Isaya 44 - Bible en Guidar

¹ Ya kakaŋ na, aprəma, Yakob məgəɗ wəza nawa, gəm Israyel, is məs nəweli.

² Aŋki an Yawe anahə, intə nəɗɗuko, gəm nəzəməɗuk tak uwa noko intat əbbah suko: Geslne aduk ɓa məgəɗ wəza naw Yakob, gəm Yesurun məs nəweli.

³ Vi wanəzlalbay iŋkile aka dələv mə palpalə, gəm lolohẽɗ wadawaŋ aka təki məklakani. Wanəzlalbay əmpəs naw aket kirtuko əzaɓ naw aket dihigiɗko.

⁴ Wagilyoŋ va addak kevile va kekelguzlo a met iŋkile məzədawaŋgə.

⁵ Ɗəf aŋka wanah na: naw na Yawe nani; ɗəf andaka, waya kiyzən də iya na Yakob. An mbərən waver aka van na: Naw na Yawe nani walvan kiyzən na Israyel.

Wərma mama azet meŋgilveɗ en ɗarə

⁶ Aŋki an Yawe anahə, ndən məlĩ na Israyel məzukõhgit ɗiy nani, Yawe Məzuɓappak, intə wətəŋga, intə əbaymani. Dabər kiwa, Maŋgəlva tay maɓɓan ɓa.

⁷ Naway va in di? Dəŋgəsl vaŋvəla, dətəl wəla; dərban su zəgeɗ an dədawtoŋ təŋ səza nəɗi ɗiy ka naw faɗə, gəm dənahgən an dədazzani.

⁸ Kədakkerəŋ ɓa, kəgeslne'eŋ ɓa, nəprəman sukum far, gəm nəboton sukum mənokum miziweɗe naw ɓa sa? Dabərkiyu na, Maŋgəlva tay sa? Milɓe tay məza nəsən ɓa ɓa.

Məzaɓaŋ zəgakamaŋgəlva

⁹ Məzaɓaŋ zəgakamaŋgəlva pak tahəŋ va zəga ɗarə. Wəza lalaw net tay də ətərwəray ɓa: assoŋguk miziwe neti, awlanən ɓa, awsənnənən ɓa vini wil adawdeti.

¹⁰ Naway dəzaɓ maŋgəlva gəm zəgakamaŋgəlva, ahhəs na, ka adawrah ətər nan ɓa di?

¹¹ Awle, ɗiy məzəzbanən pak wil wadenini. Məzuzeɓin, sə weleŋgit ɗiyəŋgə. Dəkkalaŋ beymeti, dəziweŋgi: gəslne warme sap net pak wil wadenini.

¹² Məŋzla warsla təbəz də mabəl, tay əgulən ammba offo, van gbogboŋ tay ərgan də gədəma! May wada, gbogboŋ asan na azan ɓa. An dəsə iŋkile ɓa, waddakə.

¹³ Məzaɓ wəlaŋga də misseɗe, wasla də helege, waɗɗa va adawzaɓən də holyoffo, wakrat zən də nday gəm də zəga nawveren zəni. Wazaɓ vit va ɗəfa, haran va na ɗəfa, waɗi addəv gəla.

¹⁴ Wabəl muguguleɗ vini, wakay wəleŋɗe lelewɗe gəm Elon. Wappet əɓay aweleŋgit wəleŋɗe awra. Wampə wəleŋɗe adawyaŋ na pin buwən dəɓaygitigini.

¹⁵ Wasan sit ɗiy zəga narma offo. Wandaŋ səret nawluho awaniɓa kawda way neti. Yas adawzaɓən ka maŋgəlva ka kappu' abani, tahəŋ əzaɓən zəgakamaŋgəlva ka kakkamani.

¹⁶ Pəɗak na motoffo vani wazla akoffo; aka pəɗak nan adawya slu adawzəm hã ndən kpe'i. Awaniɓa walu offo dawnəh na: Ah, yas kana zu tay kahə, offoŋ neki yi!

¹⁷ Də motoffo an dəmbərə na wazaɓ zəgakamaŋgəlva, wappu' abani wagagdakani wakkaman də wənah na: Akõhguwa, vi istə maŋgəlva nawa!

¹⁸ Zəga tay asənaŋ ɓa, gabba zəga tay adaprəmaŋ ɓa. Vi mətipni hereti adawlaŋ ɓa, mətipni mekreti adawsənaŋ zəga ɓa.

¹⁹ Ɗəf tay məzəɗɗum təttaka ɓa, tay də əsən moggon akan təttaka ɓa tay məs maɗɗula akan nawnah na: pəɗak nan na nəzlak akoffo ɓa; nədak way aka slayoffo nani nuya'ək sluwa, nəzəmka. An nədaɗɗaŋ na mambray yi ɗarə. Aba wəlaŋga nədappu'o!

²⁰ Əɗɗum net aka moŋgloy; mekret akkpaŋgək dərwa azetike. Akõhgən zeŋgilet ɓa, ya anahaŋ na: Zəga navawəŋ uwawəni ɓa.

Gawla naw kənani, kədazgət ɓa

²¹ Aɗɗum aket zəgeɗiski Yakob, dit ɗiy na Israyel, vi gawla naw kənani. Nəɗɗuk na kəsokgən məgəɗ wəza nawi yi. Nəzgət na kiyuk ɓa, Israyel.

²² Wanəvvuyon əɓoŋ nokum va slaybuwna. Mambray nok va maŋglavay, məmil azawa, vi nəkõhgukumko.

²³ Disiŋ, minneki vi Yawe aɗɗaka. Kpukpum na dəlvafuŋ, anneki. Mossorgoɗe gugriɗe, wəleŋɗe ngərəɓə, wəlaŋga awandi naddəvən pakə, məgəsl vaŋvəl sən ənneke. Vi Yawe akõhgənək Yakob, arbanək gagdak nan a Israyel.

Maŋgəlva yi Daya na zəga pakə

²⁴ Aŋki an Yawe məzukõhguko, məs dezəməɗuk addəvət mok far anahə: «Intə Yawe, məs dəɗɗa an dəsan pakə. Intə takərgu nəpak disiŋ. Pay nəsloprokon dəlvafuŋgu, naway dəsan dəndu di?

²⁵ Nəraygənək ula net məskaŋ heligi, Nəkkpaŋganək əɗɗum net məskaŋ helig dərwa, Nəmndegetik məsmaɗɗulet dirɓe, nəkkpaŋganək əsən net dərwa.

²⁶ Nəziwik aka əpel na gawla nawa, nəɗɗak an maslənɗe naw aɗɗumongu. Nənahək na Yerusalem na: Waknah dit ɗiyi. Walaŋgəleɗe gugriɗ na Yuda na: karketi yi. Kawsilgini əɓzla nani.

²⁷ Ndən dənah sən pehe kpukpum na: Akkpa'ə, wanəkkpe' məlpeŋge noko.

²⁸ Ndən dəpel aka Sirus na: Məzutaɗa naw kənani. Waɗɗa an məs nəŋgəl pakə. Ka kawnah aka Yerusalem na, karkani gəm aka gəla nakkam na, kamsaki ərkani.»