kawɓelni ka gulku.

⁵ Va gawla adawɓel waŋ ŋgbuɓɓo, vas kirtuk adawgəmnən dələv noko; va waŋ məɓelit tədannekən zə zilta, vaski kədannekən zə Maŋgəlva noko.

⁶ Aka zlava nok na Yerusalem nəziwgit məgaɗe; dəfəɗ də kapay pakə, adassoŋ simbimme ɓa. Mənokum məzəfɗahan sənən wən nan sən Daya, kəffeteŋ ɓa.

⁷ Kədappanən əffet ɓa hã gap an asilginik Yerusalem, hã gap dələv pak dəɗigən ki Yerusalem.

⁸ Də dəzəŋ nani, də va gbəgboŋ nani Yawe aswayək na: Nipsit na haykəmari nok ka zəga nawzəm net məzuzelɗe nok əmpa ɓa; molhõyeɗ asaŋ na mbazla na meketepe nok məs kəyə vinəŋ ɓa.

⁹ Vi ɗiy məs dəkkalanən haykəmari dədawzəmənəni, waɗinən ki Yawe; en dədakkalanən megezlembirke wasanən mbazla nan a daŋgla na gəla nawa.

¹⁰ Məgili, migil də memeŋgleɗe, məntar tive sit ɗiyi. Məziyani, məziyan tive, məkkpor gərmeŋge, məmpa gabaga na məlĩ abet ɗiyi.

¹¹ An Yawe aprəman hã təki dələv abay man yaŋka: Mənah sət waŋ na Siyon na: «Məzukõhguk yaŋ əzzani, də əfaɗ na hanza avani, əfet abani.»

¹² Kawyeti na: «Ɗiy salala», «Məbitit na Yawe»; nok kawyuki na: «Məŋgluni», «Walaŋgəla-metiŋ məs məzgani ɓa».