Isaya 48 - Bible en Guidar

Daya tay ərbet zəgeɗ meleketeti

¹ Məprəm zəgeɗiŋki, ɗiy na Yakob, mənokum məs adawyukumən də iya na Israyel, mənokum məs kəgulyoŋ səza Yuda na: mənokum məswayaŋ də iya na Yawe gəm də Maŋgəlva na Israyel, ya addəv gegesiŋgi ɓa, addəv təstəsi ɓa.

² Mənokum tat əya kizukum də iya na walaŋgəla-metiŋ salala, mənokum məzugeseŋ aka Maŋgəlva an Israyel, məs adawyaŋ na Yawe Məzuɓappakə.

³ Zəgəɗ maddaabəŋ en dətoŋgoŋ dəpas pak nənahike; səza agilyoŋ sə mawa, nəprəmeti. Nəɗɗak də kakara, aɗɗaŋgək ləŋgə.

⁴ Vi nəsənək na nokum kiykum ɓəliyə, bələt na wəlokum tay va təbəza, mirbizkum tay mətokun va təbəz pepreŋge.

⁵ Ya nənah sukumuk an dətoŋ farə nəprəman sukumuk tak əzza neti vi kədawnahaŋ na: Əzaɓ-Maŋgəlva nawi diɗɗe zəgakamaŋgəlva nawi yi dəɗi wən nani ɓa.

⁶ Kəprəmənka, kulanənək as pakə, nənah sukum ɓa sa? Təŋ kakaŋka, in tat ərbet zəgeɗ meleketeti zəgeɗ məs nərbet ɓa, məs kisinin ɓa.

⁷ Zəga an dətoŋ farfari ɓa, kakaŋ kakaŋ nəɗɗa. Kəprəmən əpel akan tak əvoŋ taka tagay ɓa. Vi kədawnahaŋ na: Kəsənənək farfarə ɓa.

⁸ Kəprəmənən ɓa, kəsənənən ɓa, kəpakən sləmokum ɓa. Vi nəsənək na əzəm kiya kədawzəmaŋgə, məɓoŋkum kənanaŋ far adawyukumən səddəvət mokum.

⁹ Vi iya nawa, nəppanək ədagədəv nawa. Də moggon nawi nədarma ki zuwa, nəppan wən nawzokum.

¹⁰ Awla, nəbburkumuk də offo, va adabburoŋ təbəz babari nəbburkum ɓa, addəv mesteɓe na tatwãhi.

¹¹ Ammba kizuwi, ammba kizu nədaɗɗani, vi nəŋgəm na gagdak naw dəraygən gəm kapsən sən ɗəf maɓɓan ɓa.

Ɗəf an naknahan əɗɗum na Daya

¹² Məprəmwa, Yakob, gəm Israyel, ɗəf məs nəyə, Intə, ina. Intə ətəŋga intə əggraka.

¹³ Vaw dəzəməɗ dəlvafuŋgu gəm vaw dəzəŋ dəppar disiŋ. An nəyeke wazzoŋ əziw aŋ biyo.

¹⁴ Məkkal mənokum pakə, məprəma: Naway səweleŋgit meŋgilveɗ dənah zəgeɗis di? Ɗəf an Yawe aŋgəl waɗɗa əŋgla nan aka Babilon, gagdak nan warbə aket mə Kaldiyeɗi.

¹⁵ Intə, intə nəpeli; nəyak əmpa, nəkiyəka. Wəza nan wahhar ammbani.

¹⁶ Midder azawa məprəma: Nəpel məɗama də ətəŋ nan ɓa. Aka atəŋgə in tat aŋka. Ya kakaŋka, Yawe Maŋgəlva dəslənu də əmpəs nani.

Va kəprəmək maw kəta na

¹⁷ Aŋki an Yawe məzukõhguk, Salala na Israyel anahə: Intə Yawe, Maŋgəlva noko. Intə məzuyogok ka kəndərehgəni; intə məzədawguk aka tive məs kədazba.

¹⁸ Va kəgəɗək maɗɗula kaka' aket mahenziŋɗe nawa, asna, kəta zazay nok wasan va məlpa, təstəs nok va vovolumɗe na pehe.

¹⁹ Kirtuk wassoŋ va hoyoŋko uwa naddəvuk wasan va membikke, Iya net avvuy na ɓa, azə na səbaw ɓa.

Məddoŋ sə Babilon

²⁰ Məgil sə Babilon, mənzoŋ faraɗa sit mə Kaldiyeɗi. Də vaŋvəl nanneke, məprəman wən nani hã dəgapgən a təki dələv abaymani. Mənah na: Yawe akõhgənək gawla nan Yakob.

²¹ Meme dədenin a kapta-muyã a təki məs adawgit ɓa. Agilgitik iŋkile səddəv milɓe viyti: apɗakək milɓe, iŋkile agilyoŋgu lokloku.

²² Də as pak zazay tay viyit ɗiy mbəreyit ɓa, Yawe anahə.