Isaya 49 - Bible en Guidar

Gawla na Daya Gəlya məmyã'ən masula'ən

¹ Məprəmwa, mənokum mətuwəraɗe, məpak sləmokum, ɗiy na faraɗa. Aka məɓəli əwu ɓa, Yawe ayəwəka; aka nəsaw addəvət mawa, anah iya nawa.

² Aɗɗak maw va masalam hoɓhoɓu aɗamawək də əɗup van akawa. Akkpaŋgawək va har mətakaɗ mani, aɗɗamawək addəv gulom nani.

³ Aɓsu na: Istə gawla nawa, Israyel də is nədarban gagdak nawa.

⁴ Naw nənahək na: «Nəyanək kizu ɗar mekeleŋ, nəzanək gbogboŋ naw mekeleŋ aka an atər na ɓa,» ya ərəh naw aza Yawe yi zəga nawrəh na vaw aza Maŋgəlva yi.

⁵ Ya kakaŋ na, Yawe apelke ndən məs dəzaɓu səddəvət maw ka gawla nani. Ka kawki Yakob azani, gəm kakkalan Israyel azani. Wanərah gagdak a mahara Yawe, Maŋgəlva yi gbogboŋ nawa.

⁶ Anahək na: Əssa gawla naw ka kawslan zev Yakob gəm kawtər məs dəndəwəɗaŋ na Israyeləŋ agəska. Nəɗikuk əkeɗeɗe net ɗiy-ɗarə, vi əkõh naw dəgapgən a təki məs dələv abaymani.

Əmilye na pay səka balamə

⁷ Vaŋki Yawe Salala məzubit Israyel adawpel sən ɗəf məzeleni məs ɗiy adawlaŋ va zəga ɗarə, sən balam net məsdarawɗe: Milyeŋge wawlanni, wasilyoŋgu, ɗiy gugriɗ wappu'oŋ aka wən na moggon na Yawe Salala na Israyel məs dəwelko.

⁸ An Yawe anah yaŋka: Pay na ulasahã, nəprəmək əkkam noko; pay na əkõho nəbbah sukko. Nəgukuko, nəɗikuk ta' kəsokgən wənmiyna net ɗiy nawsilgən dəlva nawɗak hara dələv məs dərayəŋka.

⁹ Kawnah sit məfərsəneɗ na migili gəm sit məs dəssoŋ ara guzli na: mide ara əkeɗeɗe'e. Wataɗaŋ aket tiveɗi, kiyit mossorgoɗe pak təki nawtaɗ neti.

¹⁰ May ade na ɓa, meme adetin na ɓa. Təki kakãh aɗɗe na ɓa gəm kəɓak-kəɓak na pay ɓa. Vi ɗəf məzula sahã aket wadawgiti, wake a met iŋkile miyma.

¹¹ Wanəkkpeŋget mossorgoɗe gugriɗe naw pak ka tive, tiveɗ naw waziweŋgi.

¹² Yendek əzzoŋ sə faraɗa! Mbirti sə kəla disiŋ gəm sə kəla pehe meɓɓeti səka dələv na Sinim.

¹³ Disiŋ anneki; anneken zuko dəlvafuŋ; mossorgoɗe gugriɗe məŋgəsl vaŋvəl nanneke, vi Yawe tay əɓitgit ɗiy nani, tay ərban ulasahã nan aket məssẽhẽŋɗe.

Nawa, nəzgət na kiyuk ɓa

¹⁴ Siyon anahək na: Yawe azgawəka, Daya azgətək kiwa.

¹⁵ Guluk tazgət ki wətət məzuwaɗ sa? Təwəl na sahã aka wətət naddəvət ɓa sa? Ya an tazgət zlaŋ na, naw nəzgət na kiyuk ɓa:

¹⁶ Yaŋ nəverkuk aka dagrakay vawa, zlavaɗe nok tahəŋ ama haraw pay pakə.

¹⁷ Kirtuk tahəŋ əzzoŋ də kakara, ɗiy en dəbzlukuni, gəm ɗiy en dəraygukuni, waddoŋ faraɗa səzoko.

¹⁸ Aslan horoko, awəl kiyuk tərwəslə, ndəɗaŋ pak akkalaŋka tahəŋ əzzoŋ azoko. Yawe aɗiyman na: Va nəsaw madarawa, ndəɗaŋ pak wakugil azok va zəga na gawla, wakiynet addakuk va waŋ məpsənət zəlta.

¹⁹ Dələv məɓzluwən məpiweni gəm mərayguk kənani. Wakəsok russo kakaŋ viyit ɗiy nani, ɗiy məzuzokun waddoŋ faraɗa.

²⁰ Wakəprəm əpel net kirtuk muɗakok dənɗaŋ nak a sləmok əmpa na: təki russoy azawa, adder səzawa nəsawgən də gəla.

²¹ Wakənah a mokrok na: Naway dəwe su eŋ vet di? Naw muɗakawi dit kirtuwa, ndarzlay nani, məkuwi aka balam, məgõhwi. Ya naway dəzgil eŋhiŋ di? Awla, naw məppawi takərguwa, ya eŋ net lahəŋ aŋgaŋgə di?

²² Aŋki an Daya Yawe anahə: in tat yaŋ əslan vaw aket ɗiy-ɗarə wanəmpa gabaga naw narban gagdak na dələv sit ɗiyi, wamndegetinin kirtuk mezeŋgleket a persleket sləkə wasletinin kirtuk muguluŋgit a ma wəleti.

²³ Milyeŋge wassoŋ ka ɗiy nazgəlkuni, gil net milyẽŋge wadiɗkuni. Wappu'oŋ aboko, watarna'ən hologudum naza təlko. Wakəsən na intə Yawe, ɗiy en dəɗinən əɗɗum net akawa, arbaŋ na wil ɓa.

²⁴ Kawmõhni zəga nawrəh səva gurom na əgay sa? Awaniɓa ɗəf an məs gbogboŋ arəm na wakõh sa?

²⁵ Ya an Yawe anah yaŋka: Kawmõhni ɗəf məs gbogboŋ arəmə, ərah na məs gərom wakõhu wanəgay də məzugay də isi, wanəkõhgit kirtuko.

²⁶ Məzəmgukumən sahã wanəzimgit slu ziti, mbel net wabey va mbazla na meketepe. Asna ɗiy pak wasənnən na məzukõhguk na, intə Yawe, məzubituk na, ndəni Məzuɓappak na Yakob.