Isaya 51 - Bible en Guidar

Əkõh məza meŋge nan ɓa

¹ Məprəmwa, mənokum məs kəŋglaŋ təstəsə, məzukayanən Yawe. Mula milɓe məs məbazlkum səzani, gəm addəv vov məs məkdakum sədaka.

² Məwəl aza Abraham, afukum, gəm azat Sara, ndet məs təwəkum egge. Vi takərgən nəya yas nəɗɗa əzaɓ akani nəkkpaŋgan ka ɗiy diyɗa.

³ Vi Yawe waffeten makra Siyon, awələk sahã aka wəɓzla nan pakə. Wakkpaŋgan kapta-muya nan va Eden gəm muyã nan va guli net wəleŋɗe na Yawe waknah də inyã inyã gəm də wənneke əlva gəm gəlyanalva.

⁴ Məprəma, mənokum Vanday nawa, məpak sləmokum ambawa, mənokum ɗiy nawa. Vi mahenziŋ wasil səzawa; ətawwən naw nədapsa wasan əkeɗeɗe net ɗiyi.

⁵ Təstəs naw go'oy, əkõh naw warbə, vaw watawwən aket ɗiyi. Mətuwəraɗe waɗiynən əɗɗum net akawa, wabayən vet ammbawa.

⁶ Məslan horokum a disiŋ, gəm məwəl afuŋgu: Vi disiŋ wahhi va enene; gəm dələv waray va lukutu, ɗiy nakan wamtaŋ va birteŋge. Ya əkõh naw wasan faɗə, təstəs naw avvir na ɓa.

⁷ Məprəmwa, mənokum məs kəsənnən təstəsə, ɗiy məs mahenziŋ naw a mekreti kəgeslne'eŋ sən əzel na ɗəf titir ɓa, may əvviren zukum sən əra net ɓa.

⁸ Vi tava wazim va lukut, musuksləma wazim va zenze. Ya təstəs naw wasan hã faɗə wəkõh naw va sayit ɗiy amə' pakə.

Afɗahə, Daya

⁹ Afɗahə, afɗahə aɓɓəlan zuko va Yawe. Afɗa va kədafɗa aka pay na sayit ɗiy en far lahəŋka. Istə kəbəlan gəm dətilik Rahab dohõtuya na pehe ɓa sa?

¹⁰ Istə kəkkpe' iŋkile sə pehe gəm iŋkile kpukpumɗe məsuzliyə, dəkkpaŋgan gədəv pehe ka tive, vi ɗiy en məpilit dəkaɗaŋgən ɓa sa?

¹¹ En Yawe apet wamilyoŋgu. Wazzoŋ a Siyon də vaŋvəl nanneke, də ənnek an asərəkaŋ aka maɗɗuleti də ənnek metiŋgini gəm də wəɗɗəla, wəhəm də əɓuhma assoŋ na ɓa.

Ɗiy nawa, kəgeslne'əŋ ɓa

¹² Intə, intə nədaffeten sukum mokrokum, naw kənanaŋgə, vimi kədawgeslne sənən ɗəf titir namta sən ɗəf titir məs dəsan va kevile di?

¹³ Is əzgət ki Yawe məs dəɗɗuko, məs dəpak disiŋ məs dəziwgin dəlvafuŋ. Pay pak is tat əkker sən geslne aba ədagədəv na məsər ma ɗəfa, va kəɓəs na azaɓanək zən nawzoko. Ya ŋgay ədagədəv na məsər ma ɗəf van di?

¹⁴ Pay nappan ɗəf naddəv əzəmsãhã dəsangən dəman go'oy. Amtə na a fərsəna ɓa, way nawzəm akkpap na səman ɓa.

¹⁵ Intə Yawe Maŋgəlva noko, Intə nədawsilgin pehe, dəbaygən gəgayə. Iya naw na Yawe Məzuɓappak.

¹⁶ Nəɗiyək əpel naw a moko, nəɗupuk vaw akoko, nəpakək disiŋ, nəzəməɗek dəlvafuŋgu, nənah sitik ɗiy dəssoŋ a Siyon na: Mənokumtə ɗiy nawa.

Aɗɗumon kiyko, Yerusalem

¹⁷ Afɗahə, afɗahə asili Yerusalem. Kəɓəsək tatwãh məs Yawe addəv ədagədəv nan aki akok hã gərakə, hã kiyuk dəwələwələ.

¹⁸ Ɗəf tay narban suk tive səmmbet kirin məs kəwəŋ ɓa ɗəf tay narma vok səmmbet kirin məs kəzgəl ɓa.

¹⁹ Zəgeɗ suleŋ arəhkunko əraya gəm əɓzla, mayã gəm masalam. Naway na'uguk gəm nawɓətguk di?

²⁰ Kirtuk askotoŋko, tahəŋ məvoŋgit aket tiveɗ va musa aka mazzaɗə, attəmanənək ədagədəv na Yawe əhãy na Maŋgəlva noko.

²¹ Vini kana kamə aprəma sãh kənani, zurokzurok məza sən mbazla na megezlembirke ɓa.

²² Vaŋki Daya nok Yawe, Maŋgəlva nok məzutər ɗiy nan anahə: Yaŋ na nətafək tatwãh məzəɗɗa kiykum viwwe səvoko, kəmsak na əzəmsahã sən ədagədəv naw əmpa ɓa.

²³ Wanəɗi aket məzərmaŋ mama azoko ndəɗaŋ məs dənah sukunən na: Aɓe'i mətoŋgəni. Yaŋ nok kəkkpaŋgan dəɓok va dəlvafuŋgu va tive sit məzudawaŋgə.