Isaya 50 - Bible en Guidar

Uɗak tay a walaŋ Maŋgəlva dit ɗiy nan ɓa

¹ An Yawe anah yaŋka: Ŋgay ɗerewel nawɗak dət mokum məs nəver narban na nəppatəka di? Awaniɓa naway səmmbet məzəzbawən dəmən nəvəlkum sən di? Mula aka mambray məvəlkum. Vi əɓoŋ nokum məppat mokum.

² Vimi gala nəde na, ɗəf tay aŋ təttaka ɓa di? Səza nəyə ɗəf tay dəzlan ɓa di? Vaw duɗukkoy an faɗ akõhgukum na ɓa sa? Awaniɓa, gbogboŋ tay azaw ta' sa nawpəlkum ɓa sa? Ya yaŋ də wəbay gagay kaka' nədakkpa' pehe wanəkkpeŋget məlpeŋge ka kapta-muyã. Sən iŋkile tahəŋ ɓa kilfeŋge wamtaŋ sit meme waŋgənaŋgə.

³ Wanəgul guzli sən disiŋ sak nəɗi ka zəga nazzəɗ aketi.

Gawla na Daya Gəlya məmya'ən mohoko

⁴ Daya Yawe avayək hərzləmu net məzuyakaŋgə, nəsəngən va nədabbah sən ɗəf məddakən. Də mompumo pak tay əfɗahawa, tay əkol su sləmaw nəprəmgən va net məzuyakaŋgə.

⁵ Daya Yawe akol suwək sləmawa, nəɓoŋ sən ɓa, nəmndaw dərɓe ɓa.

⁶ Nəppanək dəɓaw sit məzərguwəni, gəm tapaslayu sit məzəptuwən eŋgemewa. Nəɗaman haraw səma əra gəm ətuf mefɗe ɓa.

⁷ Ya Daya Yawe armak vawa, vini nərbə wil ɓa, vini nətok kiharaw va gərma, nəsənək na wil waduwən ɓa.

⁸ Ɗəf məzəkkpaŋgaw təstəs tay a maŋgavawa, naway narma mama azaw di? Məziw matak aba mətawwəna! Naway məzuseɓ naw di? Dərban zən azawa!

⁹ Awla, Daya Yawe yi məzərma vawa, naway nawnah na nəraygənəka di? Məzuzelɗe naw pak waŋgisiɓeŋ va lukutu, tava wazime.

Məprəm ma məgəɗ wəza na Daya

¹⁰ Naway suwalaŋkum məzugeslne sən Yawe di? Dəprəm ma gawla nani. Naway məs dədaw ara guzliyo, məza ndən gas təki we'we' ɓa di? Dəppan kiyən addəv iya Yawe dəges aza Maŋgəlva nani!

¹¹ Nokum, mənokum məs kəsɗanən offo pakə, kəziweŋ vender-vender dit offoɗe mətelti, məddoŋ a gulo na offo nokum, gəm a təki kətalən offoɗe. Də vawi as van agəɗ akokum; wakəmtaŋ addəv əzəmsahã.