Isaya 59 - Bible en Guidar

Mambray awɗakokumuk də Maŋgəlva

¹ Va Yawe duɗukkoy nawkõhgukum ɓa, sləman məsukni naprəmkum ɓa.

² Ya heslepe nokum dəsan mambara awalaŋkum də Maŋgəlva, mambrayɗe nokum dədawɗamanən haran səkokum, dədawtaknən daprəmkum.

³ Vi vokum tay totoptotop dit mbeli, kirtin vokum tahəŋ də heslepe, mokum tay uwawəna, hərzlumkum tay wərwər əpəl mbərayən.

⁴ Ɗəf tay məkə dolgoy aka təstəs ɓa, ɗəf tay məzəddan ətawwən na moggon ɓa. Mənokum tat əziw aka zəga ɗarə, əpel nokum na uwawəni yi, gədəvkum aknahək də mbərayən, yaŋ kədawparəni.

⁵ Ɗeŋzle na barway kədawvoŋgoŋ aketi gabaga na gəla na məbotgele kəhoŋgu ɗəf dəzəm ɗeŋzle neti wamtə an dəkrapə, barway wagili.

⁶ Gabagaɗe nokum vet akkpaŋgaŋ na lukut ɓa kəzziɗnin na akokum ɓa, vi wəzeɗe nokum wəzeɗe mbəraytiŋ gagayi ammba vokum.

⁷ Mənokum tat ənzoŋ kakara əɗɗa mbərayən, mənokum tat əgəm zukum əbay ɗəf məs man bartata. Əɗɗum nokum əɗɗum mbərayni. Aka tive nokum pak na watala gəm əraygən zəga yi.

⁸ Kəsənən tive nawrəh zazay ɓa, təstəs tay addəv wəza nokum ɓa. Tiveɗ nokum tahəŋ ponzloŋ ponzloŋgu, ɗəf məs dəzbet pak arah na zazay ɓa.

Ɗiy na Maŋgəlva asənək an araygənəni

⁹ Vi vaski middergən təstəs ɓa' səzamə, təstəs agapəm ɓa. Məɗiyək əɗɗum nam aka əkeɗeɗe'e ya yaŋ təki pak guzluyo. Əga təki suwayya kəta ya ara guzli mədadawa.

¹⁰ Mənam tat əttəman təki dəttəm va daŋgar aza gəla, mənam tat əttəman təki dəttəm va ɗəf məs haran tay ɓa. Tataŋ paya, mənam tat ətaŋgbãy va kəɓəs na pay tay əbəta. Gbəgba tay azam ɓa ya mənam tat va məmtəmə.

¹¹ Mənam tat fõyfõy pakgəm va zəga darawən adawyaŋ Ursə gəm əhəm va biŋgeɗ na maha. Mam aka ətawwən təstəsə, ya tay ɓa. Mənam tat əga əkõho ya tay ɓa' də mənamə.

¹² Vi əɓoŋɗe nam adayaŋgə aboko, mambrayɗe nam tay ərbaməni. Əɓoŋɗe nam tahəŋ akamə, məsənik heslepeɗe namə.

¹³ Məɓoŋko, məwək wən aka Yawe, məppanək əzban Maŋgəlva namə. An mədawpele, nattapan ənziya yi gəm əɓoŋgo. An mədaɗɗum a makramə, əpel na uwawəni yi.

¹⁴ Vas ətawwən təstəs amndan dirɓə, əkõh aziwik faraɗa. Əpel wən təstəs ataŋgbãyək a gəla lumu, təstəs aɓap na əziw ɓa.

¹⁵ Təstəs azəka, an taka appanək mambraya, kappohoni. Yawe awlaka, tay a maharan mbərayən vi man tay aka dəndapanəngən təstəs ɓa.

Daya atoŋguk wən nani

¹⁶ Awlak na ɗəf təttaka tay ɓa asiripik zəni vi ɗəf tay dətoŋ əbbah ɓa. Yaŋ van apsən əska wəla, təstəs nani, nan ampəsənək ɓəɓəla.

¹⁷ Aguluk təstəs azan va lukut na təbza, aɗupuk əkõh akan va kulpup na təbza. Agulik əmpəlkiya azan va lukutɗe; aguluk sələh azan va lukut məsilipi.

¹⁸ Wafaɗ sən naway pak va aza wəza nani, wafaɗ sit məzuseɓ nan də ədagədəva, məzuzelɗe nan tam an dəslə azeti meseŋgiɗin nakki faraɗa wafaɗ sit an dəslə azeti.

¹⁹ Asna kawgeslne səni iya na Yawe hã səmmba pay na moskoyo, hã səmmba pay nampum tamə gagdak nani, vi an məzuzel adek va məlpa məknahən əmpəs na Yawe wafu' gabbani.

²⁰ Məzubit wade a Siyon viyit ɗiy na Yakob en dəmilyoŋ səka əɓoŋgo Yawe aɗiymani.

²¹ Yawe amna: Aŋki wənmiyna naw dənɗaŋ: Əmpəs naw məs dəsan akoko də əpel naw məs nəgul amoko adawzaraŋ səmok ɓa, may səmet kirtuk ɓa, may səmet kirtit kirtuk ɓa Yawe anahə, təŋ kakaŋka hã faɗə.