Isaya 54 - Bible en Guidar

Məzgani Yerusalem əmpa ɓa

¹ Yerusalme, aŋgəsl vaŋvəl sən ənneke, is ndarzlayək məs kərah uwa ɓa. Aɓah sən ənneke, anneki, is məs kəwə ɓa. Vi, is ɗak məzgata, is tat dit kirin kakaŋ daykiyət ɗak akən də zəlta. Vas Yawe anahə.

² Azlzleten təki na gizlirke noko, dəpekin məzlzlaraɗe na təki nassa noko, azlzleten azani. Appar helege nan azani. Ekkpe' wəleŋɗe nakkpa' nok təstəs.

³ Vi kəlaka zlaɓay gəm dəka dəzəŋ kədazlzleten zuko; kirtuk wazəmən dələv net ɗiy-ɗarə, waknahin walaŋgəleɗe gugriɗ nok məs ɗiy tahəŋ addivit ɓa.

⁴ Kəgeslne ɓa, karbəsuki wil ɓa, Kəzlzlaɓ ɓa, wil adukun ɓa, wakəzgət ki ərba wil nok naka gore, kəɗɗumon na ərba wil nok nassa gagəbay əmpa ɓa.

⁵ Vi məs dəɗɗuk ndəni zilko, Yawe Məzuɓappaki iya nani. Məzukõhguko, ndəni Salala na Israyel, dawyanən na Maŋgəlva na dələv pakə.

⁶ Gala Yawe ayuk na, is tat va guluk məppata, məs maɗɗulat azlzlaɓə. Maŋgəlva nok amna: Ɗəf wappat guluk na gawla nan sa?

⁷ Addəv pay siɗikke, nəppokuko, ya wanətafuk də ulasahã akok diyɗa.

⁸ Səza ədagədəv naw asan vakvakə, nəɗaman sukuk haraw vi pay siɗikke, sən moggon naw pay pak naka nəwələk sahã akoko. Vas Yawe məzubituk anahə.

⁹ Wasan su va aka pay na Nuwe: Nəswayka buwən məvekeveke asulupnən na dələv ɗah ɓa. Vaska'a nəsway kakaŋka nədə na gədəv akok əmpa ɓa, nəhoyok na ɓa.

¹⁰ Kəta mossorgoɗe gugriɗe dəddereŋgi, mossorgoɗe dəɓzlaŋ zlaŋgə, moggon naw viyuk adder na ɗah ɓa, wənmiyna na zazay naw aɓəl na ɓa. Vas Yawe məwəl sahã akok anahə.

Yerusalem an laha

¹¹ Is Yerusalem, na sahã kənani, vẽŋvil aɓlokunko, ɗəf tay dəɓətguk ɓa! In yakəŋ a nəmsak ərkuk dit gərmeŋge məverti. Wanəɗi gobbok dit kuwneŋge Safira.

¹² Wanəbayma ərka gəla nok dit gərmeŋge na sləma, wanəɗɗe metiveɗ nok dit gərmeŋge pepreŋɗe məzəwiɗəŋgi, gəm zlava nok dit gərmeŋge na sləma.

¹³ Kirtuk pak wassoŋ məzuyakaŋ na Yawe, zazay net kirtuk wammbat abe abe.

¹⁴ Təstəs waɓɓəloko. Wakəsok ɓa' səza əzəmsahã, kəgəslne na əmpa ɓa. Kəkker na sən geslne ɓa, vi agapuk na ɓa.

¹⁵ An ɗəf awaksukuko, wən nan dəsil səzaw ɓa. Ɗəf dəwaksuk əgay pak waskot aboko.

¹⁶ Awle, intə nəzəməɗ mənzla məzufu' slay offo vi kawzaɓ zəgeɗ nawgay va aza wəza nani. Intə'e nəzəməɗ ɗəf nawraygiti, nawzeti.

¹⁷ Zəga məzaɓən nawgay də is pak ahhar na ɓa. Wakəslbe məkaŋ dolgoy akok pakə. Hara ərəh net məɗɗaŋ wəza na Yawe yaska, ndeni təstəs net məs dəsil səzawa Yawe aɗiymani.