Isaya 60 - Bible en Guidar

Yerusalem əkeɗeɗe na dəlva

¹ Yerusalem asili, awiɗi, əkeɗeɗe nok adeke, gagdak na Yawe arbək akoko.

² Guzli asərətək dələv pakə, guzli tiŋgbimzlim tay əgul ɗiyi. Ya akok na, Yawe arbəka gagdak nan tay ula akoko.

³ Asna ɗiy-ɗar wadawaŋ ara əkeɗeɗe noko, milyeŋge, ara təki kasakkasak nok adawdawaŋgə.

⁴ Abbalan horok kiyuk tərwəslə, ya awla kirtuk pak tahəŋ əmilyoŋgu əkkal azoko. Tahəŋ əzzoŋ sə faraɗa, kirtuk muguluŋgit slək-slək a persleketi.

⁵ Asna wakula, wakəwiɗi; wakənneken zuko, mokrok waknah də ənneke. Vi ərəh diyɗa na pehe, tay əzzan suko, arya nanet ɗiy-ɗar da wade suko.

⁶ Ngaɓa net zlogomeɗ wagulko zlogomeɗ en naka seyit na Madiyan gəm na Eyfa, wazzoŋ pak sə Saba. Wakiyaŋ meleŋge gəm tursan, warbanən gagdak na Yawe.

⁷ Gilew na Kedar wakkalaŋ pak suko, ndergeyẽɗ sə Nebayot wassoŋ sukun naɗɗa əvəl nawzla kurmbuɗuku. Kawzaɓi-Maŋgəlva an nəŋgəl aka təki nawzaɓ Maŋgəlva naw dənɗaŋgə, wanərban gagdak na gagdak na gəla nawa.

⁸ Mədəngaŋ es vet məzuveŋgeŋ va slaybuwən ndak di? Mədəngaŋ es vet va biŋgeɗ na maha damndoŋ aka gəla netiŋ di?

⁹ Ɗiy en ɓa' sə mətuwəra aɗiyənək əɗɗum net akawa, bəlayɗe na Tarsis əŋ abe vi kawmilgit kirtuk sə faraɗa də təbəz babar gəm meleŋge neti vi kawgagdakan Yawe Maŋgəlva noko, vi Salala na Israyeli dəpsuk gagdaka.

¹⁰ Molhõyẽɗiŋgə narkanən zlava noko; milyẽŋge net wazaɓ sukun Maŋgəlva. Vi nərgukuk gala gədəvu assan mədani. Ya addəv moggon nawa nəwulək sahã akoko.

¹¹ Pay pak metiveɗ nok wassoŋ viŋŋge, dəfəɗ də kapay pak kamseti yi ɓa, vi kawki suk arya net ɗiy-ɗar dit milyeŋge net ammba zit teptepi.

¹² Vi ɗiy-ɗar gəm kiva na məlĩ məs dəɓoŋ dawgəɗ suk wəza, wazaŋgə; ɗiy-ɗar veti, əza adawzaŋgə.

¹³ Wəleŋɗe rəɓ dəssoŋ gagdak na Liban kawkiti anokda wəleŋɗe lelewɗe, zaɗiya gəm zigã wazzoŋ sap vi kawbay gawla sən gəlamatuya nawa. Wanəkkpaŋgan təki nəsaw dəsangə də gagdaka.

¹⁴ Ɗiy en dəzəmgukunən sahã wazzoŋ azok də əmpa kiyit afuŋgu, ɗiy dəzelokun pak wappu'oŋ ammba təlko. Wayukun na: Walaŋgəla-metiŋ na Yawe, Siyon na Salala na Israyel.

¹⁵ Nazga kənan kəta, nawzele ɗəf atoŋ na dəkok ɓa. Ya wanəɗiyuk addəv ənneke, wakəsok təki nannek hã faɗə.

¹⁶ Wakəɗəm moŋvo net ɗiy-ɗarə gəm wakəzəm arya net milyeŋge. Akəsən na: Intə Yawe məzukõhguko, Məzuɓappak na Yakob məzubitko.

¹⁷ Wanəki meleŋge a gəla təbəz pepreŋge, təbəz babar a gəla təbəz titire, təbəz pepreŋ a gəla wəlaŋga təbəz titir a gəlet gərmeŋge. Gagdak nok na zazay gəm təstəs nədawɗiya.

¹⁸ Kaprəmi gagay aka dələv nok əmpa ɓa, əray gəm əza aket meŋge nok ɓa. Wakəya zlava nok na, əkõho, metiveɗ nok na, əɗikiya.

¹⁹ Pay dədawsan suk ka əkeɗeɗe na kapay əmpa ɓa, dəfəɗa, təla yi nawiɗ suk ɓa, Yawe yi nawsan suk əkeɗeɗe pay pakə Maŋgəlva nok dədawsan gagdak noko.

²⁰ Pay nok atəp na əmpa ɓa, təla nok aɗam na ɓa. Vi Yawe wasan əkeɗeɗe nok faɗə. Gəlabay nok wabay mani.

²¹ Ɗiy nok beymet wassoŋ təstəs hã faɗə, dələv wasan ka neti. Wəlaŋga məs nəmpə yi wəza na vawa, vi karban gagdak nawa.

²² Daŋgla muzliya wasan ɗiy gabalə, an məddakən wakkpaŋ dələv gbogboŋgo. Aski in Yawe nədawgəm zu wəɗɗa aka pay nani.