Isaya 55 - Bible en Guidar

Əkõh na mekeleŋ məza də dala ɓa

¹ Mənokum, məs meme adawdaŋgə, mide a met iŋkile, ɗəf məs dala tay avan ɓa zlaŋgə! Mide məlbahə, məzəmə! Mide məlbah na mekeleŋ, məza əfaɗ aka mbazla na megezlembirke gəm moŋvo ɓa.

² Vimi kədawzanən dala məza aka zəga an nazgəl ɗəfi ɓa, mənokum gəm əyan zukum ammba an aban na ɗəf ɓa di? Məprəma, məprəmwa, məzəm zəga moggoni, gəm əban zukum də da'asə.

³ Məpak sləmokum, mide azawa. Məprəma, wakəssoŋ madorokum. Waninə wənmiyna an faɗ vikum, sesel wanəziw aka moggon na Davit.

⁴ Awle, nəɗiyək ka məzuwe naw abet ɗiy naket dəlveŋge, gəm ka məlĩ nawɗi an naɗɗa sit ɗiyi.

⁵ Wakəye ɗiy məs kəsin ɓa, ɗiy məs dəsənkun ɓa wanzoŋ azok aka wən na Yawe Maŋgəlva noko, gəm aka wən na Salala na Israyel, vi aɗiyək kiyko.

An aynə naɗɗa wagəɗə

⁶ Məkayan Yawe pay nawrahən, mətəl mokum azan aka tay gu'o.

⁷ Məsdaraw dəppan tive nani, məs mambray dəppan əɗɗum nani, dəmil aza Yawe, nan wawəlsahã akani, aza Maŋgəlva namə, vi muvvuy mambrayi sawɓa.

⁸ Vi əɗɗum naw va əɗɗum nokumi ɓa, tive nokum tive nawi ɓa Yawe aɗiymani.

⁹ Va disiŋ asan a disiŋ ki dəlvafuŋgu, vaski tive naw asan a disiŋ ki tive nokum, əɗɗum naw asan a disiŋ ki əɗɗum nokum.

¹⁰ Va buwən dit ɓeɓrezlerizze adawziyaŋ sə disiŋ, amndoŋ na adak məza dəlɓanən dəlvafuŋ ɓa ɓa, məza dəɗɗa dələv dəwəgən ɓa ɓa, məza dəgilgin kevile ɓa ɓa, məza dəpsən zeŋve sən məzəslga, gəm zəga nawzəm sən məzuzəm ɓa ɓa.

¹¹ Vaska'e əpel məs dəgil sə maw adawsani. Amil na azaw mekeleŋ məza dəɗɗa əŋgla naw ɓa ɓa, məza dəknahan an məs nəslən viyən ɓa ɓa.

¹² Vi wakəgulyoŋ də wənneke, kawkukumi addəv zazaya. Mossorgoɗe gugriɗ dit mossorgoɗe wannekeŋ abokum də əŋzla vaŋvəl na ənneke, wəleŋɗe nawra pak warganən veti.

¹³ Wəleŋɗe lelewɗe waɓayaŋ a gəlet gedirgeɗi, a gəlet tintifɗe, wəleŋɗe məs məŋginit neki. Wasan zəga na sləma vi Yawe gəm zəga narba an faɗ məs azə na ɓa.