Isaya 53 - Bible en Guidar

¹ Naway dətaf alabara nenek məs məprəm di? Naway səmmbam dula gbogboŋ na Yawe di?

² Vi aɓayək aban va wəlaŋga məgilyani, va siwere digil a təki məkuro. Aza ulan na, tay lalaw ɓa, awiɗ ɓa, aza əzəməɗ nan tamə tay məs dəgəm haram ɓa.

³ Ɗiy azelinke, azganənka, ndən ɗəf na əzəmsahã dəsərək də tatwãha, va ɗəf nakkpaŋgan hara ɗəf səkan vi ɗəf adawlan ɓa, Məzelni, mula azam va ɗəf ɓa.

⁴ Mbaraka əzəmsãhã nam aslə, tatwãh nam agəmə. Də as pak mulak na va Maŋgəlva dətawwən akani, arbəsəni, arbəsən wili.

⁵ Ya məmbokən na vi əɓoŋ nami yi, məŋgrofən na vi heslepe nami yi. Əzga' nawki səm zazay dəbət akani, Də vamvi nan əmbəla nam asani.

⁶ Mənam pak məzək va gilewi, naway pak agəmək tive nani. Yas Yawe aggbo' heslepe nam pak akani.

⁷ Məzəmgəni sãhã, mərbəsəni wili ya dəhã' man ɓa va wət time mizilin məs adawkaŋ a təki nawtaw wəla zəga, va met time avet ɗiy məzufiwnin deɓekeɗ nan adawsan ɓatɓatə, dəhã' man ɓa.

⁸ Armanənən na gagay, azlbanənək də ətawwən akani. Səmmbet ɗiy na sayit ɗiy nani, naway dəɗɗum aka məs dərəh di? Məzani səka dələv net ɗiy medereti məbayni vi əɓoŋ net ɗiy nani.

⁹ Məɗiyni magamas nan a walaŋgən net məsdarawɗe məndəkən aweleŋgit məsaryeɗi, də əkay mama tay azan ɓa uwawən tay a man ɓa zlaŋgə.

¹⁰ Yawe dəŋgəl əŋgrofən də əzəmgən sahã. Səɓɓa appan kiyzən ka Maŋgəlva-məzaɓən nawvuyoŋ mambray na, wawəl uwa, payɗe nan wazzekeŋgi, əŋgla na Yawe waknahə.

¹¹ Səɓɓa tatwãh məs azəmə, wawla əkeɗeɗe'e, wabə. Gawla naw təstəs wakkpeŋget ɗiy diyɗa təstəs də əsən nani də əslan heslepe net akan dəvani.

¹² Vini nədapsən haran nan aret ɗiy diyɗa, wawɗak ərəh na ma əgay dit ɗiy guromɗe, vi appanək kiyzən sən əmta, məŋɗani aret ɗiy mbəreyti. Aslanək mambray net ɗiy diyɗa, akkamək ammbet məs mambrayɗe.