Isaya 47 - Bible en Guidar

Əskot na Babilon

¹ Abət asok aka burɗuk waŋ goruk na Babilon, asok pirfif afuŋgu, məza aka mazaŋga na məlĩ ɓa, walaŋgəla-metiŋ net mə Kaldiyeɗi. Vi kazbani əyuk na salala gəm lalawək sawɓa ɓa.

² Egim kirtit buwən sula asər haya. Ator zəga səkoko, akros gabba lukut nok kəppangən mettilok appaka kəkkaɗgən kiyit məlpeŋge.

³ Gobbok dəwəl appaka ərba wil nok dəwəlgəni. Wanəmpəlkiya ɗəf tay nawtaku ɓa.

⁴ Iya na məzukõhgəm na Yawe Məzuɓappakə, Salala na Israyel.

⁵ Asok ɓatɓatə, aɗam arah guzliyo, walaŋgəla-metiŋ net mə Kaldiyeɗi. Vi kazbani əyuk na daya net milyeŋge ɓa.

⁶ Gədəvu adək aket ɗiy nawa. Nəreygitik ɗiy nawray vawa nəppetik ammba voko. Ya kəwəl sãhã aket ɓa, kəŋgrofuk mazza də zəga nawsla gagdak diyɗa.

⁷ Kəɗɗumuk na, wakəsok məlĩ hã faɗə, kəɗi zəgeɗ vet a mokrok ɓa, kəɗɗum aka va adaggrakaŋ ɓa.

⁸ Aprəm wənəŋ kakaŋka, is məŋgəl ənneken zuko, məs dəsan ɓatɓatə, is məzunah a mokrok na: Ɗəf tay va in ɓa! Nəsaw na gagəbay ɓa kawbeyti kirin ɓa.

⁹ Zəgeɗ sules pak na: Əssa gagəbaya gəm wəssa məza kirin ɓa, warukun pay taka aka ma taka. Wazzoŋ akok də gbogboŋgo də kəsok də miha na guzliguzli gəm nawdap ɗəf diyɗa zlaŋgə.

¹⁰ Kəppanək əɗɗum nok aka əɗɗa darawə. Is tat ənah na, ɗəf tay məzulu ɓa. Maɗɗula nok gəm əsən nok amndagokunuk dirɓe yaŋ kənah a mokrok na: Ɗəf tay va in ɓa!

¹¹ Tatwãh wade akoko, kəsən na pay nan ɓa; əza wade akoko kəkõh na səman ɓa gurzik na, əza wade akok məza is əsənən akok ɓa.

¹² Kamə asok də miha nawdapan ɗəfa, gəm wəza na guzliguzli noko. Kəyanək zuk viyit far səka gawlok diyɗa, azok na wakəndəreh ammbeti azok na wakəgeslnegit məzuzelkuni.

¹³ Kəyək dit əzgaɗe məs kərahə, məsənaŋ wən net gərzleɗ na disiŋ məpelən an nawrəhuk aza təlaper pakəŋka, dəziweŋgi, dəkõhgukun kana!

¹⁴ Awle, wassoŋ va kevile: offo wazle, akõhoŋ na səma hərzlum offo ɓa. Slayoffoy a gulo nawda zəga akan may nassa əluhun ɓa!

¹⁵ Vaski məs kəyan zuk viyit təŋ səka gawlok adassoŋ sukuni. Ɗəf pak wasan slorsloru, ɗəf tay nawkõhguk ɓa!