Isaya 61 - Bible en Guidar

Maslən na Yawe, wəza nani, əpel nani

¹ Əmpəs na Daya Yawe tay akawa, vi Yawe awelwək nawka alabara nenek sit məssehẽŋɗe, aslənwək əgip mekret ɗiy məs mekkret aɓohu; vi kawtəl ma sit ɗiy en məsimgit aka wən nappeti gəm sit məfərsəneɗi, aka wən nawpilti vi kawkol sit heret deŋgerɗe, vi kawkõhgit məzuzəmaŋ sahã;

² vi kawtəl ma aka wəzva na moggon na Yawe gəm aka pay nampəlkiya na Maŋgəlva namə, vi kaffeten mekkret ɗiy məzuɗəkaŋgə,

³ Vi kawɗup kulpupu na məlĩ sit məzuɗəkaŋ na Siyon, kapsit kulpupu na məlyã, məza moŋglo ɓa; mel nanneke, məza əɗəka ɓa; lukut nawɗikiya məza na əddak ɓa. Kawyeti na: Wəlaŋga məpsən gagdak sən Maŋgəlva, guli na Yawe vi karban gagdak nani.

⁴ Wasilgitin kiməskiɗe en farə, wasilgitin gəleɗe məbzliwit net ɗiy en daabəŋ. Wasilgitin walaŋgəleɗe məraygiti, məbzliwit far hoŋhoŋgu. Məs dəbzlaŋ farə, məs dəkrapaŋ maddaabeŋ Warkanən walaŋgəla-metiŋgini məs məbzluwən farə.

⁵ Ɗiy-ɗar wassoŋ əga arya nokum, wateɗnin gilew nokum, kirtit ɗiy-ɗar wassoŋ ɗiy nanseŋ sukumun gulyeŋge nokum dit megezlembirkeɗ nokum.

⁶ Kawyukumi na məsdəlveŋge na Yawe, Kawɗikumi məɗɗaŋ wəza na Maŋgəlva namə; wakəzəmən arya net ɗiy-ɗarə, wakəkaɓaŋ də gagdak neti.

⁷ A gəlet wili, wakərəhaŋ əzaɓ təl sula. Mbək əra namet ɗiy əsan ka nokum, wakəzəmaŋ gəla aza dələv net təl sula, ənnek wasan sukum hã faɗə.

⁸ Vi in Yawe, wən an tətəs nədaŋgla, naŋgla zəga məhãlən addəv əvəl nawzla kurmbuɗuk ɓa. Wanəpsukum zəga na vokum gesiŋgesiŋ, waniynan wənmiyna an faɗ də mənokum.

⁹ Kawsənniyi mazlalwã nokum kawsəntiyi kirtukum sə weleŋgit ɗiy-ɗarə. Ɗiy dulenin pak wasənnən na, mazlalwã məs Yawe azaɓani yi.

Gəlya nawfete

¹⁰ Ənnek nədannek addəv Yawe, wanəɗɗəl sən Maŋgəlva nawa, vi askəsuwək lukut nawkohõ, asərətwək də lukut məkso'o na təstəs va ɗəf dəɓel gulku adawɗi zən va məsdəlva, adawɗup kulpup na məlyã, va waŋ məɓelət tədawzaɓan zət dit zəgeɗ na gawla nata.

¹¹ Vi va dəlvafuŋ adawgilgin zəga nakani, va guli adawgilgit zeŋveɗe nani, vaski Daya Maŋgəlva adawgilgin təstəsə gəm əɗi kiya abet ɗiy-ɗar pakə.