Isaya 45 - Bible en Guidar

Sirus, məwele na Maŋgəlva

¹ Aŋki an Yawe anah sən mesiya nani ana Sirus, məs nərma van dəzəŋ, ka kappet ɗiy net dəlveŋge avani, kaggbuk gagdak net milyeŋge, kawkol maddembeɗe net walaŋgəleɗe kol səbani, amsaŋ na ɓa.

² Naw wandaw aboko ka kawziyan təki ɗogro'-ɗogro', wanikrep maddambeɗe na təbəz pepreŋge wanəŋzlu təbəz nawsleketti.

³ Wanəpsuk əzaɓ məndəkni gəm arya məɗamani. Vasna wakəsən na intə Yawe, in Maŋgəlva na Israyel nəyukuk də iya noko.

⁴ Aka wən na gawla naw Yakob Aka wən na Israyel məwele nawa Nəyukuk də iya noko. Nəɗiyək kiyko, məza kəsənu ɓa.

⁵ Naw intə Yawe, tay mbərən ɓa. Dabərkiyu na, Maŋgəlva tay mbərən ɓa. Nəɗikuk ama wəza məza kəsənu ɓa.

⁶ Mammba dələv baymani kawsənni na zəga tay mə balsu ɓa. Naw intə Yawe, tay mabərən əmpa ɓa.

⁷ Nəzəməɗək əkeɗeɗe'e, nəɗɗak guzliyo. Nəɗɗak zazaya, nəɗɗak tatwãha'e. Naw intə Yawe, məzəɗɗe zəgeɗis pakə.

⁸ Disiŋ məzi minɗe! Slaybuwən dəppan təstəs ədaw lokloku! Dəlvafuŋ dəkolu ka əkõh dəwəgəni təstəs dəgilgini! Intə Yawe dəzəmiɗ pakə.

Dəlev narka də məzərka

⁹ Əray aka ɗəf mərəm mama aza məs dəzəməɗa, vi mesteɓe yi aret mesteɓet na dələv mbirti! Məsteɓe wanah sən ɗəf məs dərka na: mə kəgəɗəŋ di sa? Zəga tay vok asən ɓa sa?

¹⁰ Əray aza ɗəf mənah sən afən na: mi kəwəŋ di? Gəm sət mat na: Mi kəwəŋ di?

¹¹ Aŋki an Yawe, Salala na Israyel, dəzəmiɗ ɗiyis anahə: Mənokumtə nattokow aket zəgeɗ nazzoŋ aket kirtu gəm nawɗi su wən nan aka an nədaɗɗa sa?

¹² Intə nəɗɗa dəlvafuŋ gəm intə nəzəmiɗ ɗiy nakani. Vaw dəppar disiŋ gəm məzəɗi wən sit məzəlpaɗe nan pakə.

¹³ Naw nəfɗahanək addəv təstəsə wanəzeɓet tiveɗ nani, warka walaŋgəla-metiŋ nawa, wamndeget ɗiy naw misimgiti. Məza də dala yi ɓa, də əvəli ɓa, Yawe Məzuɓappak anahə.

Ɗiy-ɗar wazbetin mə Israyelɗe

¹⁴ Aŋki an Yawe anahə: ərah na wəza net məs Eziptiɗe, wəya na wəza na Etiyopi gəm net ɗiy na Seba, ɗiy məɓeyti, watoŋgoŋ anokumda, wassoŋ ka nokum! Wazbokuməni addəvit ngiyamɗe; Watoŋgoŋ wappu'oŋ abokum wakkamaŋ abokum də wənahaŋ na: Maŋgəlva, anokda yi kaka'ə tay akki maɓɓan ɓa.

¹⁵ Gegesiŋ Maŋgəlva məɗamən kənani Maŋgəlva na Israyel, məkõhgən ɗəfa.

¹⁶ Wil wadenini məzaɓaŋ zəgakamaŋgəlva warbaŋ wili baymeti wassoŋ sap pak addəv ərba wili.

¹⁷ Yawe wakõhgit ɗiy na Israyel əkõh an faɗə. Wil adenin na ɓa, warbaŋ wil ɓa faɗ hã ndolu.

Əkõh mənah wən nan appaka ta'ə

¹⁸ Vi vaŋki Yawe məs dəzəməɗ disiŋ, ndən Maŋgəlva məs dəzaɓan dəlvafuŋ, aɗɗa aziwgin məza foŋlorro ɓa, azəməɗ vi ɗiy dəssoŋgən akani, azaɓani. Ndən dənah na: Intə Yawe; Maŋgəlva tay maɓɓan ɓa.

¹⁹ Nəpel mahaɗama ɓa a təki məs guzli naka dələv ɓa. Nənah sən zev Yakob na dəkayawəngən addəv səmyã ɓa. In Yawe na, an təstəs nədawpele, an sarara nədarba.

Əkkpaŋ net ɗiy-ɗar aza Maŋgəlva

²⁰ Məkkalə, mide, məzar aŋ baymokumu, munokum ɗiy məs dəndəwəɗaŋ naket dəlveŋge. Ɗiy məzuslanən zəgakamaŋgəlva net na wəlaŋga məzəkkamanən maŋgəlva məs akõhgit na ɓa, neti zəga tay asənaŋ ɓa.

²¹ Məpele, mərban əɗɗum nokum məsapə, məpeleni! Naway dəpel dafsən aka an dədaɗɗa kəkaŋ van arban aka dəpas di? In Yawe tə ɓa sa? Dabərkiwa, Maŋgəlva tay maɓɓan əmpa ɓa. Maŋgəlva təstəsə, məkõhgən ɗəf tay mbərən abbəruk ɓa.

²² Ɗiy naket meŋge na dəlva, məkkpaŋ azawa, wakəkõhoŋgu, vi intə Maŋgəlva, tay maɓɓan əmpa ɓa.

²³ Nəswayək də ki zuwa təstəs səmaw adawgilyeni, əpel van addəɗ ɓa, ɗiy pak wakdukun takperet abawa ma pak wasway də iya nawa.

²⁴ Kawnəhi akaw na: Aza Yawe kaka' gbogboŋ də ədaw təstəs asani. Məzuzelɗe nan pak wamilyoŋ abani, wil wadenni.

²⁵ Mə Israyelɗe pakə, wassoŋ təstəs aza Yawe wannekenin ziti.