Isaya 6 - Bible en Guidar

Maŋgəlva tay iya Isaya aka wəza

¹ Aka əzva məlĩ Oziyas amtə, nulak Daya addəv ula tay ɗewwe aka mazaŋga məɓayən məɗiyən na məlyã, gabba lukut nan aknahək gəla-na-Maŋgəlva.

² Kerubaɗe tahəŋ ziwziw akani. Taka pak tay dit persleken sləre sləre: də persleket sula, nawsərət hereti, persleket sula nawɗaman gebbeti, persleke sula mbərit tamə nawveŋge.

³ Tahəŋ ənzla vaŋvəl aza zit na: Salala Salala Salala Yawe Məzuɓappak! Dələv dəwən nan aknahək də gagdak nani.

⁴ Gebbet metiveɗ akkereŋgək sən vaŋvəl mənzləwən, gəla-na-Maŋgəlva aknahək dit enene.

⁵ Yaŋ nənah na, əray akawa! Nəzəka vi ɗəf məs man məpel daryaw nani, in tat aweleŋgit ɗiy məs met adawpel daryawə. Vi haraw awlak Yawe Məzuɓappakə.

⁶ Yaŋ taka səret Kerubaɗe aveŋ kəlazaw də slayoffo məs agəm dət mərmaŋgək səka matuya ammba vani.

⁷ Ane' aza mawa, yaŋ amna: Awle zəgaŋ ane'ik aza metteɓ moko, heslepe nok azarka, mambray nok avvuyko.

⁸ Nəprəmək wəla Daya də wənah na: Naway nədawslən di? Naway dədawmbat agəlam di? Yas nənah na, in yakəŋkə aslənwa.

⁹ Yas anah na: dok ənah sit ɗiy vet na: əprəm kədaprəməni, ya kəsənən na gabban ɓa. Ula kədawlanəni, kəsənnən na ɓa.

¹⁰ Akkpaŋgan mekret ɗiyis difsiriki, asuk sləmeti, atip hereti; vi adawlaŋ də heret ɓa, sləmet adaprəm ɓa gəm mekret adawsən gabba zəga ɓa! Vas ɓa na waɗiyaŋ marava kamblaŋgə.

¹¹ Ndəni nəttokku: Hã dewe di Daya? Azlanək na: Gap walaŋgəleɗe gugriɗe mbo'oŋgu, ɗiy assoŋ na addəvən ɓa, ɗəf taka asan na addəvit gəleɗe ɓa, dəlvafuŋ wasan va kapta.

¹² Daya wazargit ɗiy naka dəlva. Dələv wasan də mani.

¹³ An taka dayday səret ɗiy kəlaw en dəssoŋ adak apəlka, wazlə aka offo. Va Korvoŋ gəm va terebentə məbilti məs gebbet dəmbərə, Gabban van hara na zeŋve salala yi.