Isaya 5 - Bible en Guidar

Megezlembirke na Yawe

¹ Wanəyə gəlya kan sən baynawa; tay əpel aka baynaw na makraw də guli net megezlembirkeɗ nani. Baynaw na makraw tay də guli net megezlembirkeɗ a tukzlum mossorgo məs ba'arə.

² Abakanək guli vanə, akdehik gərmeŋge səmmbani; ampək wəlaŋga na megezlembirke, arkək gəla nawga addakən gəm aso'ək təki nawɗot uwa neti. Tay əɗɗum akan na wagəɗ kirtin moggeti, yaŋ awə kirtin məreyti.

³ Ya kakaŋ na, ɗiy na Yerusalem, ɗiy na Yuda, kamə mətawwən naka walaŋ guli net megezlembirkeɗ nawa də ina.

⁴ Miy əmpa nawgəɗ sən guli net megezlembirkeɗ məs nəɗɗa ɓa di? Nəɗiyək əɗɗum naw akan na wawə moggoni, yaŋ awə uwa daryawə, vimi di?

⁵ Kakaŋ na, wanənah sukum an nədagəɗ sən guli net megezlembirkeɗ nawa: wanətor mambara nani, kawtaɗni yi. Kawtilikeni mambara nakani, kawndapani yi.

⁶ Wanəzan pakə: kakrawni kivan ɓa, kanseni ɓa; gedirge dit tintifɗe waɓayaŋ addəvən, wanətak slaybuwən dawzi buwən adaka.

⁷ Vi guli net megezlembirkeɗ na Yawe Məzuɓappak na, ɗiy na Israyel əŋgə. Megezlembirke dədanneken zən vani, ndəni Yuda. Aɗiyək əɗɗum nan na wadawaŋ sarara, awla na əggbo mbeli yi, wadawaŋ təstəsə, awla na əhəm də əɓuhma yi.

Ɗiy en dədawdansənən gədəv Yawe

⁸ Əray azet ɗiy en məzəzlzletenin gəla aza mbərən məsapanən guli aza gulyo! Hã gap təki tay ɓa, ndəɗaŋgə kaka dəssoŋ addəv dəlva.

⁹ Nəprəmək Yawe Məzuɓappak na, gegesiŋ gəleɗe diyɗa wassoŋ miɓzluti, gəleɗe gugriɗe gəm təki lalawɗe nassa wassoŋ məza ɗəf ɓa.

¹⁰ Kare kəlaw na guli net megezlembirkeɗ aɗotoŋ na litər kaklaw sle ɓa; zeŋve naslga marga aki na hĩlĩw ma way kəlaw kəlaw ɓa.

¹¹ Əray yi azet ɗiy en dədawsilyoŋ də mompumo pum, əzban mbazla tatrãh nawsa, ɗiy en dədawtəpgənən pay ama mbazla tahəŋ dilili də mbazla aketi!

¹² Ɓaɓəlma gəzləŋtəndəŋ də gaŋgara, dəgəla gəm na pozloro tay əhhaɗan əsa neti. Ya awlanən wəza na Yawe va zəga azet ɓa, awlanən wəza an agəɗ də van ɓa.

¹³ Vini Yawe anah na: kawketi ɗiy naw aka balamə, vi gabba zəga tay asənaŋ ɓa. Ɗiy tektek wamtaŋ sən maya, ɗiy diyɗa wamtaŋ sit meme.

¹⁴ Vini təki nassa net ɗiy mimti akol man boktoŋgu, afoktokonək wəlan də baran məza meŋge ɓa. Ɗiy en dəssoŋ addəv gəzləŋgəzləŋ na wəzləra wabətaŋ addəvən.

¹⁵ Vi vaski, ɗəf pak wappu'u ɗəf pak waɓe'i. Məzəɓaygən kiyzən waɓegin harani.

¹⁶ Yawe Məzuɓappak warban gagdak nani də wətaw wəna; Maŋgəlva salala warban salala nan də əɗɗa təstəsə.

¹⁷ Kirtit timeŋgiɗ wataɗan addəv wəɓzla nan va təki nawtaɗ neti, gilew məzgileɗi, warahaŋ an nawtaɗ adaka.

¹⁸ Əray yi azet ɗiy en məzəɗɗaŋ zəga daryawə məzəgdənən heslepe də helege mə ɓiruwɓiruwi, tahəŋ əgdah mambray net dirɓegeti va adagdahaŋ mawta.

¹⁹ Tahəŋ ənahaŋ na: dəgəm zən gu'gu'u əɗɗa wəza nani, vi mulagəni! An Maŋgəlva na Israyel azaɓan naɗɗa dəgap aza əbaymani, mam aka əsənəni!

²⁰ Əray yi azet ɗiy en məzunahaŋ na an moggon na daryaw yi, ya an daryaw na moggoni! Məzəɗinən guzli ka əkeɗeɗe'e, əkeɗeɗe ka guzliyo, məzəkkpaŋganən zəga tatrah ka zəga gəgəŋɗəta, zəga gəgəŋɗət ka zəga tatrahã.

²¹ Əray yi azet ɗiy en məzuɗinən kiyzit va məsmaɗɗula məzulanən zit va məs əssən aketi!

²² Əray yi azet ɗiy guromɗe nawsa mbazla, məs gbogboŋɗe nawsapan zev mbazla məhəsən awandi pakə!

²³ Tay əkaŋ wən ammba məsdaraw vi adawrəhaŋ zəga na mapalay səvani, tay əgayaŋ ka təstəs net ɗiy en dəɗɗaŋ zəga ta'sa ɓa adawla ɓa.

²⁴ Vi vaski, va adawzlaŋ tərɗa akoffo awaniɓa kevile, vaski ərəh neti wazlaŋ addəv offo, gebbet waŋgənə, uffuyõ net wammbat til va burɗuku, vi azeleninik mahenziŋ na Yawe Məzuɓappak gəm azeleninik əpel na Maŋgəlva Salala na Israyel.

Ədagədəv na Daya

²⁵ Vini Yawe arban ədagədəv nan aket ɗiy nani aslanək van aketi, argeke. Mossorgoɗe gugriɗ akkereŋke; mogogoy net kporu aket tiveɗi. Də as pak ədagədəv nan awɓəta ɓa'a, van tay təlla.

²⁶ Aslanən gabaga nawsən dələv azan sit ɗiy-ɗar en faraɗa; yas agəɗ fofyoko siti, dəzzoŋgən hã sə təki dələv abaymani. Yeŋ əzzoŋ də kakara petpeti.

²⁷ Ɗəf tay dəyə səmmbet ɓa, tay dəskot ɓa, tay məs sin adawdaŋ ɓa, tay məzuleŋ ɓa, tay məs dəpəl helege mazlapa na gizen ɓa, helege na hensek tay dəɓoh ɓa.

²⁸ Herɗe nan mətakaɗani meti bəleɗe nan pak tahəŋ minslinti. Eperkeperke tilit pilseŋge net tay ɓəl va gərma, batam mawteɗ na pələs net va kəɓəs na vẽŋvil na buwnəŋgə.

²⁹ Ɗəf əprəmən na va əhəm na ɓoolu, tay əhay va əhəm net kirtin ɓoolu mugolun aka zəga nazəm neti tay əkanəni, məza ɗəf ətafən ɓa.

³⁰ Pay dəpaska, wahẽyẽti, wasan va məlpa məknahən, paysən adəgədəva. Kawkayani dələv van kawlani, ya kawla yi, guzliyə ɗəkɗəkə; slaybuwən gbimgbimi dədawki guzli aka əkeɗeɗe'e.