Isaya 58 - Bible en Guidar

Əɗɗa meme məs dədannek zə Maŋgəlva

¹ Akol wəlok ayə, kəɓətgən gozloro ɓa, aslan wəloko. Arban əɓoŋ net ɗiy nawa, arban mambray net ɗiy na Yakob.

² Aza əvoŋ pak tahəŋ ədder azawa, aŋglaŋ dəsənnəngən tive nawa va ɗiy məzəɗɗaŋ miyi pak də tiveni. Va ɗiy məs dəzganən an Maŋgəlva ataw naɗɗa ɓa. Tahəŋ əttokowən an Maŋgəlva aziwgini, aŋglaŋgək Maŋgəlva dəsangən go'o azeti.

³ Aɓɗaŋ na: Vi miyi mədaɗɗa meme an kuləm na ɓa di? Əɓegən ki zəm mi adawtər, an kəzək na sləma ɓa di? Ya naw nənah sukum na, vasna pay kədaɗɗaŋ meme, mənokum tat ərəh zukum, gəm əzəmgit sahã net məɗɗaŋ wəza nokum.

⁴ Mənokum tat əɗɗa meme, mənokum tat əgayaŋgə gəm ərgan zukum na darawə! Kəɗɗaŋ meme va dəslə ka nəprəmgən əkkam nokum sə disiŋ ɓa.

⁵ Vaski əɗɗa meme nəŋgəl adawsan sa? Aski əɓegeŋ kiykum sa? Mənokum tat ədoɗ kiykum va eflere, mənokum tat əgul lukut na gəlabaya, gəm əvoŋ aka moŋglo, gesiŋ aski kədawtəlaŋ ma əɗɗa meme, pay an dəslə sən Yaweŋ sa?

⁶ Aŋki əɗɗa meme an nəŋgələ, əpil ngiyamɗe səka tilit ɗiy məs miynet na Darawə. Əpəl helegeɗ sulet ɗiy məɓrukit dəssoŋgən də meti, wənzlu zuk səma wəleti.

⁷ Uɗakan way nok də ɗəf məs may adawda, əkol metive nok sit məssehẽŋɗe, an kəwələk ɗəf məza lukut azan ɓa, apsən əgulo, kədawgo' zuk səza məlmuk ɓa.

⁸ Asna əkeɗeɗe wakekeɓe va pay adagilyen də pummo, uweɗ nok wanzaɗaŋgə. Təstəs nok wagil wasan aboko gagdak na Yawe wasan dərɓogoko.

⁹ An kəkkamka, Yawe wazlani; an kəŋgələk əbbaha, wanənah na: In yakəŋkə! An kəppanək əhasl ɗiy na gagayə gəm əttəlan ɗəfa, awaniɓa əpel mbərayən aka ɗəfa,

¹⁰ an kuɗakanək way nok də ɗəf məs may adawda pakə, kəbetik məssehẽŋɗe, asna əkeɗeɗe nok warbə ara guzliyo; dəfəɗ nok wasan va tataŋpaya.

¹¹ Yawe wasan məzədawguk pay pakə, addak kapta-muyã zlaŋgə waboko gəm wasɓan ma sleŋsleŋko wakəsok va guli net wəleŋɗe məs məpsən iŋkile, va heret iŋkile miyma məs akkpa'aŋ ɓa.

¹² Asna warkanən kiyməskiɗe nok en farfarə, wakərka aket gebbet gəleɗe en ɗiy farfar aɗiyaŋgə. Kawyuki na: Məzuzaɓan zə gəla məɓluni məzeɓet tiveɗ ka gəleɗe dəmpaŋgəni.

Pay naffet məs dəzlə sən Yawe

¹³ An kərmak zuk pay naffete, vi kədaɗɗa an məs kəŋgəl aka pay salala naw ɓa, an kəɗiyək pay naffet ka əŋgla na Yawe, ka pay gagdaka, gəm is tat əgagdakan məza əzban tive nok ɓa, də əppan kiyzuk sən əŋgla nok ɓa gəm sən əpel ɗar ɓa,

¹⁴ asna wakərah ənnek a mokrok aba Yawe, wanəkuk faraɗa a disiŋ səza gəgrəŋ negge wakəzəm nenek na dələv na afuk Yakob faɗə, vi ma Yawe dəpele.