Isaya 57 - Bible en Guidar

¹ Ɗəf təstəs tay əmta, ɗəf tay dədaɗɗum akan ɓa. Məbeyti ɗiy en moggeti, ɗəf tay dəzlək sləma akan ɓa. Ha'aw ɗiy təstəs tay əzaŋgə sən daraw net ɗiy mbəreyti.

² Zazay wade. Məzəzbanən tive sarara waffeteŋ aka zəga nawvoŋ neti.

Wəzga' sit ɗiy məzbaŋ zəgakamaŋgəlva

³ Mənokum, midder aŋka, Kirtət məsək heligi, kirtət məgəɗ ɗarɗarə gəm mana'a.

⁴ Aka naway kədawmasaŋ di? Aka naway kədawha'ənən mokum gəm əɗɗa hərzlumkum talyãk di? Kirin məɓoŋkum kənanən gəm gebbet muwaŋ wən ɓa sa?

⁵ Mənokum tat əvoŋ ammbet wəleŋɗe na matuya ammbet wəleŋɗe məs də vet pakə. Mənokum tat ətaw wəlet kirtukum a lolohẽɗi, a poporit gərmeŋge.

⁶ Kuwneŋge lələkəɗəkɗe aski haran noko, kəpeslik mbazla aketi, mənokum tat əpsit əvəl na zəga nawzəma, viyit zəgeɗis kan na makraw waffet sa?

⁷ Kəpekik kukurɗe nokum aket kuwneŋge məɓeyti. Adak kədawpeŋge kadawzaɓ-Maŋgəlva.

⁸ Kəɗiyək zəga naɗɗumon əzaɓ-Maŋgəlva nok dəra maddamba noko. Kəmmbatək ɓa' səzawa, kəgbuku, yas kəpeŋ aka zəga nafna noko, kəpsit təkiya kəpakək zəga nafna noko kəŋgələk əvoŋ dənɗaŋ, kulaka.

⁹ Kəppayək mẽl kadda aza məlyã kəgəɗək tursan diyɗa. Kəslinik maslənɗe nok faraɗa, kəpirkik hã gap a təki net ɗiy mimtiti.

¹⁰ Kəyək vi zezek na tive, ya kənah na: Wanəppani ɓa. Kərəhka vini kəddak ɓa.

¹¹ Sən naway kədawgeslne' ka kəmakawgən vaŋhəŋ di? Kəzgətək kiwa, kəppan kiyuk akaw ɓa; kəgeslne' su ɓa vi nəsaw ɓatɓatə.

¹² Naw wanərban təstəs noko ya wəza nok watəruk ɓa.

¹³ Pay kədawhəm sit sap net meŋgilveɗ nok dəkõhgukuni Səmyã waslet pakə, kitiwkitiw nan waddergiti. Ya məs dəɗi əɗɗum nan akawa dələv wasan ka nani, wazəm gəla aza mossorgo naw salala.

Wəmbla net ɗiy na Maŋgəlva

¹⁴ Daya amna: məzaɓani, məzaɓani, məntar tive, məzergit zəgeɗ səka tive net ɗiy nawa.

¹⁵ Vi vaŋki məs dəsan a disiŋ ki zəga pak məs təki nassan dəsan faɗə məs iya nan na Salala anahə: In tat a disiŋ salala nənani, ya in tat də ɗəf məs makran dəzlahə gəm məs dəɓe'gin kizəni vi kakkpaŋgan məs dəɓe'gin kizən madarani, kawmbəlgən ɗəf məs makran dəzlahə.

¹⁶ Vi nəgay na dənɗaŋ hã faɗ ɓa nədə na gədəv ka faɗ ɓa. Vi əmpəs gəm zeŋgilet ɗiy nəzəməɗ məs dəssoŋ abaw adaddak ɓa.

¹⁷ Vi heslepe na əsim zəga nani yi nədə gədəva. Addəv ədagədəv nawa nərbəsənəka maw tay aka ulan ɓa aɓɓəlanək kini, agəmək tive məs aŋgələ.

¹⁸ Nəsənək wəza nani. Ya wanənzaɗa wanərban sən tive, wanəsokon makran ndəni gəm məzuhəmaŋ sap dəndəni.

¹⁹ Wanəgul əpel nawgagdakaw a meti. Zazaya, zazaya, vi ɗəf an fusu vi ɗəf an go'o Yawe anahə. Wanənzaɗa.

²⁰ Ya məsdarawɗe tahəŋ va pehe məzəɓla, məza awɓəta ɓa, iŋkile nan tahəŋ əbirɗis ndərɓa gəm mogoɓogoɓo.

²¹ Zazay tay viyit məsdarawɗe ɓa, Maŋgəlva naw anahə.